បើតាមលោកឧត្តមសេនីយ៍ត្រី ភឹង ចិន្តារ៉េត ស្នងការរងទទួលផែនព្រហ្មទណ្ឌ នៃស្នងការដ្ឋាននគរបាលខេត្តសៀមរាប បានឲ្យដឹងថា នៅព្រឹកថ្ងៃទី១៥ ខែកញ្ញា ឆ្នាំ២០២០នេះ កម្លាំងនគរបាលស្រុកអង្គរធំ សហការជាមួយនគរបាលស្រុកពួក បានឃាត់ខ្លួនជនសង្ស័យម្នាក់ ជាប់ពាក់ព័ន្ធករណីលួចម៉ូតូរបស់អ្នករកស៊ីដាក់ប៉េងគប់ប៉ោង នៅចំនុចផ្លូវក្រហម ភូមិតាកាំ ឃុំដូនកែវ ស្រុកពួក ដោយជនសង្ស័យមានឈ្មោះ ខៀវ ខន ភេទប្រុស អាយុ៣២ឆ្នាំ រស់នៅភូមិគោកកក់ ឃុំស្វាយចេក ស្រុកអង្គរធំ ខេត្តសៀមរាប ។
លោកឧត្តមសេនីយ៍ត្រី ឲ្យដឹងទៀតថា ក្រោយឃាត់ខ្លួនជនសង្ស័យខាងលើបានសារភាពថា ខ្លួនពិតជាបានលួចម៉ូតូខាងលើពិតប្រាកដមែន ដោយកាលថ្ងៃទី១៤ ខែកញ្ញា ឆ្នាំ២០២០ជមសង្ស័យ បានលួចម៉ូតូមួយគ្រឿង ម៉ាកសុយសាគីស្មាស់ ពណ៌ក្រហមលាយខ្មៅ សេរីឆ្នាំ២០១២ គ្មានផ្លាកលេខ នៅចំនុចវត្តស្លាតរំជ័យ ស្ថិតនៅភូមិតាត្រាវ ឃុំស្វាយចេក ស្រុកអង្គរដែរជារបស់ ឈ្មោះ អៀម ឡូញ ភេទ ប្រុស អាយុ៣០ឆ្នាំ មុខរបរ អ្នកដាក់ប៉េងប៉ោង រស់នៅភូមិ ល្វា ឃុំគោកវត្ត ស្រុកវ៉ារិន ។
លោកស្នងការរងបញ្ជាក់ថា ក្រោយទទួលបានព័ត៌មានពីជនរងគ្រោះ ភ្លាមៗនោះ កម្លាំងសមត្ថកិច្ច ក៏បានសហការកម្លាំងអធិការដ្ឋាន នគរបាលស្រុកពួក ឃាត់ខ្លួនជនសង្ស័យបាននៅចំនុច ផ្លូវក្រហម ភូមិតាកាំ ឃុំដូនកែវ ស្រុកពួក ។ ក្រោយឃាត់ខ្លួនបានសមត្ថកិច្ចបានប្រគល់ម៉ូតូឲ្យជនរងគ្រោះវិញ ចំណែកជនសង្ស័យ ជំនាញ់កំពុងកសាងសំណុំរឿងបញ្ជូនខ្លួនទៅតុលាការ ដើម្បីចាត់ការតាមនិតិវិធីជាបន្ត ៕
អត្ថបទ និង រូបភាព៖ ខេង ឧត្តម
កែសម្រួល៖ អ៊ុន ណារាជ្យ
