នៅព្រឹកថ្ងៃទី០១ ខែតុលា ឆ្នាំ២០២០នេះ ការិយាល័យបច្ចេកទេសនៃមន្ទីរសុខាភិបាលខេត្តសៀមរាប បានរៀបចំកិច្ចប្រជុំប្រចាំត្រីមាសទី៣ នៃក្រុមការងារពិសេសថ្នាក់ខេត្តសម្រាប់លុបបំបាត់ជំងឺគ្រុនចាញ់ខេត្តសៀមរាប ដើម្បីធ្វើបច្ចប្បន្នភាពអំពីស្ថានភាពជំងឺគ្រុនចាញ់ សមិទ្ឋផល បញ្ហាប្រឈម និងទិសដៅនៃការអនុវត្តឈានទៅរកការលុបបំបាត់ជំងឺគ្រុនចាញ់ក្នុងខេត្តសៀមរាប ពង្រឹងតួនាទីក្រុមការងារ និងអន្តរាគមន៍ក្នុងការឆ្លើយតបនឹងជំងឺគ្រុនចាញ់ ព្រមទាំងពិភាក្សាលើបញ្ហាដែលបានលើកឡើងក្នុងកិច្ចប្រជុំ សម្រាប់ការផ្តល់និងទទួលនូវអនុសាសន៍សម្រាប់ទិសដៅដៅជំហានបន្ទាប់ ដើម្បីសម្រេចគោលដៅលុបបំបាត់ជំងឺគ្រុនចាញ់ ក្រោមអធិបតីភាព លោក ពិន ប្រាកដ អភិបាលរងខេត្តសៀមរាប និង លោកវេជ្ជបណ្ឌិត មាស ថា អនុប្រធានមជ្ឈមណ្ឌលជាតិប្រយុទ្ធប្រឆាំងនឹងជំងឺគ្រុនចាញ់ ប៉ារ៉ាស៊ីតសាស្ត្រ និងបាណកសាស្ត្រនៃក្រសួងសុខាភិបាល ដោយមានការអញ្ជើញចូលរួមពីសំណាក់លោក លោកស្រី ជាថ្នាក់ដឹកនាំមន្ទីរ អង្គភាព ស្ថាប័នពាក់ព័ន្ឋមួយចំនួនក្នុងខេត្ត រដ្ឋបាលក្រុងស្រុក និងមន្ត្រីសុខាភិបាលនៃស្រុកប្រតិបត្តិសរុបចំនួនប្រមាណជា៥០រូប ។
លោកវេជ្ជបណ្ឌិត មាស ថា អនុប្រធានមជ្ឈមណ្ឌលជាតិប្រយុទ្ធប្រឆាំងនឹងជំងឺគ្រុនចាញ់ ប៉ារ៉ាស៊ីតសាស្ត្រ និងបាណកសាស្ត្រនៃក្រសួងសុខាភិបាល មានប្រសាសន៍ថា គិតត្រឹមពីខែមករាដល់ខែសីហាឆ្នាំ២០១៩ ករណីគ្រុនចាញ់នៅទូទាំងប្រទេសកើតមានចំនួន ១១.០៣០ករណី ប៉ុន្តែសម្រាប់រយៈពេល៨ខែឆ្នាំ២០២០ នៅសល់តែចំនួន ២.៨១៤ករណី ដូច្នេះស្ថានភាពទូទៅនៃការឆ្លងនិងឈឺដោយជំងឺគ្រុនចាញ់នៅកម្ពុជានាពេលបច្ចុប្បន្នមានភាពថយចុះជាលំដាប់ តែមានខេត្តភាគខ្លះនៅតែមានបញ្ហាស្មុគ្រស្មាញនៅឡើយ ដូចជាចំណុចខ្លះក្នុងតំបន់ស្រុកភ្នំស្រួច ខេត្តកំពង់ស្ពឺ និងចំណុចត្រពាំងជោរ ក្នុងតំបន់ប្រសព្វភ្នំឱរ៉ាល់ រវាងខេត្តកំពង់ស្ពឺ ពោធិសាត់ និងខេត្តកំពង់ឆ្នាំង ។
លោកវេជ្ជបណ្ឌិត មាស ថា មានប្រសាសន៍បន្ថែមថា ជារៀងរាល់ឆ្នាំក្រសួងសុខាភិបាល បានជំរុញដល់គ្រប់មន្ទីរសុខាភិបាលរាជធានី ខេត្ត ជាពិសេសក្រុមការងារពិសេសលុបបំបាត់ជំងឺគ្រុនចាញ់គ្រប់ខេត្តធ្វើការអន្តរាគមន៍បន្ទាន់ទៅនឹងជំងឺគ្រុនចាញ់ ដោយវិធីតេស្ត និងព្យាបាលឱ្យបានទាន់ពេលវេលា ដើម្បីធានានូវប្រសិទ្ឋភាព និងគុណភាពការងារឈានទៅសម្រេចបានជោគជ័យនៃយុទ្ឋសាស្ត្រជាតិលុបបំបាត់ជំងឺគ្រុនចាញ់នៅឆ្នាំ២០១១-២០២៥ ដែលបានផ្តួចផ្តើមគំនិត និងអនុម័តដោយសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា គឺកម្ពុជាមានគោលដៅលុបបំបាត់ជំងឺគ្រុនចាញ់ប្រភេទហ្វស៊ីប៉ារ៉ូមនៅត្រឹមឆ្នាំ២០២០ និងលុបបំបាត់ជំងឺគ្រុនចាញ់ប្រភេទវីវ៉ាក់នៅឆ្នាំ២០២៥ ។
លោក ពិន ប្រាកដ អភិបាលរងខេត្តសៀមរាប មានប្រសាសន៍ថា អត្រាជំងឺគ្រុនចាញ់នៅខេត្តសៀមរាបមានការថយចុះគួរឱ្យកត់សម្គាល់ ជាពិសេសក្រោយពេលតាំងពីចាប់ផ្តើមអនុវត្តផែនការយុទ្ឋសាស្ត្រជាតិលុបបំបាត់ជំងឺគ្រុនចាញ់ឆ្នាំ២០១១-ឆ្នាំ២០២៥ របស់មជ្ឈមណ្ឌលជាតិប្រយុទ្ធប្រឆាំងនឹងជំងឺគ្រុនចាញ់ ប៉ារ៉ាស៊ីតសាស្ត្រ និងបាណកសាស្ត្រ គឺពុំមានករណីស្លាប់ដោយសារជំងឺគ្រុនចាញ់ទេ នាប៉ុន្មានឆ្នាំចុងក្រោយនេះ ដែលការងារនេះ បានរួមចំណែកឈានទៅសម្រេចជោគជ័យនៃផែនការយុទ្ឋសាស្ត្រជាតិលុបបំបាត់ជំងឺគ្រុនចាញ់នៅឆ្នាំ២០១១-២០២៥ ប៉ុន្តែយ៉ាងណាក៏ដោយ ក៏យើងមិនត្រូវភ្លេចខ្លួនទៅនឹងលទ្ឋផលដែលយើងទទួលបាននេះទេ ព្រោះថាផែនការជំងឺគ្រុនចាញ់ប្រភេទប៉ារ៉ាស៊ីត ហ្វាល់ស៊ីប៉ារ៉ូមនៅឆ្នាំ២០២០ខិតជិតមកដល់ ខណៈដែលយើងនៅជួបបញ្ហាប្រឈមមួយចំនួនដូចជាប្រជាជនចល័តទៅធ្វើការក្នុងតំបន់គ្រុនចាញ់ទាំងក្នុងនិងក្រៅប្រទេស និងការកំណត់អត្តសញ្ញាពួកគាត់នៅមានភាពស្មុគ្រស្មាញជាច្រើន ។
ជាមួយគ្នានេះដែរ លោក ពិន ប្រាកដ បានជំរុញដល់ក្រុមការងារពិសេសថ្នាក់ខេត្តសម្រាប់លុបបំបាត់ជំងឺគ្រុនចាញ់ខេត្ត ត្រូវចូលរួមពិនិត្យលើការងារអនុវត្តកន្លងមករបស់យើង នៅមានសេសសល់ចំណុចណាខ្លះដែលអនុវត្តមិនទាន់បានរលូន និងបានជួបបញ្ហាប្រឈមនិងភាពងាយស្រួលដូចម្តេចខ្លះ ពិសេសត្រូវបន្តសកម្មភាពផ្តោតលើប្រជាជនចំណាកស្រុក ផ្តល់ឱកាសឱ្យគាត់ទទួលបានព័ត៌មានពីជំងឺគ្រុនចាញ់ដើម្បីឱ្យគាត់ទទួលការធ្វើតេស្ត និងព្យាបាលទាន់ពេលវេលា បន្តពង្រឹងសហការគ្នា ជាមួយវិស័យឯកជន បញ្ជូនរាល់ករណីសង្ស័យជំងឺគ្រុនចាញ់ឱ្យមករកសេវាសាធារណៈ និង បន្តការអប់រំពីវិធានការបង្ការជំងឺគ្រុនចាញ់ ។
សូមបញ្ជាក់ថា ក្នុងរយៈពេល៩ខែដើមឆ្នាំ២០២០នេះ ខេត្តសៀមរាប កើតមានគ្រុនចាញ់ចំនួន៤៤ករណី សុទ្ឋតែជាប្រភេទប្លាសស្មូដ្យូមវ៉វ៉ាក់ ហើយក្នុងចំណោម៤៤ករណីនេះ មានអ្នកឈឺចំនួន៣៧នាក់ ដោយអ្នកខ្លះឈឺលាប់ឡើងវិញពី៣ទៅ៤ដង ប៉ុន្តែមិនមានប្រភេទ ហ្វាល់ស៊ីប៉ារ៉ូមទេ ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
