រសៀលថ្ងៃទី៣០ ខែកញ្ញា ឆ្នាំ២០២០ ស្រ្តីមេម៉ាយ មានកូន២នាក់ រួមនិងក្មួយកំព្រា៣នាក់ បានទទួលអំណោយសប្បុរសធម៌ជាស្បៀងអាហារនិងថវិកាមួយចំនួន ពីប្រតិភូសង្ឃក្នុងខេត្តសៀមរាប ដឹកនាំដោយព្រះគ្រូមុនីបញ្ញាញាណ ស៊ុម ពិសិទ្ធិ ព្រះសមុហ៍គណខេត្ត និងជាព្រះចៅអធិការវត្តប្រាសាទចន្ទរង្សី ហៅវត្តគោកចាន់ ឃុំអំពិល ស្រុកប្រាសាទបាគង ខេត្តសៀមរាប ដើម្បីសម្រួលដល់ជីវភាពខ្វះខាតក្នុងគ្រួសារ។
ស្ត្រីមេម៉ាយខាងលើ មានវ័យ២៤ឆ្នាំ រីឯស្វាមី បានទទួលមរណភាព អំឡុងមានផ្ទៃពោះ និងបានសម្រាលកូននៅមន្ទីរពេទ្យជ័យវរ្ម័នទី៧ ខេត្តសៀមរាប កាលពីចុងខែសីហាកន្លងទៅ។ បច្ចុប្បន្នស្ត្រីរូបនេះ រស់នៅភូមិសាលាកន្សែង ឃុំស្វាយដង្គំ ក្រុងសៀមរាប ជាមួយជីដូនចាស់ជរា និងមានឳពុកម្តាយ មានជីវភាពខ្វះខាត ក្រោយបាត់បង់ការងារ ដោយសារវិបត្តិជំងឺកូវីដ១៩។
នេះអំណោយសប្បុរសធម៌លើកទី៣ហើយ ដោយលើកទី១ ទទួលបានពីលោក ហឿន សំនៀង ជំនួយការផ្ទាល់ ឯកឧត្តមទេសរដ្ឋមន្រ្តី ស៊ុន ចាន់ថុល រដ្ឋមន្រ្តីក្រសួងសាធារណការនិងដឹកជញ្ជូន និងសន្យាបន្តជួយឧបត្ថម្ភបន្ថែម ក្នុងខែ១០០ដុល្លារ រយៈពេល៣ខែ បន្តទៀត។ និងលើកទី២ ទទួលបានអំណោយពីអនុសាខាកាកបាទក្រហមក្រុងសៀមរាប។
ព័ត៌មានជាតិ ថ្មីៗ
គួរជម្រាបថា ការប្រតិបត្តិសកម្មភាពសង្គមរបស់ព្រះសង្ឃក្នុងឱកាសនេះ បានឆ្លុះបង្ហាញឲ្យឃើញ ពីការផ្សារភ្ជាប់គ្នា រវាងវិស័យពុទ្ធិចក្រ និងវិស័យអាណាចក្រ ដែលមិនអាចកាត់ផ្តាច់ចេញពីគ្នាបាន៕
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក សេង ផល្លី
