នៅព្រឹកថ្ងៃទី០២ ខែតុលា ឆ្នាំ២០២០ នាទីស្តីការ ក្រសួងព័ត៌មាន ឯកឧត្តម Panyarak Poolthup ឯកអគ្គ រាជទូតថៃប្រចាំកម្ពុជា តំណាងសាកលវិទ្យាល័យ រ៉ាច្ចមុងឃុនតិចឡូជី ប្រាក់ណាខន ប្រទេសថៃ បានអញ្ជើញនាំយក ឯកសណ្ឋានបណ្ឌិតកិតិ្តយស គរុកោសល្យសារព័ត៌មាន និងមនុស្សសាស្រ្ត សង្គមសាស្រ្ត ប្រគល់ជូន ឯកឧត្តម ខៀវ កាញារីទ្ធ រដ្ឋមន្រ្តីក្រសួងព័ត៌មាន នៃព្រះរាជាណាចក្រកម្ពុជា ដែលជាការទទួលស្គាល់ពីគុណតម្លៃ និង ស្នាដៃការងារ របស់ឯកឧត្តម ជូនដល់រាជរដ្ឋាភិបាលកម្ពុជានាពេលកន្លងមក។
ឯកឧត្តម ឯកអគ្គរាជទូត លើកឡើងថា សញ្ញាបត្របណ្ឌិតកិត្តិយសនេះដែរ ក៏បានបង្ហាញពីកិច្ចខិតខំប្រឹងប្រែងរបស់ ឯកឧត្តមរដ្ឋមន្រ្តី ក្នុងការជួយដល់រាជរដ្ឋាភិបាល ដែលមានសម្តេចតេជោ ហ៊ុន សែន ជានាយករដ្ឋមន្ត្រីនៃកម្ពុជា នាំយកនូវសន្តិភាព ការផ្សះផ្សាជាតិ និងស្ថេរភាព សម្រាប់ប្រទេស តាមរយៈការប្រើប្រាស់សិល្បៈនៃការផ្សព្វផ្សាយព័ត៌មាន និងការទំនាក់ទំនងនយោបាយ សម្រាប់ជាប្រយោជន៍ជូនប្រទេសជាតិ។
ថ្លែងក្នុងឱកាសនោះ ឯកឧត្តមរដ្ឋមន្រ្តី ខៀវ កាញារីទ្ធ បានសម្ដែងនូវអំណរគុណ ចំពោះ សាកលវិទ្យាល័យ រ៉ាច្ចមុងឃុន តិចឡូជី ប្រាក់ណាខន ប្រទេសថៃ សញ្ញាបត្របណ្ឌិតកិតិ្តយសនេះដែរ ក៏បានបង្ហាញនូវការស្វែងយល់ពីប្រទេសកម្ពុជា និង ការខិតខំប្រឹងប្រែងកសាងចំណេះជូនប្រជាជន ក៏ដូចជាការ កសាងចំណងមិត្តភាព រវាងប្រទេសកម្ពុជា និងប្រទេសថៃ ។
ទន្ទឹមជាមួយគ្នានេះដែរ ឯកឧត្តមរដ្ឋមន្រ្តី ក៏បានថ្លែងអំណរគុណ ចំពោះ ឯកឧត្តម ឯកអគ្គរាជទូតថៃ ប្រចាំកម្ពុជា រួមនិងសហការី ដែលរយៈពេលកន្លងមកនេះ បានជួយធ្វើឲ្យទាក់ទំនងរវាង ប្រជាជន ឥស្សរជនជាន់ខ្ពស់ប្រទេសទាំងពីរ កាន់តែមានភាពល្អប្រសើរ។
តាមការបញ្ជាក់របស់ ឯកឧត្តម បណ្ឌិត សាត ដារ៉ា អគ្គនាយករង គណ:កម្មាធិការ សិទ្ធិមនុស្សកម្ពុជា ដែលបានសម្របសម្រួលកិច្ចការងារនេះ បញ្ជាក់ថា ការប្រគល់ជូនសញ្ញាបត្របណ្ឌិតកិតិ្តយសនេះ សាកលវិទ្យាល័យតំណាងព្រះមរបរាជវាំងប្រទេសថៃ យោងទៅលើគុណសម្បត្តិសំខាន់ៗចំនួន ៥ របស់ ឯកឧត្តម ខៀវ កាញារីទ្ធ រួមមាន៖
– ទី១ សមព័ន្ធភាព ក្នុងការចុះទៅធ្វើការតស៊ូមត្តិ ដោះស្រាយបញ្ហា រវាង កម្ពុជា ថៃ ដែលមានបញ្ហា នៅព្រំដែន ទាំងក្នុងនិងក្រៅប្រទេស។
– ទី២ ការព្យាយាម ធ្វើទំនាក់ទំនង នូវរាល់វិបត្តិ ដែលកើតមានឡើងផ្នែកនយោបាយនៅក្នុងស្រុក ក៏ដូចជាមួយថៃ ដោយបានជួយកាត់បន្ថយ និងមានការឯកភាពគ្នាបាន។
– ទី៣ វីរភាព ក្នុងកិច្ចការពង្រឹងខាងផ្នែក សារព័ត៌មាន ឲ្យមានលក្ខណៈល្អប្រសើរ។
– ទី៤ និង ចំណុចទី ៥ ឯកឧត្តម ជាបុគ្គល ដែលប្រមុខរាជរដ្ឋាភិបាល ទុកចិត្ត និងមើលឃើញពីកិច្ចខិតខំប្រឹងប្រែង បំពេញកិច្ច ការងារ នៅក្នុងក្រសួងព័ត៌មាន បានដោយរលូន និងមានលទ្ធផលល្អ។
បើតាមការបញ្ជាក់ ឯកឧត្តម បណ្ឌិត សាត ដារ៉ា បញ្ជាក់បន្ថែមថា បើសិនជាគ្មានការ ប្រែប្រួល និងបញ្ហានៃជំងឺកូវីត១៩ បានធូរស្រាលទៅហើយនោះ សញ្ញាបត្របណ្ឌិត កិត្តយស នេះ គ្រោងនឹងធ្វើពិធីប្រគល់ជូនដល់ ឯកឧត្តម រដ្ឋមន្រ្តី ខៀវ កាញារីទ្ធ នៅកំឡុងខែកុម្ភៈ ឆ្នាំ២០២១ នៅព្រះបរមរាជវាំង ប្រទេសថៃ ដោយព្រះមហាក្សត្រថៃ តែម្តង។
អត្ថបទ និង រូបថត ៖ ក្រសួងព័ត៌មាន
