លោកស្រី យូ សុភា អភិបាលរងខេត្តសៀមរាប មានប្រសាសន៍ថា បច្ចុប្បន្ននេះ ប្រព័ន្ធបច្ចេកវិទ្យាគមនាគមន៍និងពត៌មាន ត្រូវបានប្រើប្រាស់យ៉ាងទូលំទូលាយជាសកល ដូច្នេះការពង្រឹងសមត្ថភាពបន្ថែមដល់មន្ត្រីការក្នុងការកាត់បន្ថយកម្លាតឌីជីថលនេះ គឺជំរុញការប្រើប្រាស់បច្ចេកវិទ្យាគមនាគមន៍និងព័ត៌មាននៅក្នុងការអភិវឌ្ឍធនធានមនុស្ស ស្របតាមគោលនយោបាយអភិវឌ្ឍន៍វិស័យទូរគមនាគមន៍បច្ចេកវិទ្យាគមនាគមន៍និងព័ត៌មាន ឆ្នាំ២០២០ ព្រោះថាមន្ត្រីរាជការគ្រប់រូបត្រូវតែចេះប្រើប្រាស់ប្រព័ន្ធបច្ចេកវិទ្យាគមនាគមន៍ និងពត៌មាន ដើម្បីគ្រប់គ្រង បញ្ជូន និងទទួលទិន្នន័យ ឬពត៌មាន ពីគ្រប់ទិសទី ដើម្បីវាយតម្លៃនិងដោះស្រាយឱ្យទាន់ពេលវេលា ជាពិសេសការធ្វើសេចក្តីសម្រេចនានាឱ្យបានត្រឹមត្រូវផងដែរ ។
លោកស្រី យូ សុភា មានប្រសាសន៍បន្ថែមថា វគ្គបណ្តុះបណ្តាលពេលនេះ ពិតជាមានសារៈសំខាន់ ក្នុងការឆ្លើយតបនឹងតម្រូវការជាក់ស្តែងសម្រាប់ការប្រើប្រាស់ប្រព័ន្ធបច្ចេកវិទ្យានៅក្នុងមន្ទីរ អង្គភាពនាពេលសម័យបច្ចុប្បន្ននេះ ដូច្នេះ
ពេលត្រលប់ទៅអង្គភាពវិញ គឺត្រូវយកចំណេះដឹងដែលទទួលបានពីវគ្គបណ្តុះបណ្តាលនេះ ទៅប្រើប្រាស់ជាប្រយោជន៍ដល់អង្គភាព ព្រមទាំងចែករំលែកដល់មន្ត្រីរាជការ ដែលនៅជុំវិញខ្លួនឱ្យបានយល់ដឹង និងចេះប្រើប្រាស់ផង ព្រោះថាធនធានចំណេះវិជ្ជា វាខុសពីធនទ្រព្យសម្បត្តិដទៃទៀត ដែលកាន់តែប្រើកាន់តែអស់ រីឯចំណេះវិជ្ជាកាន់តែប្រើ កាន់តែរីកចម្រើន ហើយបើមិនបានចែករំលែកទៅអ្នកដទៃទេនោះ ជាធម្មជាតិ វានឹងបាត់បង់ទៅវិញជាស្វ័យប្រវត្តិ ។
លោកស្រី យូ សុភា មានប្រសាសន៍យ៉ាងដូច្នេះក្នុងឱកាសបិទវគ្គបណ្តុះបណ្តាលជំនាញឌីជីថលចាំបាច់ (Digital Skill Essential) ដែលរៀបចំដោយវិទ្យាស្ថានជាតិប្រៃសណីយ៍ ទូរគមនាគមន៍ បច្ចេកវិទ្យាគមនាគមន៍និងព័ត៌មាន សហការជាមួយមន្ទីរប្រៃសណីយ៍និងទូរគមានគមន៍ខេត្តសៀមរាប កាលពីល្ងាចថ្ងៃទី០២ ខែតុលា ឆ្នាំ២០២០ ដែលមានរយៈពេលចំនួន៥ថ្ងៃកន្លងមក ដែលមានសិក្ខាកាមចំនួន ២៩នាក់ មកពី១២ មន្ទីរ អង្គភាពនានាជុំវិញខេត្ត ។
បើតាមប្រសាសន៍របស់លោក ហ៊ាន សំបឿន អនុប្រធានវិទ្យាស្ថានជាតិ ប្រៃសណីយ៍ ទូរគមនាគមន៍ បច្ចេកវិទ្យាគមនាគមន៍ និងព័ត៌មាន បានបញ្ជាក់ថា វគ្គសិក្សាបណ្តុះបណ្តាលជំនាញឌីជីថលចាំបាច់ នេះបានកើតឡើងគឺក្រោមអនុសាសន៍របស់ ឯកឧត្តម ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ ដែលបានចង្អុលបង្ហាញឱ្យវិទ្យាស្ថានជាតិ ប្រៃសណីយ៍ ទូរគមនាគមន៍ បច្ចេកវិទ្យាគមនាគមន៍ និងព័ត៌មាន ត្រូវយកចិត្តទុកដាក់ខ្ពស់ក្នុងការបណ្ដុះបណ្ដាលអភិវឌ្ឍសមត្ថភាពរបស់មន្ត្រីរាជការនៅតាមមន្ទីរនានា នឹងជាពិសេសគឺមន្ទីរប្រៃសណីយ៍និងទូរគមានគមន៍ខេត្តសម្រាប់អភិវឌ្ឍន៍សមត្ថភាព ដើម្បីបំពេញការងារឱ្យបានល្អ ស្របតាមនិន្នាកា នៃការរីកចម្រើននៃប្រព័ន្ធបច្ចេកវិទ្យាគមនាគមន៍ និងព័ត៌មាននាពេលបច្ចុប្បន្ននេះ ៕
អត្ថបទ និង រូបថត ៖ លោក ទ្រា ពន្លឺ
កែសម្រួលអត្ថបទ ៖ លោក លីវ សាន្ត
