ការបង្ហាញពីវឌ្ឍនភាពការងារប្រតិបត្ដិការ៩ខែនេះ ធ្វើឡើងតាមរយៈសិក្ខាសាលាមួយ នៅខេត្ដសៀមរាប នាព្រឹកថ្ងៃទី០១ខែតុលាឆ្នាំ២០២០ ក្រោមអធិបតីភាពឯកឧត្ដម ហេង រតនា ប្រតិភូរាជរដ្ឋាភិបាលនិងជាអគ្គនាយកមជុ្ឍមណ្ឌលសកម្មភាពកំចាត់មីននៅកម្ពុជាហៅកាត់ថា ស៊ីម៉ាក។
ឯកឧត្ដម ហេង រតនា អគ្គនាយកស៊ីម៉ាក់ បានថ្លែងថា ចាប់ពីខែមករាដល់ខែកញ្ញា ពោល៩ខែឆ្នាំ២០២០នេះ ស៊ីម៉ាក់រំដោះគ្រាប់មីននិងយុទ្ធភ័ណ្ឌផ្ទុះនៅលើផ្ទៃដីជិត៦០គីឡូម៉ែត្រក្រឡា និងរកឃើញគ្រាប់មីននិងគ្រាប់យុទ្ធភ័ណ្ឌមិនទាន់ផ្ទុះគ្រប់ប្រភេទប្រមាណជាង២ម៉ឺន៨ពាន់គ្រាប់ ហើយបានគំទេចចោលរួចរាល់ជាស្ថាពរ។គ្រាប់មីននិងគ្រាប់យុទ្ធភ័ណ្ឌមិនទាន់ផ្ទុះនេះ ភាគច្រើនត្រូវបានរកឃើញនៅតាមខ្សែបន្ទាត់ព្រំដែននៃប្រភេទកម្ពុជា ដែលសល់ពីអំឡុងពេលកម្ពុជាមានសង្គ្រាមកាលពីសម័យឆ្នាំ១៩៧០រហូតដល់ឆ្នាំ១៩៩៧។
ការរំដោះផ្ទៃដីចេញពីគ្រោះថ្នាក់ដោយសារគ្រាប់យុទ្ធភ័ណ្ឌនេះ ប្រហាក់ប្រហែលនឹងឆ្នាំ២០១៩ដែរ បើធៀបនឹងរយៈពេលដូចគ្នា បើទោះបីកម្ពុជាជួបវិបត្ដិសេដ្ឋកិច្ចដោយសារជំងឺកូវីដ១៩ក៍ដោយ។ជាមួយគ្នានោះដែរ ស៊ីម៉ាក់បានធ្វើសកម្មភាពអប់រំដល់ប្រជាពលរដ្ឋអោយបានយល់ដឹងពីបញ្ហាមីន ដែលមានអ្នកចូលរួមប្រមាណជាង៧០ម៉ឺននាក់ នៅបណ្ដាភូមិគោលដៅរបស់អង្គការស៊ីម៉ាក់។បន្ថែមពីនោះទៀត ស៊ីម៉ាក់ក៍បានហ្វឹកហ៊ឺនវិជ្ជាជីវៈ និងកសាងសមត្ថភាពមន្ដ្រី ព្រោះទាំងហ្វឹកហ៊ឺនដល់សុនកហិតមីន សិក្សាស្រាវជ្រាវបច្ចេកទេសផ្សេងទទួលបានជោកជ័យផងដែរ។
ឯកឧត្ដម ហេង រតនា បានអោយដឹងបន្ដថា ក្នុងអំឡុងពេលកម្ពុជាគ្មានជំងឺកូវីដ១៩ ក្នុងមួយឆ្នាំស៊ីម៉ាក់រុករកឃើញគ្រាប់គ្រប់ភេទក្នុងចន្លោះពី៤ម៉ឺនគ្រាប់ទៅ៥ម៉ឺន ហើយនៅក្នុងឆ្នាំ២០២០នេះ អាចនឹងរុករកឃើញគ្រាប់មីនប្រហាក់ប្រហែលគ្នាដែរ ព្រោះ៩ខែនេះបានជិត៣ម៉ឺនគ្រាប់ហើយ។ឯកឧត្តមអគ្គនាយកស៊ីម៉ាក់ បានបញ្ជាក់ថា ការសំអាតមីននេះ នៅក្នុងអំឡុងជំងឺកូវីដ១៩នេះ មិនបានរាំងស្ទះដល់សកម្មភាពការងារនោះទេ ប៉ុន្តែក្រុមការងារបានជួបប្រទះបញ្ហាប្រឈមមួយចំនួន ដែលបណ្តាលមកពីការព្រួយបារម្ភរបស់ម្ចាស់ជំនួយ ដែលខ្លាចមានការរីករាលដាលអំពីជំងឺកូវីដ១៩ ដល់ក្រុមប្រតិបត្តិការ។ ប៉ុន្តែទោះយ៉ាងនេះក្តី ឯកឧត្តមបញ្ជាក់ថា បន្ទាប់ពីមានការពន្យល់អំពីវិធានការរបស់រាជរដ្ឋាភិបាលក្នុងការប្រយុទ្ធប្រឆាំងនឹងមេរោគនេះ ក្រុមម្ចាស់ជំនួយពួកគាត់បានយល់ និងបន្តគាំទ្រជាបន្តទៀត។សូមបញ្ជាក់ថា រាជរដ្ឋាភិបាលកម្ពុជា បានកំណត់គោលដៅដោយយកឆ្នាំ២០២៥ ជាឆ្នាំដែលកម្ពុជា លែងមានការគំរាមកំហែងដោយសារគ្រាប់មីនប្រឆាំងមនុស្ស។ បើទោះជាយ៉ាងនេះក្តីឯកឧត្តមហេង រតនា ពន្យល់ថា លែងមានការគំរាមកំហែងដោយសារមីន មិនមែនមានន័យថា ស៊ីម៉ាក់បញ្ចប់សកម្មភាពទេ ព្រោះនៅមានយុទ្ធភ័ណ្ឌមិនទាន់ផ្ទុះជាច្រើនទៀតដែលមិនទាន់បានដោះស្រាយ៕
