នាព្រឹកថ្ងៃទី០១ ខែតុលា ឆ្នាំ២០២០នេះ នៅសាលាខេត្តសៀមរាប បានបើកកិច្ចប្រជុំមួយ ដើម្បីទប់ស្កាត់ លុបបំបាត់ និងបង្ក្រាបការកាប់រាន ដុត ឈូសឆាយ និងហ៊ុព័ទ្ធដីព្រៃឈើ ដើម្បីវាតទីយកដីធ្វើកម្មសិទ្ធិរៀងខ្លួនៗ ដែលប្រជាពលរដ្ឋកាន់កាប់ និងអាស្រ័យផលជាក់ស្តែង ក្នុងដែនសមត្ថកិច្ចគ្រប់គ្រងរបស់ក្រសួងកសិកម្ម រុក្ខាប្រមាញ់ និងនេសាទក្រោមអធិបតីភាពឯកឧត្ដម កែវ អូម៉ាលីស្ស ប្រតិភូរាជរដ្ឋាភិបាលកម្ពុជា ទទួលបន្ទុកជាប្រធានរដ្ឋបាលព្រៃឈើ នៃក្រសួងកសិកម្ម រុក្ខាប្រមាញ់ និងនេសាទ និង ឯកឧត្តម ទៀ សីហា អភិបាល នៃគណ:អភិបាលខេត្តសៀមរាប ដោយមានការចូលរួមពីសំណាក់ឯកឧត្តម លោកជំទាវ លោក លោកស្រី ជាប្រតិភូអមដំណើរ អភិបាលរងខេត្ត ថ្នាក់ដឹកនាំមន្ទីរ អង្គភាពនានាក្នុងខេត្ត មន្ត្រីរដ្ឋបាលព្រៃឈើ និង អាជ្ញាធរមូលដ្ឋានជាច្រើននាក់ ។
ឯកឧត្ដម កែវ អូម៉ាលីស្ស ប្រតិភូរាជរដ្ឋាភិបាលកម្ពុជា ទទួលបន្ទុកជាប្រធានរដ្ឋបាលព្រៃឈើ នៃក្រសួងកសិកម្ម រុក្ខាប្រមាញ់ និងនេសាទ មានប្រសាសន៍ថា កិច្ចប្រជុំនេះ គឺក្នុងគោលបំណងជំរុញលើការអនុវត្តនៅសេចក្តីសម្រេចលេខ ២៦៩សសរ .កសក ចុះថ្ងៃទី០៦ ខែកក្កដា ឆ្នាំ២០២០ ស្តីពីការបង្កើតក្រុមការងារចុះស្រាវជ្រាវ និងផ្ទៀងផ្ទាត់ទិន្នន័យដីព្រៃដែលប្រជាពលរដ្ឋកាន់កាប់ និងអាស្រ័យផលជាក់ស្តែង ជាពិសេសដើម្បីប្រមូលទិន្នន័យដែលមានស្រាប់ពាក់ព័ន្ធនឹងការកាន់កាប់ដីរដ្ឋ ស្ថិតក្នុងដែនសមត្ថកិច្ចគ្រប់គ្រង របស់ក្រសួងកសិកម្ម រុក្ខាប្រមាញ់ និងនេសាទ ដូចជា ដីព្រៃសម្បទានសេដ្ឋកិច្ច ដីសហគមន៍ព្រៃឈើ ដីព្រៃសម្បទាន ដីព្រៃមានដីកាដកហូត ដីដាំឈើសហការដៃគូ ដីចម្ការឈើរដ្ឋ និងដីព្រៃលិចទឹក ដោយប្រើយន្តការមានស្រាប់ គឺអនុគណៈកម្មាធិការខេត្ត ដើម្បីទប់ស្កាត់ លុបបំបាត់ និងបង្ក្រាបការកាប់រាន ដុត ឈូសឆាយ និងហ៊ុព័ទ្ធដីព្រៃឈើ ក្នុងគោលបំណងវាតទីយកដីធ្វើកម្មសិទ្ធិផ្ទាល់ខ្លួនកន្លងមក ។
ឯកឧត្ដម កែវ អូម៉ាលីស្ស មានប្រសាសន៍បន្ថែមថា អនុគណៈកម្មាធិការខេត្ត មានមន្ទីរកសិកម្ម រុក្ខាប្រមាញ់ និងនេសាទខេត្ត ជាលេខាដ្ឋានប្រតិបត្តិ លើការងារផ្សព្វផ្សាយអនុវត្តដល់រដ្ឋបាលឃុំ/សង្កាត់ ដើម្បីស្រង់ស្ថិតិប្រជាពលរដ្ឋក្នុងមូលដ្ឋានរបស់ខ្លួន ដែលមានដីអាស្រ័យផលពិតប្រាកដ មានលិខិតបញ្ជាក់ការកាន់កាប់ផ្សេងៗ ដោយភ្ជាប់ឯកសារដែលមានគណៈអភិបាលក្រុង/ស្រុក រាយការណ៍ជូនអភិបាលនៃគណៈអភិបាលខេត្ត ដែលជាប្រធានអនុគណៈកម្មាធិការខេត្ត ហើយប្រធានអនុគណៈកម្មាធិការខេត្ត ធ្វើការបូកសរុបជូនឯកឧត្តមប្រធានគណៈកម្មាធិការជាតិ ដើម្បីឲ្យអគ្គលេខាធិការដ្ឋានប្រតិបត្តិ នៃគណៈកម្មាធិការជាតិ ពិនិត្យនិងវិនិច្ឆ័យទិន្ន័យដែលទទួលបាន ដោយធ្វើចំណាត់ថ្នាក់ទិន្នន័យផ្អែកលើស្ថានភាពទិន្នន័យ ឯកសារភ្ជាប់ និងលិខិតបទដ្ឋានគតិយុត្តមានស្រាប់ជាធរមាន ។
ឯកឧត្តម ទៀ សីហា អភិបាលខេត្តសៀមរាប បានមានប្រសាសន៍ថា បញ្ហានេះ យើងត្រូវអនុវត្តឲ្យបានតឹងរឹងបំផុត ចំពោះសេចក្តីជូនដំណឹងខាងលើនោះ ដើម្បីទប់ស្កាត់ លុបបំបាត់ និងបង្ក្រាបការកាប់រាន ដុត ឈូសឆាយ និងហ៊ុព័ទ្ធដីព្រៃឈើ ដើម្បីវាតទីយកដីរដ្ឋធ្វើជាកម្មសិទ្ធិរបស់ខ្លួន ដូច្នេះសូមឲ្យអាជ្ញាធរគ្រប់លំដាប់ថ្នាក់ រដ្ឋបាលព្រៃឈើ រដ្ឋបាលជលផល ប្រធានមន្ទីរកសិកម្ម រុក្ខាប្រមាញ់ និងនេសាទខេត្ត និងអង្គភាពពាក់ព័ន្ធក្រោមឱវាទទាំងអស់ ត្រូវចាត់ចែងអនុវត្តឲ្យមានប្រសិទ្ធភាពខ្ពស់ ដោយទទួលបានលទ្ធផលល្អប្រសើរ ពិសេសយើងត្រូវតែពន្លឿនក្នុងការដោះស្រាយបញ្ហាវិវាទដីធ្លីនៅតាមស្រុកនីមួយៗ ឲ្យបានរួចរាល់ក្នុងឆ្នាំ២០២១ខាងមុខនោះជាកំហិត ។
ឯកឧត្តម ទៀ សីហា បានបញ្ជាក់បន្ថែមថា ករណីមានវិញ្ញាបនបត្រ ឬប័ណ្ណសម្គាល់សិទ្ធិកាន់កាប់អចលនវត្ថុ ប៉ុន្តែមិនទាន់មានការសម្រេចពីរាជរដ្ឋាភិបាលនៅឡើយនោះ ចំពោះករណីនេះ យើងត្រូវពិនិត្យអត្តសញ្ញាណ និងកិរិយានៃការកាន់កាប់ដីឡើងវិញ ទៅតាមច្បាប់ និងលិខិតបទដ្ឋានគតិយុត្ត ដូចជា អនុក្រឹត្យ បទបញ្ជា សារាចរណែនាំក្នុងករណីមិនសមស្របតាមច្បាប់ និងលិខិតបទដ្ឋានគតិយុត្តដែលមានស្រាប់នៅជាធរមាន នឹងស្នើសុំរាជរដ្ឋាភិបាលនិរាករណ៍ ឬមោឃភាពតាមការចាំបាច់ជាក់ស្តែង គ្មានវិញ្ញាបនបត្រសម្គាល់ម្ចាស់អចលនវត្ថុ ឬប័ណ្ណសម្គាល់សិទ្ធិកាន់កាប់អចលនវត្ថុ ឬប័ណ្ណសម្គាល់សិទ្ធិកាន់ដីធ្លីនោះ ៕
អត្ថបទ និង រូបថត ៖ លោក ស៊ាន សុផាត
កែសម្រួលអត្ថបទ ៖ លោក លីវ សាន្ត
