នៅរសៀលថ្ងៃទី០៧ ខែតុលា ឆ្នាំ២០២០នេះ មជ្ឈមណ្ឌលបណ្តុះបណ្តាលអង្គរ នៃអាជ្ញាជាតិអប្សរា បានបើកវគ្គបណ្តុះបណ្តាលវិជ្ជាសង្រ្គោះបឋម ជូនដល់សិក្ខាកាមចំនួន១២០នាក់ មកពីនាយក ដ្ឋានគ្រប់គ្រងទឹក នាយកដ្ឋានអភិវឌ្ឍន៍ទេសចរណ៍អង្គរ នាយកដ្ឋានអភិរក្សប្រាសាទក្នុងឧទ្យានអង្គរ និងបុរាណវិទ្យាបង្ការ នាយកដ្ឋានអភិរក្សប្រាសាទក្រៅឧទ្យានអង្គរ នាយកដ្ឋានសណ្តាប់ធ្នាប់និងសហប្រតិបត្តិការ និងនាយកដ្ឋានគ្រប់គ្រងព្រៃឈើទេសភាពវប្បធម៌និងបរិស្ថាន។ វគ្គបណ្តុះបណ្តាលនេះដែរមានរយៈពេល១ខែ ចាប់ពីខែតុលា ដល់ខែវិចិ្ឆកា ឆ្នាំ២០២០ វគ្គបណ្តុះបណ្ដាលនេះក៏មានមន្ត្រីជំនាញផ្នែកវិជ្ជាសង្គ្រោះបឋមប្រចាំសាខាកាកបាទក្រហមកម្ពុជាខេត្ត និងគ្រូបង្គោលវិជ្ជាសង្គ្រោះបឋមជំនាន់ទី១ នៃអាជ្ញាធរជាតិអប្សរាដែលជាគ្រូបង្គោលផងដែរ។
កញ្ញា ហ៊រ រិទ្ធារី ប្រធានស្តីទីមជ្ឈមណ្ឌលបណ្តុះបណ្តាលអង្គរ បានឲ្យដឹងថា គោលបំណងនៃវគ្គបណ្តុះបណ្តាលវិជ្ជាសង្រ្គោះបឋម ជូនដល់សិក្ខាកាមទាំង១២០នាក់នៅពេលនេះ គឺដើម្បីបញ្ជ្រាបការយល់ដឹង និងកសាងសមត្ថភាពបុគ្គលិក ភ្នាក់ងារ និងពលករនៃអាជ្ញាធរជាតិអប្សរា ដែលកំពុងបំពេញការងារនៅតាមការដ្ឋាន តំបន់ប្រាសាទ និងក្នុងព្រៃ ដើម្បីបង្ការនិងសង្គ្រោះភ្ញៀវទេសចរ មនុស្សជុំវិញខ្លួនពីគ្រោះថ្នាក់ជាយថាហេតុណាមួយដែលអាចនឹងកើតមានឡើងនៅពេលបំពេញការងារ។
កញ្ញា ហ៊រ រិទ្ធារី បន្ថែមថា សិក្ខាសាលានេះមានរយៈពេល១ខែ ដោយរៀបចំឡើងចំនួន០៦វគ្គ ក្នុង១វគ្គមានសិក្ខាកាមចំនួន២០នាក់ មកពីនាយកដ្ឋានគោលដៅបំពេញការងារសំខាន់ៗក្នុង និងក្រៅតំបន់អង្គរ។ ក្នុងនោះដែរមេរៀនសំខាន់ៗរួមមានមាន៖ តួនាទីអ្នកសង្គ្រោះ គោលការណ៍គ្រឹះ ស្ថានភាពដំណេក សន្លប់ CPR ស្លាក់ លង់ទឹក គ្រោះថ្នាក់ចរាចរណ៍ ការពុល ប្រកាច់ ពស់ចឹក ឆ្កែខាំ របួស ការហូរឈាមគ្រប់ប្រភេទ ការឃាត់ឈាម ការបាក់ឆ្អឹង ការដឹកជញ្ជូន និងករណីផ្សេងៗទៀត។ វគ្គបណ្តុះបណ្តាលនេះ ក៏អនុវត្តន៍ដោយគោរពទៅតាមគោលការណ៍ណែនាំរបស់ក្រសួងសុខាភិបាល ដើម្បីបង្ការជំងឺកូវីដ១៩ដែរ ដើម្បីសុវត្ថិភាពរបស់ក្រុមការងារគ្រប់គ្នា។
បើតាមលោក លិវ ឡន មន្ត្រីជំនាញផ្នែកវិជ្ជាសង្គ្រោះបឋមប្រចាំសាខាកាកបាទក្រហមកម្ពុជា ខេត្តសៀមរាប បានបញ្ជាក់ថា នេះជាលើកទី៥ហើយ ដែលសាខាកាកបាទក្រហមកម្ពុជាខេត្តសៀមរាប បានសហការជាមួយមជ្ឈមណ្ឌលបណ្តុះបណ្តាលអង្គរ រៀបចំវគ្គនេះឡើង។ នេះជាគំនិតដ៏ល្អបំផុត ដើម្បីរួមចំណែកផ្តល់ចំណេះដឹងដល់សិក្ខាកាមទៅតាមចំណេះ និងជំនាញដែលខ្លួនមាន ដើម្បីឱ្យពួកគាត់យកទៅផ្សព្វផ្សាយបន្ត និងប្រើប្រាស់នូវចំណេះដឹងទាំងនេះឱ្យមានប្រយោជន៍ក្នុងការជួយសង្គ្រោះខ្លួនឯង និងមនុស្សជុំវិញខ្លួនប្រកបដោយប្រសិទ្ធិភាពខ្ពស់៕
អត្ថបទ និង រូបភាព៖ ឈិត សាវី
កែសម្រួល៖ អ៊ុន ណារាជ្យ
