នៅព្រឹកថ្ងៃទី០៧ ខែតុលា ឆ្នាំ២០២០នេះ នៅទីស្នាក់ការសាខាកាកបាទក្រហមកម្ពុជាខេត្តសៀមរាប មានបើកវគ្គតម្រង់ទិសការងារ អនុសាខាកាកបាទក្រហកម្ពុជា ក្រុង-ស្រុកទាំង១២ នៃខេត្តសៀមរាប ដោយពិធីនេះប្រព្រឹត្តទៅក្រោមអធិបតិភាព ឯកឧត្តម គុជ លីណា អនុប្រធានគណៈកម្មាធិការសាខាកាកបាទក្រហមកម្ពុជាខេត្ត តំណាងដ៏ខ្ពង់ខ្ពស់ឯកឧត្តម ទៀ សីហា អភិបាល នៃគណៈអភិបាលខេត្ត និងជាប្រធានគណៈកម្មាធិការសាខាកាកបាទក្រហមកម្ពុជា ខេត្តសៀមរាប ដោយពិធីនេះដែរក៏មានការេអញ្ជើញចូលរួមពីសំណាក់លោកលោកស្រី ប្រធាន អនុប្រធានគណៈកម្មាធិការអនុសាខាកាកបាទក្រហមកម្ពុជា ក្រុង-ស្រុកទាំង១២ លោកលោកស្រី ហេរញ្ញិកគណៈកម្មាធិការអនុសាខាក្រុង-ស្រុកទាំង១២ និងមន្ត្រីប្រចាំការអនុសាខាកាកបាទក្រហមកម្ពុជា ក្រុង-ស្រុក ទាំង១២ នៃខេត្តសៀមរាបជាច្រើនរូបផងដែរ។
មានប្រសាសន៍នាឱកាសនោះ ឯកឧត្តម គុជ លីណា បានបង្ហាញ់ថា វគ្គតម្រង់ទិសក្នុងពេលនេះមានរយៈពេល ២ថ្ងៃ គឺចាប់ពីថ្ងៃទី០៧ដល់ថ្ងៃទី០៨ ខែតុលា ឆ្នាំ២០២០ ក្នុងគោលបំណងផ្ដល់នូវការយល់ដឹងបន្ថែមឈានទៅបំពេញភារកិច្ចមនុស្សធម៌បានត្រឹមត្រូវ ពិសេសអនុវត្តន៍តាមយុទ្ធសាស្ត្រនៃវិស័យស្នូលទាំង៤របស់កាកបាទក្រហមកម្ពុជា។ ក្នុងនោះថ្វីត្បិតតែវគ្គបណ្ដុះបណ្ដាលនេះមានរយៈពេលខ្លីពិតប្រាកដមែន តែវាពិតជាមានសារៈសំខាន់ណាស់ សម្រាប់ជួយដល់លោកលោកស្រី ដើម្បីឲ្យបានយល់ដឹងកាន់តែច្បាស់ពី រចនាសម្ព័ន្ធ តួនាទីភារកិច្ច តាំងពីអនុសាខា អ្នកស្ម័គ្រចិត្ត យុវជនកាកបាទក្រហមកម្ពុជា ការងារដ្ឋបាល និងការងារគ្រប់គ្រងថវិការបស់អនុសាខាផងដែរ ហេតុនេះ សូមលោក លោកស្រី ចូលរួមដោយឆន្ទៈ និងមនសិការមនុស្សធម៌ទាំងអស់គ្នា ដើម្បីជាប្រយោជន៍ដល់សមាគមជាតិ និងប្រជាពលរដ្ឋនៅក្នុងសហគមន៍។
ឯកឧត្តម មានប្រសាសន៍បន្ថែមថា ក្នុងនោះដែរ អនុសាខាកាកបាទក្រហមកម្ពុជា ក្រុង-ស្រុកទាំង១២ នៃអាណត្តិទី៥ របស់គណៈកម្មាធិការសាខាសកាកបាទក្រហមកម្ពុជាខេត្តសៀមរាប ដែលត្រូវបានកាកបាទក្រហមកម្ពុជា ចេញសេចក្តីសម្រេចតែងតាំងគណៈកិត្តិយសអនុសាខា និងសេចក្តីសម្រេចទទួលស្គាល់គណៈកម្មាធិការអនុសាខាកាកបាទក្រហមកម្ពុជា ក្រុង-ស្រុកទាំង១២ ត្រូវបានប្រារព្ធពិធីប្រកាលជាឱឡារិក កាលពីថ្ងៃទី០៤ ខែកុម្ភៈឆ្នាំ២០២០ តែដោយសារបញ្ហាជំងឺកូវីដ-១៩ យើងមិនអាចបើកវគ្គនេះបានរហូតមកដល់ពេលនេះ ៕
ព័ត៌មានជាតិ ថ្មីៗ
អត្តបទនិងរូបភាព៖កាកបាទក្រហមកម្ពុជាខេត្តសៀមរាប
