នៅព្រឹកថ្ងៃទី០៨ ខែ តុលា ឆ្នាំ២០២០នេះ គណៈប្រតិភូខេត្តសៀមរាប ដឹកនាំដោយឯកឧត្តម អ៊ឹង ហឿន ប្រធានក្រុមប្រឹក្សាខេត្ត និងលោក នាក់ ណេរ៉ុន អភិបាលរងខេត្ត ដោយមានការចូលរួមពីសំណាក់ ឯកឧត្តម លោកជំទាវសមាជិក សមាជិកាក្រុមប្រឹក្សាខេត្ត អស់លោក លោកស្រីជាថ្នាក់ដឹកនាំមន្ទីរ មន្ត្រីរាជការ និង កងកម្លាំងប្រដាប់អាវុធ អាជ្ញាធរក្រុង ស្រុក ឃុំសង្កាត់ បានចូលរួមគោរពវិញ្ញាណក្ខ័ន្ធ និង ជួយចែករំលែកទុក្ខក្រុមគ្រួសារនៃសពឧត្តមសេនីយ៍ទោ ឈន ធី នាយសេនាធិការរង នៃយោធភូមិភាគទី៤ ដែលបានទទួលមរណៈភាព កាលពីថ្ងៃទី០៦ ខែតុលា ឆ្នាំ២០១៨ ក្នុងជន្មាយុ៦៤ឆ្នាំ ដោយរោគាពាធ ហើយសពត្រូវបានតំកល់ទុកធ្វើទក្ខិណាទាន ទៅតាមប្រពៃណីសាសនានៅគេហដ្ឋាននៃសព ភូមិគ្រួស សង្កាត់ស្វាយដង្គំ ក្រុង ខេត្តសៀមរាប។
តំណាងឲ្យគណៈប្រតិភូខេត្តទាំងអស់ ឯកឧត្តម អ៊ឹង ហឿន បានសម្តែងនូវការសោកស្តាយ ចំពោះការបាត់បង់នូវស្វាមី បីតា ជីតា ដ៏ឧត្តុង្គឧត្តមនៃគ្រួសារដែលប្រកបដោយ ព្រហ្មវិហារធម៌ និង ជាទីស្រឡាញ់របស់គ្រួសារនៃសព ក៏ដូចជាការបាត់បង់វីរៈជនដ៏ឆ្នើម ក្នុងការបញ្ជាដឹកនាំការពារជាតិមាតុភូមិ ដែលមានស្នាដៃក្នុងការបម្រើជាតិមាតុភូមិកម្ពុជា និង បានគោរពវិញ្ញាណក្ខ័ន្ធ រំលែកទុក្ខយ៉ាងក្រៀមក្រំបំផុតជាមួយក្រុមគ្រួសារសពឯកឧត្តមឧត្តមសេនីយ៍ទោ ឈន ធី នាយសេនាធិការរង នៃយោធភូមិភាគទី៤ ។ ក្នុងនោះដែរឯកឧត្តម ក៏បានធ្វើការបួងសួងសូមឲ្យដួងវិញ្ញាណក្ខ័ន្ត របស់ឯកឧត្តមឧត្តមសេនីយ៍ទោ ឈន ធី បានទៅកាន់សុខគតិភពថ្មីកុំបីឃ្លាងឃ្លាតឡើយ ។
នៅក្នុងឱកាសដ៏ក្រៀមក្រំនោះដែរ ឯកឧត្តមឧត្តមសេនីយ៍ឯក ហេង ពៅ មេបញ្ជាការងកងទ័ពជើងគោក និងជាមេបញ្ជាយោធភូមិភាគទី៤ តំណាងឯកឧត្តមនាយឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការកងទ័ពជើងគោក បានធ្វើការបំពាក់ឋានន្តរស័ក្តិជាកិច្ចបច្ឆាមរណៈ ថ្នាក់ឧត្តមសេនីយ៍ទោ ជូនដល់សពឯកឧត្តមឧត្តមសេនីយ៍ទោ ឈន ធី និងបានធ្វើការស្មឹងស្មាតគោរពវិញ្ញាណក្ខន្ត័ និងបូជាទៀនធូក ដើមី្បឧទ្ទិសជូនដល់វិញ្ញាណក្ខ័ន្តរបស់សព ឯកឧត្តមឧត្តមសេនីយ៍ទោ ឈន ធី ព្រមទាំងបានធ្វើការចូលរួមសម្តែង និងចូលរួមរំលែកទុក្ខក្រៀមក្រំ ក្នុងចិត្តដោយឥតឧបមា ក្នុងការបាត់បង់ស្វាមី បីតា ជីតា ដ៏ឧត្តុង្គឧត្តមនៃគ្រួសារដែលប្រកបដោយ ព្រហ្មវិហារធម៌ និង ជាទីស្រឡាញ់របស់គ្រួសារនៃសព ក៏ដូចជាការបាត់បង់វីរៈជនដ៏ឆ្នើម ក្នុងការបញ្ជាដឹកនាំការពារជាតិមាតុភូមិ ដែលមានស្នាដៃក្នុងការបម្រើជាតិមាតុភូមិកម្ពុជា និង បានរួមចំណែកយ៉ាងសកម្មជាមួយរាជរដ្ឋាភិបាលកម្ពុជា ក្នុងទិសដៅបម្រើឧត្តមប្រយោជន៍ជូនជាតិមាតុភូមិ ព្រមទាំងបានលះបង់ កម្លាំងកាយចិត្ត ពេលវេលានៅគ្រប់កាលៈទេសៈ ក្នុងការអភិវឌ្ឍន៍ប្រទេសជាតិមាតុភូមិ ក្នុងមួយជីវិតរបស់ឯកឧត្តម ។
ឯកឧត្តម ក៏បានបញ្ជាក់ថា ទោះបីនៅពេលនេះរូបកាយវិញ្ញាណរបស់ឯកឧត្តមឧត្តមសេនីយ៍ទោ ឈន ធី បានរលត់ចាកឆ្ងាយពីលោកនេះទៅកាន់លោកខាងមុខក្ដី ក៏ប៉ុន្តែចំពោះកិត្តិសព្ទ័ និងកេរ្តិ៍ឈ្មោះរបស់ឯកឧត្តមក៏បានដកជាប់នូវក្នុងក្រអៅបេះដូងរបស់កូនចៅ ថ្នាក់ដឹកនាំ និងយុទ្ធមិត្តរួមអាវុធ ញាតិមិត្តរួមការងារ ដែលធ្វើឲ្យគ្មានថ្ងៃបំភ្លេចបានឡើយ ៕
អត្ថបទ និង រូបភាព៖ គឿន វ៉េត
