ឯកឧត្ដម ផៃ សុខខេង នាយករងខុទ្ធការល័យសម្ដេចពិជ័យសេនា ទៀ បាញ់ និងជាអនុប្រធានក្រុមការងារ ចុះជួយឃុំពាក់ស្នែង ស្រុកអង្គរធំ មានប្រសាសន៍ថា សន្ដិភាពមានសារៈសំខាន់ណាស់ សម្រាប់ប្រជាពលរដ្ឋខ្មែរគ្រប់រូប ព្រោះថា បើគ្មានសន្ដិភាព គ្មានការរីកចំរើន និងការអភិវឌ្ឍន៍ ព្រមទាំងគ្មានការជួបជុំធ្វើបុណ្យកឋិនទាន ដូចពីសម័យខ្មែរក្រហមនោះទេ។ ឯកឧត្តមមានប្រសាសន៍បែបនេះ ក្នុងឱកាសដែលឯកឧត្តម ដឹកនាំក្រុមការងារចូលរួមក្នុងពិធីបុណ្យកឋិនទាន ក្នុងវត្ដប្រាសាទឥន្ទ្ររម្មនី ហៅវត្ដព្រៃព្រះ នៅឃុំពាក់ស្នែង ស្រុកអង្គរធំ ខេត្ដសៀមរាប កាលពីល្ងាចថ្ងៃទី០៧ ខែតុលា ឆ្នាំ២០២០នេះ។
ឯកឧត្ដម ផៃ សុខខេង មានប្រសាសន៍ទៀតថា ក្រោមការដឹកនាំរបស់ប្រមុខរាជរដ្ឋាភិបាល ដែលមានសម្ដេចតេជោ ហ៊ុន សែន នាយករដ្ឋមន្ដ្រី គឺមានការអភិវឌ្ឍស្ទើរគ្រប់ផ្នែក ទាំងវិស័យអាណាចក្រ និងវិស័យពុទុ្ធចក្រផងដែរ។ ជាពិសេសសព្វថ្ងៃនេះ ប្រជាពលរដ្ឋខ្មែរមានការរីកចម្រើនច្រើន និងមានសម្ភារៈប្រើប្រាស់ទំនើបៗ ព្រមទាំងមានថវិកាធ្វើបុណ្យទាននៅតាមវត្ដអារាម ជាក់ស្ដែងប្រជាពលរដ្ឋជាច្រើនរយនាក់ បានរួមគ្នាធ្វើបុណ្យកឋិនទាននៅតាមជនបទនៅឃុំពាក់ស្នែង ស្រុកអង្គរធំនេះជាដើម។ ការធ្វើបុណ្យកឋិនទាននេះ គឺមិនត្រឹមតែបានជួយលើកស្ទួយ និងទ្រទ្រង់វិស័យព្រះពុទ្ធសាសនាអោយកាន់តែរីកចំរើននោះទេ ថែមទាំងបានជួយជ្រោមជ្រែងអោយទីវត្ដអារាម មានការរីកចំរើន តាមរយៈការចូលរួមបច្ច័យកសាងពីពុទ្ធបរិសទ្ធ និងក្រុមកាងារក្រសួងការពារជាតិ។
ឯកឧត្ដម បានបញ្ជាក់បន្ថែមថា ការធ្វើបុណ្យកឋិនកទានរបស់ប្រជាពលរដ្ឋ និងថ្នាក់ដឹកនាំក្រសួងការពារជាតិនេះ ដោយសារកម្ពុជាមានសន្ដិភាពពេញលេញ ដូច្នេះប្រជាពលរដ្ឋគ្រប់រូបត្រូវប្ដេជ្ញាចិត្តការពារសន្ដិភាព ដើម្បីរួមគ្នាបន្តអភិវឌ្ឍន៍ប្រទេសជាតិ ជាពិសេសវិស័យពុទ្ធចក្រនេះ ឲ្យមានកាន់តែរីកចម្រើនបន្ថែមទៀត។ មានសន្ដិភាព មានការកសាងប្រទេសជាតិបាន និងធ្វើឲ្យសេដ្ឋកិច្ចមានការរីកចម្រើន ជាពិសេសធ្វើឲ្យជីវភាពប្រជាពលរដ្ឋកាន់តែល្អប្រសើរ។ ក្នុងឱកាសនោះដែរ ឯកឧត្ដម ក៍បានអំពាវដល់ប្រជាពលរដ្ឋគ្រប់រូប ត្រូវថែរក្សាសុខភាព ដូចជា ត្រូវពាក់ម៉ាស់ លាងដៃនឹងសាប៊ូ លាងទឹកអាល់កុល និងរក្សាគម្លាត តាមការណែនាំរបស់ក្រសួងសុខាភិបាល ដើម្បីចៀសវាងការឆ្លងជំងឺកូវីដ-១៩ ៕
អត្តបទ និង រូបភាព៖ ឈិត សាវី
កែសម្រួល៖ អ៊ុន ណារាជ្យ
