កាលពីរសៀលថ្ងៃទី០៦ ខែតុលា ឆ្នាំ២០២០នេះ ព្រះសង្ឃដែលជាគ្រូសូធ្យ និងជាព្រះចៅអធិការវត្ត និមន្តមកពីបណ្តាទីអារាមផ្សេងៗគ្នា ក្នុងខេត្តសៀមរាប ដឹកនាំដោយ ព្រះគ្រូមុនីបញ្ញាញាណ ស៊ុម ពិសិទ្ធិ ព្រះសមុហ៍គណខេត្ត និងជាព្រះចៅអធិការវត្តប្រាសាទចន្ទរង្សី ហៅវត្តគោកចាន់ ឃុំអំពិល ស្រុកប្រាសាទបាគង បាននិមន្តចុះសួរសុខទុក្ខ និងនាំយកអំណោយមួយចំនួន ជូនដល់គ្រួសារមួយសម្រាលកូនភ្លោះប្រុសទាំងបី កំពុងជួបការលំបាកក្នុងជីវភាពរស់នៅ ស្ថិតក្នុងភូមិស្លែងស្ពាន ឃុំស្លែងស្ពាន ស្រុកស្រីស្នំ ខេត្តសៀមរាប ដែលមានឪពុកឈ្មោះ តឹក តួន អាយុ៣៤ឆ្នាំ និងភរិយាឈ្មោះ រស់ ស្រីម៉ាច អាយុ៣០ឆ្នាំ ទាំង២នាក់ជាកសិករ ដែលទើបសម្រាលបានកូនភ្លោះចំនួន៣នាក់ (ប្រុសទាំង៣) នៅមន្ទីរពេទ្យគន្ឋរបុប្ផាទី៣ ឬមន្ទីរពេទ្យជ័យវរ្ម័នទី៧ ខេត្តសៀមរាប កាលពីថ្ងៃទី០៨ខែសីហា ឆ្នាំ២០២០កន្លងទៅ។ អំណោយដែលបានប្រគល់ជូនរួមមាន៖ អង្ករ៤ការ៉ុង ស្មើនឹង២០០គ.ក្រ មី ត្រីខ ទឹកស៊ីអ៊ិវ ទឹកត្រី ទឹកដោះគោឆៅ ទឹកដោះគោខាប់ ទឹកបរិសុទ្ឋ និងថវិកាចំនួន ១លាន ៣សែន ២ម៉ឹនរៀល។
ព្រះគ្រូមុនីបញ្ញាញាណ ស៊ុម ពិសិទ្ធិ មានថេរដិកាថា បន្ទាប់ពីទទួលបានដំណឹងពីអ្នកជិតខាង និងពីក្រុមការងារនៃសមាគមជីវិត និងក្តីសង្ឃឹម អំពីជីវភាពរស់នៅរបស់គ្រួសារខាងលើ ដោយពួកគាត់កំពុងជួបភាពខ្វះខាតក្នុងជីវភាពប្រចាំថ្ងៃ ទើបព្រះអង្គ និងព្រះចៅអធិការវត្តនានា ក៍បានឯកភាពសហការកៀរគរគ្នា ប្រមូលគ្រឿងឧបភោគបរិភោគដែលប្រមូលសន្សំទុកបានមកពីប្រជាពុទ្ឋបរិស័ទប្រគេនក្នុងពិធីបុណ្យផ្សេងៗ ជាពិសេសក្នុងឱកាសបុណ្យភ្ជុំបិណ្ឌកាលពីពេលថ្មីៗនេះ ដើម្បីយកមកផ្តល់ជូនជួយសម្រាលភាពលំបាក។ ក្នុងនោះការផ្តល់អំណោយ និងសួរសុខទុក្ខ គឺជាការចែករំលែកជួយគ្នាក្នុងគ្រាលំបាកទៅតាមលទ្ឋភាពដែលក្រុមព្រះសង្ឃមាន ព្រោះថា ជារឿយៗព្រះសង្ឃនៃខេត្តសៀមរាប តែងតែបានចូលរួមក្នុងសកម្មភាពសង្គមជាច្រើន ដែលឆ្លុះបង្ហាញឲ្យឃើញថា វិស័យពុទ្ធិចក្រនិងវិស័យអាណាចក្រ ត្រូវបានផ្សាភ្ជាប់ និងមានទំនាក់ទំនងយ៉ាងជិតស្និទ មិនអាចកាត់ផ្តាច់ចេញពីគ្នាបាននោះឡើយ។
ក្នុងឱកាសនោះដែរ ព្រះគ្រូ វិមលសំវរ នឿម វុទ្ធី ព្រះចៅអធិការវត្ត បារាយមហានទីរតនារាម ហៅវត្តស្វាយរមៀត ក៏បានអំពាវនាវដល់ព្រះសង្ឃ និប្រជាពុទ្ឋបរិស័ទ ព្រមទាំងសប្បុរសជនជិតឆ្ងាយសូមជួយឧបត្ថម្ភជាថវិកា ឬគ្រឿងឧបភោគបរិភោគ ដល់ទារកទាំងបីនេះផងទោះតិចក្តីច្រើនក្តីទៅតាមសទ្ឋារៀងៗអង្គ និងរៀងៗខ្លួន។
បើតាមលោក ហ៊ន់ ឫទ្ធិ អភិបាលនៃគណៈអភិបាលស្រុកស្រីស្នំ ខេត្តសៀមរាប បានឲ្យដឹងថា ក្រោយពីគ្រួសារខាងលើសម្រាលកូនភ្លោះទាំងបី កន្លងមករដ្ឋបាលស្រុក និងអនុគណៈកម្មាធិការកាកបាទក្រហមស្រុកបានជូនដំណឹងទៅសាខាកាកបាទក្រហមកម្ពុជាខេត្ត ហើយសាខាកាកបាទក្រហមខេត្ត រួមជាមួយសប្បុរសជនផ្សេងៗ ក៍បាននាំយកនូវថវិកា និងសម្ភារៈមួយចំនួនជូនដល់គ្រួសារខាងលើដែរ ។ ក្នុងនោះពាក់ព័ន្ឋទៅនឹងគ្រួសារសម្រាលបានកូនភ្លោះបីនាក់នេះដែរ អាជ្ញាធរស្រុកបានរៀបចំឯកសារទារកទាំងបី ដាក់ជូនទៅរដ្ឋបាលខេត្ត និងសាខាកាកបាទក្រហមកម្ពុជាខេត្តសៀមរាបរួចរាល់ហើយ ដើម្បីជូនទៅ សម្តេចតេជោ នាយករដ្ឋមន្ត្រី បានជ្រាបផងដែរ ៕
អត្ថបទ និង រូបភាព៖ យូ វង្ស
កែសម្រួល៖ អ៊ុន ណារាជ្យ
