កំណាត់ផ្លូវជាតិលេខ៦ ចាប់ពីចំណុចខាងលិចព្រះរាជដំណាក់ ដល់រវង្វង់មូលផ្លូវបែកទៅព្រលានយន្ដហោះ អន្ដរជាតិខេត្ដសៀមរាប ត្រូវបានពង្រីកនិងកែលំអរជាថ្មី ដោយគ្រោងនឹងរួចរាល់នៅចុងឆ្នាំ២០២១។ នេះបើតាមប្រសាសន៍ ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ដ្រីក្រសួងសាធារណៈការ និងដឹកជញ្ជូន ក្នុងឱកាសឯកឧត្តម ដឹកនាំប្រតិភូក្រុមការងារបច្ចេកទេសចុះពិនិត្យគម្រោងស្ថាបនាហេដ្ឋារចនាសម្ព័ន្ធផ្លូវចំនួន ៣៨ខ្សែ នៅក្នុងក្រុងសៀមរាប កាលពីថ្ងៃទី១៥ ខែវិច្ឆិកា ឆ្នាំ២០២០កន្លងទៅ។
ឯកឧត្តមទេសរដ្ឋមន្ត្រី បានបញ្ជាក់ទៀតថា ការពង្រីកផ្លូវលេខ៦ចាប់ពីចំណុច រង្វង់មូលព្រះរាជដំណាក់ ទៅរង្វង់មូលព្រះបាទជ័យវរ្ម័នទី៧ ផ្លូវបត់ចូលព្រលានយន្តហោះ ពង្រីកជា ៦គន្លង ដោយមាន៣គន្លងទៅ ៣គន្លងមក ទ្រង់ផ្លូវ ២ម៉ែត្រ និងចិញ្ចើមផ្លូវ ៣ម៉ែត្រសងខាង។ កំណាត់ផ្លូវជាតិនេះ កំពង់ចាប់ផ្ដើមសាងសង់ហើយ ដោយថវិកាកម្ចីពីធនាគារអភិវឌ្ឍន៍អាស៊ី ប្រវែងជិត ៦គីឡូម៉ែត្រ ត្រូវបានស្ថាបនាឡើងវិញ ប្រើពេលសាងសង់រយៈមួយឆ្នាំ នេះជាដំណាក់កាលទី២។ ចំពោះដំណាក់កាលទី១ ពីរង្វង់មូលព្រះបាទជ័យវរ្ម័នទី៧ ទៅស្រុកក្រឡាញ់ បានស្ថាបនារួចហើយក្រាលបេតុងកៅស៊ូ (AC) ឡើងវិញ និងដំណាក់កាលទី៣ ពីស្រុកក្រឡាញ់ ទៅក្រុងសិរីសោភណ្ឌ ប្រភេទបេតុងកៅស៊ូ (AC) បានចុះហត្ថលេខារួចហើយជាមួយក្រុមហ៊ុនសាងសង់។
សូមបញ្ជាក់ាថា គម្រោងស្ថាបនាកំណាត់ផ្លូវជាតិលេខ៦ ចាប់ពីចំណុច ព្រះរាជដំណាក់ ដល់រវង្វង់មូលព្រលានយន្ដហោះនេះ គ្រោងបើកការដ្ឋានសាងសង់នៅថ្ងៃទី៣០ ខែវិច្ឆិកា ឆ្នាំ២០២០ខាងមុខ ជាមួយនឹងការប្រកាសដំណើរការស្ថាបនាហេដ្ឋារចនាសម្ព័ន្ធផ្លូវចំនួន៣៨ខ្សែ នៅក្រុងសៀមរាប ក្រោមអធិបតីភាពដ៏ខ្ពង់ខ្ពស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បន្ទាប់ពីត្រូវបានលើកពេលម្ដងរួចមក ដោយសារព្រឹត្តិការណ៍ «០៣ វិច្ឆិកា » ហើយគម្រោងស្ថាបនានេះដែរនឹងត្រូវបញ្ចប់នៅចុងឆ្នាំ២០២១ខាងមុខ។
អត្ថបទ និង រូបភាព៖ ឈិត សាវី
កែសម្រួល៖ អ៊ុន ណារាជ្យ
