នៅព្រឹកថ្ងៃទី០៣ ខែធ្នូ ឆ្នាំ២០២០ អង្គការទស្សនៈពិភពលោកប្រចំាស្រុកក្រឡាញ់ សហការជាមួយអាជ្ញាធរស្រុក តំណាងដោយលោក សុខ ណារ៉េត អភិបាលរងស្រុកក្រឡាញ់ បាននាំយកនូវគ្រឿងឧបភោគបរិភោគ ចែកជូនដល់ ប្រជាពលរដ្ឋក្រីក្រចំនួន ៥០គ្រួសារ មកពីភូមិទាំង០៩ នៃឃុំរោងគោ ស្រុកក្រឡាញ់ ខេត្តសៀមរាប ដើម្បីសម្រួលដល់ជីវភាពប្រចាំថ្ងៃអំឡុងវិបត្តិជំងឺកូវីដ-១៩។
ឆ្លៀតក្នុងឱកាសនោះ តំណាងឲ្យលោកស្រីអភិបាលស្រុក លោក សុខ ណារ៉េត បានអំពាវនាវដល់ប្រជាពលរដ្ឋក្នុងស្រុកក្រឡាញ់ទាំងអស់ ត្រូវផ្អាកការប្រារព្ធកម្មវិធីនានា និងការជួបជុំគ្នានៅតាមទីសាធារណៈ ជាបណ្ដោះអាសន្ន រយៈ ពេល ១៥ថ្ងៃគិតចាប់ពីថ្ងៃទី០១ ខែធ្នូតទៅ។ ជាមួយនោះ ប្រជាពលរដ្ឋដែលទើបវិលត្រឡប់មកក្រៅប្រទេស ត្រូវចូលរួមធ្វើចត្តាឡីស័កឱ្យបានត្រឹមត្រូវគ្រប់ៗគ្នា។
គួរជម្រាបថា ការចែកគ្រឿងឧបភោគបរិភោគនេះ បានរៀបចំដោយរក្សាគម្លាតសុវត្ថិភាព ពាក់ម៉ាស់ និងលាងសម្អាតដៃដោយអាល់កុល ឬជែល ព្រមទាំងបែងចែកទីតាំងចែកជាពីរកន្លែង និងមានប្រជាពលរដ្ឋទទួលក្នុងមួយលើក១៥នាក់។ អំណោយដែលទទួលបានក្នុងមួយគ្រួសារ រួមមាន អង្ករ ២៥គ.ក្រ មី ១កេស ត្រីខ ១យួរ ទឹកស៊ីអ៉ីវ ១យួរ ប្រេងឆា ៥លីត្រ និងម្សៅសាប៊ូ ១កញ្ចប់។
អត្ថបទ៖ លោក សេង ផល្លី
រូបភាព៖ រដ្ឋបាលស្រុកក្រឡាញ់
