មានប្រសាសន៍ក្នុងកម្មវិធីសន្ទនាមតិ កាលពីព្រឹកថ្ងៃទី ០៣ ខែធ្នូ ឆ្នាំ២០២០នេះ លោកវរសេនីយ៍ឯក ជា ហេង នាយការិយាល័យប្រឆាំងការជួញដូរមនុស្ស និងការពារអនីតិជន នៃស្នងការដ្ឋាននគរបាលខេត្តសៀមរាប បានឲ្យដឹងថា ក្នុងឆ្នាំ២០២០នេះ ជំនាញរបស់លោក សហការជាមួយអ្នកពាក់ព័ន្ធ បានចុះបង្រាបទីតាំងជួញដូរផ្លូវភេទខុសច្បាប់ ជ្រកក្រោមស្លាក ម៉ាស្សា កោសជប់ និងបិទអាជីវកម្ម បានរកឃើញមានចំនួន៣ករណី ដែលចំនួននេះ មានការថយចុះមួយករណី បើប្រៀបនឹងឆ្នាំ២០១៩ និង រំដោះជនរងគ្រោះបានចំនួន ០៩ នាក់ ។
លោកវរសេនីយ៍ឯក ជា ហេង បានឲ្យដឹងទៀតថា ចំពោះ៣ករណីដែលលោកបានធ្វើការបង្រ្កាបនោះ គឺឃាត់ខ្លួនជនល្មើស និងបានបញ្ជូនទៅតុលាការ ចំនួន ៣នាក់ ហើយចំពោះជនរងគ្រោះ ទាំង៩នាក់ ក្នុងនោះអនីតិជន ៤នាក់ បានប្រគល់ជូនមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្ត ដើម្បីផ្ដល់សេវាស្ដារសម្បទា ដូចជា ការផ្ដល់ជំនាញវិជ្ជាជីវៈ ជាដើម ។
គួរបញ្ជាក់ថា កាលពីឆ្នាំ២០១៩ ការិយាល័យប្រឆាំងការជួញដូរមនុស្ស និងការពារអនីតិជន បានធ្វើការបង្រ្កាប និងបិទទីតាំងអាជីវកម្ម បង្កប់សេវាកម្មផ្លូវភេទខុសច្បាប់ ក្រោមស្លាក ម៉ាស្សា កោសជប់ បានចំនួន ៤ទីតាំង និងឃាត់ខ្លួនជនបទល្មើស ចំនួន ៥នាក់ ៕
អត្ថបទ ៖ លោកស្រី ហែម បូរ៉ាន្នី
កែសម្រួលអត្ថបទ ៖ លោក លីវ សាន្ត
