នៅព្រឹកថ្ងៃទី០៤ ខែធ្នូ ឆ្នាំ២០២០ រដ្ឋបាលជាតិវិទ្យុ និងទូរទស្សន៍នៃសាធារណរដ្ឋប្រជាមានិតចិន ហៅកាត់ថា NRTA (National Radio and Television Administration) សហការដោយក្រសួងព័ត៌មាន នៃព្រះរាជាណាចក្រកម្ពុជា រៀបចំ សិក្ខាសាលាអនឡាញមួយ ស្ដីពី “ការបង្កើត និងនវានុវត្តន៍កម្មវិធីវិទ្យុ និងទូរទស្សន៍” តាមរយៈប្រព័ន្ធវីដេអូ Zoom ជូនដល់មន្ត្រីនៃក្រសួងព័ត៌មាន តាមបណ្ដារាជធានី-ខេត្តទាំង២៥ សរុបចំនួន៨០រូប ក្រោមអធិបតីភាព ឯកឧត្តម កឹម គុណវឌ្ឍន៍ រដ្ឋលេខាធិកា នៃក្រសួងព័ត៌មាន តំណាង ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាន រួមនិងវត្តមានចូលរួមពីមន្ត្រីជាន់ខ្ពស់ជាច្រើនរូប នៃក្រសួងព័ត៌មានផងដែរ។
ថ្លែងក្នុងពិធីបើកសិក្ខាសាលានោះ ឯកឧត្តម កឹម គុណវឌ្ឍន៍ លើកឡើងថា សិក្ខាសាលានេះ បានបង្ហាញពីចំណងមិត្តភាពរវាងប្រទេសកម្ពុជា-ចិន ក៏ដូចជាសហប្រតិបត្តិការល្អ រវាងវិស័យសោតទស្សន៍ នៃប្រទេសទាំងពីរ។ តាមរយៈសិក្ខាសាលានេះដែរ មន្ត្រីនៃក្រសួងព័ត៌មាន នឹងបានយល់កាន់តែច្បាស់ពីការវិវឌ្ឍនៃបច្ចេកវិទ្យា5G និងឧស្សាហកម្ម 4.0 នៃសាធារណរដ្ឋប្រជាមានិតចិននាពេលបច្ចុប្បន្ន។
ឯកឧត្តម កឹម គុណវឌ្ឍន៍ ក៏បានលើកឡើងពីទំនាក់ទំនងល្អ ពីមួយជំនាន់ទៅមួយជំនាន់ទំនាក់ទំនងរវាងប្រទេសកម្ពុជា និងប្រទេសចិន រហូតក្លាយជាមិត្តដែកថែប។ ក្រោមការដឹកនាំរបស់ ឯកឧត្តម ស៊ី ជីងពីង ប្រធានាធិបតី នៃសាធារណរដ្ឋប្រជាមានិតចិន សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានកត់សម្គាល់ថា កិច្ចសហប្រតិបត្តិការ ខ្សែក្រវ៉ាត់ និងផ្លុវ បានផ្ដល់ផ្លែផ្កាយ៉ាងល្អប្រសើរដល់ប្រទេសនៅក្នុងតំបន់ និងកិច្ចសហការជាសកល ទាំងផ្នែករឹង និងតភា្ជប់ផ្នែកទន់ បានរួមបញ្ចុលក្នុងនយោបាយអភិវឌ្ឍវិនិយោគ ក៏ដូចជាក្នុងវិស័យវប្បធម៌ ព័ត៌មាន និងទូរគមនាគមន៍។ កិច្ចសហប្រតិបត្តិការ ខ្សែក្រវ៉ាត់ និងផ្លុវនេះ ក៏ជាកូនសោរហេដ្ឋារចនាសម្ព័ន្ធដ៏សំខាន់ នៅក្នុងការតភ្ជាប់រវាងប្រទេស និងប្រទេស ប្រជាជន និងប្រជាជន នៃប្រទេសទាំងពីរ។
អ្នកស្រី លាវ យីង (Liu Ying) ប្រធានវិទ្យាស្ថានស្រាវជ្រាវ និងបណ្តុះបណ្តាល នៃរដ្ឋបាលជាតិវិទ្យុ និងទូរទស្សន៍ក៏បានរំលឹកពីវីរភាព របស់សម្ដេច ហ៊ុន សែន កាលខែកុម្ភៈ ឆ្នាំ២០២០កន្លងទៅ ខណៈប្រទេសចិន កំពុងស្ថិតក្នុងស្ថានការណ៍ដ៏លំបាក ក្នុងការប្រយុទ្ធប្រឆាំងនឹងជំងឺកូវីដ-១៩ ដោយសម្ដេចបានធ្វើដំណើរទស្សនកិច្ច មកកាន់ប្រទេសចិន ត្រូវបាន និងជួបសំណេះសំណាល ជាមួយឯកឧត្តមប្រធានាធិបតី ស៊ី ជីងពីង ដែលកាយវិការនេះ ឯកឧត្តមប្រធានាធិបតី ស៊ី ជីងពីងបានវាយតម្លៃថា នេះជាការបង្ហាញឲ្យឃើញពីចំណងមិត្តភាពកាត់ផ្ដាច់មិនបាន ទំនុកចិត្ត រវាងប្រទេសចិន និងកម្ពុជា និងការរួមសុខរួមទុក្ខ ជាមួយគ្នា ដែលជាខ្លឹមសារនៃសហគមន៍រួមវាសនាតែមួយ រវាងចិន និងកម្ពុជា។ ជាការឆ្លើយរវាងទំនាក់ទំនងដ៏ស្មោះស្ម័គ្រនេះ ប្រហែលជាង១ខែក្រោយ រដ្ឋាភិបាលចិន បានបញ្ជូនក្រុមគ្រួពេទ្យជំនាញរបស់ខ្លួន ទៅកាន់រាជធានីភ្នំពេញ ដើម្បីជួយដល់ប្រទេសកម្ពុជា ក្នុងការទប់ទល់នឹងជំងឺឆ្លងកូវីដ-១៩។ មានតែស្ថិតក្នងកាលៈទេសៈ នៃការលំបាកទើបស្គាល់ពីមិត្តភក្តិពិតប្រាកដ ចិននិងកម្ពុជា បានរួមសហប្រត្តិបត្តិការជាក់ស្ដែង នៃទស្សនៈសហគមន៍រួមវាសនាតែមួយ។
តាមបញ្ជាក់របស់ អ្នកស្រី លាវ យីង (Liu Ying) គោលបំណងនៃការរៀបចំសិក្ខាសាលានេះ គឺដើម្បីពង្រឹងទំនាក់ទំនងរវាងប្រទេសចិន និងកម្ពុជា និងភាពជាដៃគូយុទ្ធសាស្ត្រគ្រប់ជ្រុងជ្រោយ នៃប្រទេសទាំងពីរ ឈានដល់កម្រិតថ្មីមួយបន្ថែមទៀត។ ក្នុងនោះដែរ សិក្ខាសាលានេះ ក៏មានគោលបំណង ពង្រីកកិច្ចសហប្រតិបត្តិការរវាងវិទ្យុ និងទូរទស្សន៍របស់ប្រទេសទាំងពីរ ផ្លាស់ប្តូរ ចែករំលែកបទពិសោធន៍ ដែលទទួលបានជោគជ័យ លើការធ្វើសមាហរណកម្មប្រព័ន្ធផ្សព្វផ្សាយ ព្រមទាំងការបង្កើតថ្មី នៃបច្ចេកវិទ្យា 5G ដើម្បីជំរុញការអភិវឌ្ឍវិទ្យុ និងទូរទស្សន៍ឆ្លាតវៃផងដែរ។
ក្នុងការធ្វើបទបង្ហាញ ជូនមន្ត្រីជាន់ខ្ពស់នៃក្រសួងព័ត៌មាន លោក យ៉ាន ចីងស៊ីង (Yan Chengsheng) អគ្គនាយកស្ដីទី នៃនាយកដ្ឋានសហប្រតិបត្តិការអន្តរជាតិ នៃរដ្ឋបាលជាតិវិទ្យុ និងទូរទស្សន៍ បង្ហាញថា ចាប់តាំងពីការបង្កើតរដ្ឋាភិបាលចិន ថ្នាក់ដឹកនាំចិន បានយកចិត្តទុកដាក់ខ្ពស់លើការផ្សព្វផ្សាយ លើវិស័យសំខាន់ចំនួន៣ គឺ ព័ត៌មាន សេវាកម្មអប់រំ និងសេវាកម្មវប្បធម៌។ នាពេលបច្ចុប្បន្ន សម្រាប់ប្រទេសចិន ជាប្រទេសមានស្ថានីយវិទ្យុ និងទូរទស្សន៍ច្រើនជាងគេលើពិភពលោក ទន្ទឹមនោះ ប្រទេសចិន ក៏នឹងរំពឹងថា នឹងហក់ទៅកាន់ចំណាត់ថ្នាក់ទី១ លើទីផ្សារភាពយន្តអាមេរិច នៅពេលខាងមុខ។ សព្វថ្ងៃ ការមើលទូរទស្សន៍អនឡាញ នៅក្នុងប្រទេសចិន មានកើនឡើងគួរឲ្យកត់សម្គាល់ ជាមួយនឹងការរីកចម្រើនៃប្រព័ន្ធផ្សព្វផ្សាយនេះ ព័ត៌មានក្លែងក្លាយជាបញ្ហាចម្បងមួយដែលរដ្ឋាភិបាលចិនបានយកចិត្តទុកដាក់ ដូច្នេះការផ្លាស់ប្ដូរ និងចែករំលែកនៃប្រព័ន្ធផ្សព្វផ្សាយរវាងប្រទេសចិន-កម្ពុជា ក៏នឹងចូលរួមទប់ស្កាត់ និងបន្សាបព័ត៌មានក្លែងក្លាយផងដែរ។
គួរបញ្ជាក់ថា សិក្ខាសាលានេះ ត្រូវបានទទួលការគាំទ្រ និងពិនិត្យតាមដានដោយ ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាន ដែលចាប់ផ្ដើមចាប់ពីថ្ងៃទី០១ ដល់ទី២០ ខែធ្នូ ឆ្នាំ២០២០ និងសិក្សាតាមរយៈប្រព័ន្ធអនឡាញ នៅតាមអង្គភាពរៀងៗខ្លួន។
អត្ថបទ ៖ លោក សេង ផល្លី
