ដង្កូវរុយទាហានខ្មៅ ត្រូវបានប្រទេសជាច្រើនលើពិភពលោក យកមកធ្វើជាចំណីធម្មជាតិរបស់សត្វ និងមានក្រុមហ៊ុនមួយចំនួនផលិតជាអាហាររបស់មនុស្សផងដែរ។ តាមការចុះផ្សាយរបស់ក្រុមហ៊ុន Insect Engineers របស់ប្រទេសហូឡង់ ដង្កូវរុយទាហានខ្មៅ មានជាតិប្រូតេអ៊ីន និងសារធាតុសំខាន់ៗដទៃទៀត សម្រាប់មនុស្សនិងសត្វ ប្រមាណ៤០ ទៅ ៦៥ភាគរយ។
សម្រាប់ខេត្តសៀមរាប ការចិញ្ចឹមរុយទាហានខ្មៅ (BLACK SOLDIER FLY) ជាបទពិសោធន៍ថ្មីមួយសម្រាប់កសិករ ដើម្បីផលិតបានដង្កូវ ធ្វើជាចំណីសត្វសម្រាប់កសិដ្ឋាន ឬលក្ខណៈគ្រួសារ ។
នៅថ្ងៃទី១៩ ខែធ្នូ ឆ្នាំ២០២០ លោក ហេង ណាគ្រី ម្ចាស់កសិដ្ឋានចិញ្ចឹមរុយមួយកន្លែង ស្ថិតនៅភូមិព្រៃធ្លក ឃុំខ្នាត ស្រុកពួក ខេត្តសៀមរាប លើកឡើងថា ផ្តើមចេញពីបញ្ហាជីវភាពក្នុងវិបត្តិកូវីដ-១៩ លោកបានស្រាវជ្រាវមុខរបរថ្មីណាមួយប្លែក ងាយរកទីផ្សារ ប៉ុន្តែការចិញ្ចឹមរុយនេះ មិនមែនថ្មីសម្រាប់ពិភពលោកទេ។
តាមរយៈការចុះផ្សាយរបស់ក្រុមហ៊ុនផលិតអាហារ Crickster របស់ប្រទេស ដេនម៉ាក រុយទាហានខ្មៅ អាចពងបានប្រមាណ៥០០ ពងក្នុងមួយលើក។ កូនដង្កូវ ដែលញាស់ និងមានអាយុកាលគ្រប់គ្រាន់ ទម្ងន់ ១០ គីឡូក្រាម អាចធ្វើជាចំណីសត្វគោមួយក្បាល ដែលផលិតសាច់បាន ១គីឡូក្រាមត្រឡប់មកវិញ។
លោក ហេង ណាគ្រី បង្ហាញថា ការចិញ្ចឹមរុយទាហានខ្មៅ មិនលំបាកក្នុងការរកចំណីឡើយ វារស់ដោយសារតែការជញ្ជក់ទឹកសន្សើម ឬទឹកធម្មតាតែប៉ុណ្ណោះ។ រីឯកូនដង្កូវរបស់វា វាស៊ីតែសំណល់បន្លែផ្លែឈើ ឬសំណល់ផ្ទះបាយជាដើម គឺមិនលំបាកស្វែងរកឡើយ។ វដ្តជីវិតរបស់សត្វរុយទាហានខ្មៅ មានរយៈពេល៤៥ថ្ងៃ ចាប់ផ្តើមពី ពង ញាស់ជាដង្កូវ ការប្តូរភេទពីដង្កូវ ក្លាយជារុយ និងទម្លាក់ពង។ ក្នុងមួយជីវិតសត្វរុយមួយក្បាល វាអាចទម្លាក់ពងបានប្រមាណ ២០ម៉ឺនពង។ ចំពោះតម្លៃ ដង្កូវចំណីសត្វ អាចលក់បានក្នុង១គីឡូក្រាម តម្លៃ៤០០០រៀល ឬស្មើនឹង១ដុល្លារ។ ដោយឡែក ដង្កូវសម្រាប់ធ្វើពូជ មាន ១គីឡូក្រាម តម្លៃ ១០ដុល្លារ ចំណែកឯពងរុយសម្រាប់ធ្វើពូជវិញ មានតម្លៃ ៧០០ដុល្លារ ក្នុង១គីឡូក្រាម។
គិតត្រឹម ខែវិច្ឆិកា ឆ្នាំ២០២០ លោកមានអតិថិជនមកពីបណ្តាខេត្តផ្សេងៗ ប្រមាណជា២០០នាក់ហើយ មកទទួលយកការផ្ទេរចំណេះដឹង អំពីការរៀបចំ និងដំណើរការកសិដ្ឋានចិញ្ចឹមរុយនេះ។
អត្ថបទ និងរូបភាព ៖ លោក ងិន គឹមឡេង
កែសម្រួលដោយ៖ លោក សេង ផល្លី
