ក្រោយដំណើរការជួសជុលយៈពេល៩ខែ គម្រោងជួសជុលប្រាសាទកណ្តាលស្រះស្រង់ ស្ថិតនៅខាងកើតប្រាសាទបន្ទាយក្ដី ខេត្តសៀមរាប គ្រោងនឹងបញ្ចប់នៅបំណាច់ឆ្នាំ២០២០ នេះបើតាមការឲ្យដឹងពី កញ្ញា ម៉េង សុវណ្ណលីលីន បុគ្គលិកបច្ចេកទេសគម្រោង នៃអាជ្ញាធរជាតិអប្សរា នៅថ្ងៃទី២០ខែធ្នូ ឆ្នាំ២០២០។
គួរជម្រាបថា ប្រាសាទកណ្តាលស្រះស្រង់ ត្រូវបានកសាងឡើងក្នុងរាជ្យព្រះបាទជ័យវរ្ម័នទី៧ នៅសតវត្សទី១២ ដែលតំណាងឱ្យភ្នំព្រះសុមេរុ។ មុនដំណើរការជួសជុល ប្រាសាទមានរាងដូចជាចេតិយមួយនេះ ត្រូវបានដួលរលំ និងរងការបាក់បែកយ៉ាងធ្ងន់ធ្ងរ ដោយសារកត្តាធម្មជាតិ។
តាមការបញ្ជាក់របស់ បុគ្គលិកបច្ចេកទេស នៃគម្រោងជួសជុលដដែលនេះ បច្ចុប្បន្នក្រុមការងារ បាននិងបន្តរៀបថ្មភក់រួតទី៧ និងទី៨ចុងក្រោយ នៃប្រាសាទបង្ហើយ ព្រមទាំងរៀបចំកូនទំនប់ សម្រាប់ទប់ជើងទេរ ដើម្បីការពារការរលំសំណង់ប្រាសាទ ក្រោយពេលបញ្ចូលទឹក ជាពិសេសក្រុមការងារបច្ចេកទេស ក៏បានរៀបចំគ្រឹះយ៉ាងរឹងមាំ ដោយប្រើថ្មបាយក្រៀមទាំងអស់នៅផ្នែកខាងក្នុង សម្រាប់ប្រើដែកទាមថ្ពក់ភ្ជាប់រចនាសម្ព័ន្ធថ្មបាយក្រៀមមួយៗ ឱ្យជាប់មាំបានល្អ។
អត្ថបទ និងរូបភាព ៖ លោក បូ សាវី
កែសម្រួលដោយ៖ លោក សេង ផល្លី
