ថ្ងៃទី២១ ខែធ្នូ ឆ្នាំ២០២០ ប្រជាពលរដ្ឋជាង៤០០គ្រួសារ មានលំនៅដ្ឋានលើចំណីដងស្ទឹងសៀមរាប បានបង្ហាញចិត្តសប្បាយរីករាយ បន្ទាប់ពីបានចាប់ឆ្នោត និងពិនិត្យមើលដីលំនៅដ្ឋានថ្មីដោយផ្ទាល់ ទំហំ២០ម៉ែត្រ គុណនឹង៣០ម៉ែត្រ ស្របតាមផែនការដែលបានរៀបចំទុក នៃគណៈកម្មការអន្តរក្រសួង ដើម្បីសិក្សាអនុវត្តគម្រោងស្ថាបនាហេដ្ឋារចនាសម្ព័ន្ធផ្លូវ៣៨ខ្សែ និងការកែលម្អសោភ័ណភាពដងស្ទឹងសៀមរាប ដែលមានសម្តេចពិជ័យសេនា ឧបនាយករដ្ឋមន្រ្តី ទៀ បាញ់ ជាប្រធាន កិច្ចការទាំងនេះត្រូវបានរួមកិច្ចសហការអនុវត្តន៍ដោយ ក្រសួងរៀបចំដែនដី នគរូបនីយកម្មនិងសំណង់ អាជ្ញាធរខេត្ត និងអាជ្ញាធរជាតិអប្សរា។
លោក គង់ ប៊ុនឈឿន ប្រជាពលរដ្ឋភូមិមណ្ឌល៣ នៃចំណុចដីចំណីដងស្ទឹងសៀមរាប ដែលត្រៀមនឹងមករស់នៅលើទីតាំងថ្មីនេះ បានបង្ហាញពីគំនិតវិជ្ជមាន ក្នុងផ្លាស់ទីលំនៅជាលក្ខណៈសហគមន៍បែបនេះ ដែលវាអាចជួយដល់ការប្រកបរបរ លើកស្ទួយជីវភាពគ្រួសាររបស់គាត់ នាពេលអនាគត។
គួរបញ្ជាក់ដែរថា ភូមិធម្មជាតិរុនតាឯកទី១ បានចាប់ផ្តើមរៀបចំឡើងនៅក្នុងអំឡុងឆ្នាំ២០១១ ដោយអាជ្ញាធរជាតិអប្សរា មានប្រជាពលរដ្ឋរស់នៅប្រមាណជាង១០០គ្រួសារ។ ប្រជាពលរដ្ឋទាំងនោះ គឺជាអ្នកស្ម័គ្រចិត្តចាកចេញពីតំបន់ឧទ្យានអង្គរ ហើយបច្ចប្បន្ននេះកំពុងស្ថិតក្នុងជីវភាពនៃការអភិវឌ្ឍមូលដ្ឋានរបស់ខ្លួន និងជាមូលដ្ឋានគោលដៅទេសចរណ៍ធម្មជាតិផងដែរ៕
អត្ថបទ និងរូបភាព ៖ លោក ងិន គឹមឡេង
កែសម្រួលដោយ៖ លោក សេង ផល្លី
