នៅព្រឹកថ្ងៃទី២២ ខែធ្នូ ឆ្នាំ២០២០នេះ ក្រុមការងារសាខាការពារអ្នកប្រើប្រាស់ កិច្ចការប្រកួតប្រជែង និងបង្រ្កាបការក្លែងបន្លំ ខេត្តសៀមរាប បង្ហាញថា ចំណីអាហារចំនួន១៣ប្រភេទ នៅក្នុងផ្សារបន្ទាយស្រី មានទីតាំងនៅភូមិបន្ទាយស្រី ឃុំខ្នារសណ្ដាយ ស្រុកបន្ទាយស្រី ខេត្តសៀមរាប ពុំមានផ្ទុកសារធាតុគីមីហាមឃាត់ និងភាពមិនប្រក្រតីណាមួយឡើយ។
លោក លឹម វុឌ្ឍី អនុប្រធានសាខា លើកឡើងថា ការចុះត្រួតពិនិត្យគុណភាព សុវត្ថិភាព ម្ហូបអាហារនេះ ផ្ដោតទៅលើការរកសារធាតុគីមីហាមឃាត់ ម្ហូបអាហារវេចខ្ចប់ និងមិនវេចខ្ចប់នៅតាមតូបលក់ក្នុងផ្សារ ដោយប្រើឧបករណ៍តេស្តឃីត នៅនឹងទីកន្លែងផ្ទាល់តែម្តង។ ចំណីអាហារ ដែលបានធ្វើតេស្តរួមមាន ស្ពៃជ្រក់, ប្រហុក, សណ្ដែកបណ្ដុះ, តៅហ៊ូ បាញ់កាញ់ ជាដើម។
ទន្ទឹមនោះ ក្រុមមន្រ្តីជំនាញ ក៏បានធ្វើការណែនាំ ដល់អាជីវករក្នុងផ្សារយល់ដឹងពីផលប៉ះពាល់ដោយសារការដាក់សារធាតុគីមីហាមឃាត់ក្នុងចំណីអាហារ និងការអនុវត្តទៅតាមច្បាប់ស្ដីការគ្រប់គ្រងគុណភាព សុវត្ថិភាព លើផលិតផលទំនិញ និងសេវា ព្រមទាំងច្បាប់កិច្ចការពារអ្នកប្រើប្រាស់ ដែលអាចប្រឈមចំពោះមុខច្បាប់ផងដែរ។
សូមជម្រាបថា នៅក្នុងឆ្នាំ២០២០នេះ រយ:កាលកន្លងមក ចំពោះសកម្មភាពរបស់មន្ត្រីសាខាការពារអ្នកប្រើប្រាស់ កិច្ចការប្រកួតប្រជែង និងបង្រ្កាបការក្លែងបន្លំខេត្តសៀមរាប បានចុះទៅតាមទីផ្សារនានា ដើម្បីស្វែងរកភាពមិនអនុលោមផ្នែកសុវត្ថិភាពម្ហូបអាហារ បានចំនួន ១៨លើក និងដកហូតបានទំនិញមានភាពមិនប្រក្រតី បានទម្ងន់ជិត១២០ គ.ក ដែលចំនួននេះ មានការថយចុះជាងឆ្នាំ២០១៩៕
អត្ថបទ និងរូបភាព ៖ លោក ស៊ាន សុផាត
កែសម្រួលដោយ៖ លោក សេង ផល្លី