ព្រលានយន្ដហោះអន្តរជាតិថ្មីក្នុងខេត្តសៀមរាប ដំណើរការសាងសង់បានជាង៣០ភាគរយ និងគ្រោងបញ្ចប់នៅឆ្នាំ២០២៣
ទោះបីប្រទេសកម្ពុជា នៅបន្តរងផលប៉ះពាល់ដោយសារវិបត្ដិកូវីដ-១៩ ប៉ុន្តែគម្រោងសាងសង់អាកាសយានដ្ឋានអន្ដរជាតិសៀមរាប-អង្គរ នៅតែមានដំណើរការយ៉ាងមមាញឹកដដែល និងសម្រេចបានជាង៣០ភាគរយហើយ នេះបើតាមការបញ្ជាក់របស់ ឯកឧត្ដម ស៊ីន ចាន់សិរីវុត្ថា អ្នកនាំពាក្យរដ្ឋលេខាធិការដ្ឋាន នៃអាកាសចរស៊ីវិលកម្ពុជា នៅព្រឹកថ្ងៃទី២៣ ខែធ្នូ ឆ្នាំ២០២០នេះ។
ឯកឧត្ដម ស៊ីន ចាន់សិរីវុត្ថា បង្ហាញឲ្យដឹងទៀតថា មកដល់ពេលនេះក្រុមហ៊ុនអភិវឌ្ឍន៍របស់ប្រទេសចិន AIAI(Angkor International Airport Investment) កំពុងបង្កើនសកម្មភាពការងារទាំងថ្ងៃទាំងយប់ លើគម្រោងធំៗចំនួន៣ រួមមាន សំណង់អគារ សំណង់ ពាក់ព័ន្ធនឹងការចុះចតយន្ដហោះ និងសំណង់ផ្សេងៗ ដែលពាក់ព័ន្ធនឹងសេវាកម្មរបស់អាកាសយានដ្ឋាន។
គួររំលឹកថា គម្រោងសាងសង់អាកាសយានដ្ឋានអន្ដរជាតិសៀមរាប-អង្គរ ត្រូវបានសិក្សាប្លង់មេរួចរាល់កាលពីឆ្នាំ២០១៦ និងចាប់ផ្ដើមសាងសង់កាលពីពាក់កណ្ដាលខែមីនា ឆ្នាំ២០២០ លើផ្ទៃដីប្រមាណ៧០០ហិកតា ស្ថិតនៅឃុំពពេល ស្រុកសូទ្រនិគម ខេត្ដសៀមរាប។
អត្ថបទ និងរូបភាព ៖ លោក បូ សាវី
កែសម្រួលដោយ៖ លោក សេង ផល្លី
