នៅព្រឹក ថ្ងៃទី២២ ខែធ្នូ ឆ្នាំ២០២០ ឯកឧត្តម រដ្ឋមន្រ្តី ខៀវ កាញារីទ្ធ រដ្ឋមន្រ្តី ក្រសួងព័ត៌មាន បានជំរុញ ឲ្យមានកិច្ច សហប្រតិបត្តិការគ្នា កាន់តែជិតស្និតបន្ថែមទៀត នៅគ្រប់ផ្នែកពាក់ពន្ធ័ទាំងអស់ ទាំងក្នុងក្រសួងព័ត៌មាន និង ក្រសួងសេដ្ឋកិច្ច និងហិរញ្ញវត្ថុ ដើម្បីផ្លាស់ប្តូរប្រព័ន្ធផ្សាយទូរទស្សន៍ ពី អានណាឡូក(Analog) ទៅ ឌីជីថល(Digital) ដែលវាជាប្រយោជន៍ដ៏សំខាន់ សម្រាប់ព្រះរាជាណាចក្រកម្ពុជាធ្វើជាម្ចាស់ផ្ទះ ការប្រកួតកីឡាស៊ីហ្គេមឆ្នាំ២០២៣។
នេះបើតាមប្រសាសន៍ របស់ឯកឧត្តមរដ្ឋមន្រ្តី នៅក្នុងកិច្ចប្រជុំម្ចាស់ភាគហ៊ុនលើកទី៥ និងកិច្ចប្រជុំក្រុមប្រឹក្សាភិបាលលើកទី៤ របស់ក្រុមហ៊ុន ខេមបូឌា ឌីជីថល ធីវី ខូអិលធីឌី តាមប្រព័ន្ធអនឡាញ។
កិច្ចប្រជុំនាឱកាសនេះ មានវត្តមានអញ្ជើញចូលរួមពី ឯកឧត្តម អៀង ស៊ុនលី អនុរដ្ឋលេខាធិការក្រសួង សេដ្ឋកិច្ច និង ហិរញ្ញវត្ថុ ហើយសម្រាប់ប្រធានបទនៃកិច្ចប្រជុំនេះ បានផ្តោតសំខាន់លើការត្រួតពិនិត្យ និងអនុម័តសេចក្តីស្នើផ្លាស់ប្តូរសមាសភាព ក្រុមប្រឹក្សាភិបាល ការពិភាក្សា និងសិក្សាគ្នាស្តីពីសមិទ្ធិផល លទ្ធភាពសម្រេចឈានចូលប្រព័ន្ធ ឌីជីថល ដោយប្រើប្រាស់បច្ចេកវិទ្យា DTMB+5G វិស័យសោតទស្សន៍ ។ តាមរយៈនេះ ខាងភាគី ទូរទស្សន៍ ខេត្ត យូណាន ប្រទេសចិន បានប្រគល់សម្ភារះឧបករណ៍ គ្រប់គ្រងការផ្សាយ MCR សម្រាប់ប៉ុស្តី ឌីជីថល CDTV និង TVK បង្កើតរួមគ្នា ជូនដល់ទូរទស្សន៍ជាតិកម្ពុជា ។
កិច្ចប្រជុំនេះដែរ ក៏បានលើកឡើងពីផែនការសកម្មភាពការងារសំខាន់ៗនានាជាច្រើន ទាំងលើផ្នែករកប្រាក់ចំណូល-ពង្រីកអាជីវកម្ម ផ្អែកលើគុណសម្បត្តិ ការពង្រីកវិសាលភាព និង គុណភាពនៃការផ្សព្វផ្សាយ -ជំរុញការសាងសង់ហេដ្ឋារចនាសម្ព័ន្ធឌីជីថល ជាដើម។ ទិស ដៅថ្មី៖ ប្រទេសចិន នឹងជួយប្រទេសកម្ពុជា ក្នុងការបណ្តុះបណ្តាលផ្នែកបច្ចេកទេស -ពង្រីកបន្ថែម ប្រព័ន្ធ 4K ដើម្បីត្រៀមកីឡាស៊ីហ្គេម ២០២៣-ទិញកម្មសិទ្ធបញ្ញា រឿង និងបកប្រែរឿង-គំរោងបង្កើតកម្មវិធី ថ្មី អប់រំ រវាងកម្ពុជា-ចិន -សាកល្បងប្រព័ន្ធ 5G ។ ទន្ទឹមនោះ ភាគីចិន ក៏នឹងបន្តជួយជំរុញ កិច្ចសហប្រតិបត្តិការ លើវិស័យ ទូរទស្សន៍ ពងឹ្រងពងី្រកកិច្ចសហប្រតិបត្តិការវិស័យព័ត៌មាន ចិន និងកម្ពុជា ជួយកសាងផ្លូវ ស្ពាន ការទំនាក់ទំនងមេគង្គ -ឡានឆាង និងសមគមន៍វាសនាតែមួយ ចិននិងកម្ពុជា៕
អត្ថបទ និងរូបភាព ៖ ក្រសួងព័ត៌មាន
