នៅថ្ងៃទី២១ ខែធ្នូ ឆ្នាំ២០២០ ២០២០ ឯកឧត្តម ទៀ សីហា អភិបាលខេត្តសៀមរាប ចុះពិនិត្យការរៀបចំហេដ្ឋារចនាសម្ព័ន្ធដីលំនៅដ្ឋានថ្មី ស្ថិតក្នុងភូមិធម្មជាតិរុនតាឯក ឃុំរុនតាឯក ស្រុកបន្ទាយស្រី ខេត្តសៀមរាប ដើម្បីប្រគល់ជូនប្រជាពលរដ្ឋ ដែលបានស្ម័គ្រចិត្តរុះរើលំនៅដ្ឋាន ជាប្រភេទសំណង់មិនរៀបរយចាស់ នៅតាមដងស្ទឹងសៀមរាប។
តាមការរបាយការណ៍របស់អាជ្ញាធរខេត្ត ប្រជាពលរដ្ឋ ដែលបានចូលរួមចាប់ឆ្នោត និងផ្តិតមេដៃឯកភាពទទួលយកដីលំនៅដ្ឋានថ្មី កាលពីថ្ងៃទី១៩ ខែធ្នូ ឆ្នាំ២០២០ ក្នុងបរិវេណសាលាខេត្តសៀមរាប មានចំនួន ៤០៥គ្រួសារ ស្មើនឹងជិត ៩៥ភាគរយ នៃចំនួនសរុប ៤៣០គ្រួសារ។
លោកស សុខ ថុល នាយករដ្ឋបាលសាលាខេត្ត លើកឡើងថា ការស្ម័គ្រចិត្តរុះរើលំនៅដ្ឋាននៅតាមដងស្ទឹងសៀមរាបនេះ គឺជាការចូលរួម ជាមួយរាជរដ្ឋាភិបាល ក៏ដូចជាអាជ្ញាធរខេត្ត ដើម្បីធ្វើឲ្យសោភណ្ឌភាពនៅតាមដងស្ទឹងសៀមរាប ចាប់ពីចំណុចស្ពាននាគ ដល់ស្ពានអង្គរ ក្នុងក្រុងសៀមរាប ជារួមដងស្ទឹងសៀមរាប កាន់តែមានភាពទាក់ទាញ និងស្រស់បំព្រង ស្របនឹងគម្រោងស្ថាបនាហេដ្ឋារចនាសម្ព័ន្ធផ្លូវ៣៨ខ្សែ ដែលជាសមិទ្ធផលមិនអាចកាត់ថ្លៃបាន នៃខេត្តទេសចរណ៍ប្រវត្តិសាស្ត្ររបស់កម្ពុជាមួយនេះ។
ព័ត៌មានជាតិ ថ្មីៗ
ក្នុងឱកាសនោះ ឯកឧត្តមអភិបាលខេត្ត បានពិនិត្យ ការបោះបង្គោលព្រំ ការដាក់លេខដីឡូតិ៍.ការរៀបចំប្រព័ន្ធភ្លើង អណ្តូង និងបង្គន់អនាម័យជាដើម និងបានណែនាំដល់ក្រុមការងារបច្ចេកទេស ត្រូវបំពេញការងារប្រកបដោយការយកចិត្តទុកដាក់ខ្ពស់ ដើម្បីផ្ដល់ភាពងាយស្រួលដល់ប្រជាពលរដ្ឋ ដែលទើបមករស់នៅ។
គួរជម្រាបថា ដីលំនៅដ្ឋាន ដែលប្រជាពលរដ្ឋ ក្នុងមួយគ្រួសារនឹងទទួលបាន មានទំហំ២០ម៉ែត្រ គុណនឹង ៣០ម៉ែត្រ លើផ្ទៃដីសរុប៨៥ហិចតា និង មានចម្ងាយប្រមាណ២២គីឡូម៉ែត្រ ពីក្រុងសៀមរាប។
អត្ថបទ និងរូបភាព ៖ លោក យូ វង្ស
កែសម្រួលដោយ៖ លោក សេង ផល្លី
