ក្រសួងបរិស្ថាន នឹងចាត់វិធានការចំពោះជនណា ដែលធ្វើអាជីវកម្មលើដើមកេសរកូលព្រៃ ឬហៅថា ដើមអ័រគីដេព្រៃរបស់កម្ពុជា ដែលឈានទៅដល់កម្រិតបំផ្លិចបំផ្លាញដោយមិនមានការយោគយល់ឡើយ នេះបើតាមការបញ្ជាក់របស់ ឯកឧត្ដម នេត្រ ភក្រា រដ្ឋលេខាធិការ និងជាអ្នកនាំពាក្យក្រសួងបរិស្ថាន ក្នុងដំណើរទស្សនៈកិច្ចទៅកាន់មជ្ឈមណ្ឌលស្រាវជ្រាវ និងអភិរក្សកេសរកូលសុខអានភ្នំគូលេន ស្ថិតនៅភូមិស្រះខ្វាវ ឃុំ ត្បែង ស្រុកបន្ទាយស្រី ខេត្ត សៀមរាប កាលពីពីថ្ងៃទី១៩ ខែធ្នូ ឆ្នាំ២០២០។
យោងតាម ច្បាប់ស្តីពីតំបន់ការពារធម្មជាតិ មាត្រា៥៩ ត្រង់ចំណុ ច៣និង៤ បានចែងថា ការដឹកជញ្ជូននិងប្រមូលផលអនុផលធនធានធម្មជាតិដោយគ្មានការអនុញ្ញាត និងប្រមូលសន្និធិផលអនុផលធនធានធម្មជាតិ ដោយគ្មានការអនុញ្ញាត នឹងត្រូវទទួលការពិន័យអន្តរការណ៍ជាប្រាក់ពី១លានរៀល(១.០០០.០០០រៀល) ដល់១០លានរៀល ឬត្រូវធ្វើការជួសជុលស្តារការខូចខាត និងរឹបអូសវត្ថុតាងជាសម្បត្តិរដ្ឋ។ ចំណែក មាត្រា៦១ ចំណុច៤ បានចែងថា ការកាប់ ចង រឹត គាស់រម្លឹង កាប់រំលំ ប្រមូល បំផ្លាញ រុករាន និងធ្វើសន្និធិរុក្ខជាតិដែលកំពុងរងគ្រោះថ្នាក់ ឬមានដោយកម្រ និងជិតផុតពូជ ដែលបានកំណត់ដោយប្រកាសក្រសួងបរិស្ថាន នឹងត្រូវផ្តន្ទាទោស ជាបទល្មើសធនធានធម្មជាតិថ្នាក់ទី៣ ដែលអាចជាប់ពន្ធនាគារពី១ឆ្នាំ ទៅ៥ឆ្នាំ និង ឬ ទោសពិន័យជាប្រាក់ពី ១៥លានរៀល ដល់១៥០លានរៀល។
ឯកឧត្ដម នេត្រ ភក្រា លើកឡើងថា កេសរកូលព្រៃ គឺជាធនធានធម្មជាតិដ៏កម្រ និងជាកម្មសិទ្ធិរបស់កម្ពុជា ដែលចាំបាច់ត្រូវថែរក្សាការពារនិងអភិរក្ស។ ការហាមឃាត់ ឬការទប់ស្កាត់ការធ្វើអាជីវកម្មកេសរកូលនេះ ក៏ធ្វើឡើងស្របពេល ដែលអ្នកជំនាញ បាននិងកំពុងធ្វើការសិក្សា រកចំនួនប្រភេទកេសរកូលព្រៃ ដែលមានវត្តមាននៅកម្ពុជា ឲ្យបានច្បាស់លាស់ ដើម្បីចងក្រងជាឯកសារ និងប្រកាសជាកម្មសិទ្ធបញ្ញារបស់ប្រទេសកម្ពុជាតែម្ដង។
ឯកឧត្ដម រដ្ឋលេខាធិការ អំពាវនាវដល់ប្រជាពលរដ្ឋទាំងអស់ សូមកុំចាញ់បោកជនខិលខូច ដែលមានបំណងបំផ្លាញសម្បត្តិធម្មជាតិកម្រ របស់ព្រះរាជាណាចក្រកម្ពុជា។ ព្រោះការប្រមូល ឬធ្វើអាជីវកម្មដើមកេសរកូលព្រៃដោយខុសច្បាប់នេះ វានឹងធ្វើឲ្យប្រភេទកេសរកូលព្រៃរបស់កម្ពុជា ឈានដល់ការផុតពូជ ឬក្លាយជាកម្មសិទ្ធរបស់ប្រទេសដទៃ។
អត្ថបទ និងរូបភាព ៖ លោក បូ សាវី
កែសម្រួលដោយ៖ លោក សេង ផល្លី
