នៅថ្ងៃទី២០ ខែធ្នូ ឆ្នាំ២០២០ កងវិស្វកម្មតេជោ ហ៊ុនសែន-សៀមរាប បាននិងកំពុងស្ថាបនាផ្លូវចំនួន២ខ្សែ នៃផ្លូវចំនួន៨ខ្សែ ស្មើនឹង២០គីឡូម៉ែត្រ ទទួលបានពីការបែងចែក នៃគម្រោងសាងសង់ហេដ្ឋារចនាសម្ព័ន្ធផ្លូវ៣៨ខ្សៃ ក្នុងក្រុងសៀមរាប ដែលគិតមកដល់ពេលនេះ ជាជំហានដំបូង ក្នុងការពង្រឹងគ្រឺះផ្លូវ ដើម្បីធានាបាននូវគុណភាព ស្របតាមបច្ចេកទេស។
លោក ម៉េង ប៉ូគាំង តំណាងផ្នែកប្រតិបត្តិមុខព្រួញការដ្ឋាន របស់កងវិស្វកម្មតេជោ ហ៊ុនសែន-សៀមរាប បង្ហាញថា ការស្ថាបនាជំហានដំបូងលើកំណាត់ផ្លូវ២ខ្សែ( EN04 និង EN05 ) នេះ ក្រុមការងារបានប្រើប្រាស់គ្រឿងចក្រជាច្រើនប្រភេទប្រមាណជាង៧០គ្រឿង ដោយកាយដីចាស់លើចំណីផ្លូវចេញ និង ចាក់បំពេញជំនួស ដោយដីគ្រួសក្រហម និងធ្វើការកិនបង្ហាប់ ដើម្បីពង្រឹងគ្រឹះផ្លូវ ធានាដល់ការដឹកជញ្ជូននាពេលអនាគត។
យោងតាមចំណាត់ការរបស់នាយឧត្តមសេនីយ៍ ខេង សុមេធ មេបញ្ជាការកងវិស្វកកម្មតេជោ ហ៊ុនសែន-សៀមរាប បានបញ្ជាក់ថា ការដ្ឋានផ្លូវ២ខ្សែ ក្នុងចំណោមផ្លូវសរុប ៨ខ្សែ គឺស្ថិតលើវិធីសាស្រ្ត នៃការថ្លឹងតុល្យភាព រវាងការដ្ឋានដែលត្រូវដំណើរការ ជាមួយនឹងតម្រូវការប្រើប្រាស់ចរាចរណ៍លើដងផ្លូវ បើសិនជាមានដំណើរការទាំង៨ការដ្ឋាន រួមទាំងប្រតិបត្តិការការដ្ឋាន របស់បណ្តាអង្គភាពផ្សេងទៀតនោះ ចរាចរណ៍ក្នុងក្រុងសៀមរាបនឹងត្រូវកកស្ទះ។
គួររំលឹកថា កាលពីថ្ងៃទី១៤ ខែធ្នូ ឆ្នាំ២០២០ ឯកឧត្តមទេសរដ្ឋមន្រ្តី បានណែនាំដល់ ក្រុមការងារស្ថាបនា សាងសង់ផ្លូវទាំងអស់ ត្រូវដាក់ស្លាកបញ្ជាក់ពីម្ចាស់គម្រោង និងអ្នកសាងសង់តាមស្តង់ដា ដើម្បីឱ្យប្រជាពលរដ្ឋ និងភាគីពាក់ព័ន្ធបានដឹង និងត្រូវរក្សាសណ្តាប់ធ្នាប់ឱ្យមានរបៀបរៀបរយ បញ្ចៀស និងសម្រួលចរាចរណ៍កុំឱ្យមានការកកស្ទះ ក្នុងក្រុមការងារស្ថាបនា ត្រូវពាក់ឯកសណ្ឋានឱ្យបានសមរម្យ និងប្រើប្រាស់សម្ភារបច្ចេកទេសសុវត្ថិភាពឱ្យបានខ្ជាប់ខ្ជួនក្នុងពេលសាងសង់។
គួរជម្រាបដែរថា រចនាសម្ព័ន្ធផ្លូវទាំង៣៨ខ្សែនេះ ត្រូវបានបែងចែកជាបួន ប្រភេទរួមមាន៖
– ប្រភេទទី១ ជាផ្លូវស្ថិតក្នុង តំបន់ភ្ញៀវទេសចរធ្វើដំណើរច្រើន និងមានកម្រាលផ្លូវល្អ ត្រូវជួសជុលដោយអ៊ុតក្រាលបេតុងកៅស៊ូ AC កម្រាស់៥សង់ទីម៉ែត្រឡើងវិញ
– ប្រភេទទី២ ជាផ្លូវស្ថិតក្នុងតំបន់ភ្ញៀវទេសចរធ្វើដំណើរច្រើន និងមានកម្រាលផ្លូវមិនល្អ ត្រូវសាងសង់ថ្មី ដោយចាក់ក្រាលបេតុងសរសៃដែកកម្រាស់២០សង់ទីម៉ែត្រ រួចក្រាលបេតុងកៅស៊ូ AC កម្រាស់៧សង់ទីម៉ែត្រពីលើ
– ប្រភេទទី៣ ជាផ្លូវមិនស្ថិតនៅតំបន់មានភ្ញៀវទេសចរ ធ្វើ ដំណើរច្រើន នឹងត្រូវសាងសង់ថ្មី ដោយចាក់ក្រាលបេតុងសរសៃដែកកម្រាស់២០សង់ទីម៉ែត្រ
– និងប្រភេទទី៤ ជាផ្លូវវាងក្រុង ដោយកំណាត់ផ្លូវដែលមានតួផ្លូវនៅល្អ នឹងត្រូវជួសជុលអ៊ុតក្រាលបេតុងកៅស៊ូ AC ឡើងវិញ ចំណែកកំណាត់ផ្លូវដែលមានតួផ្លូវមិនល្អ នឹងត្រូវសាងសង់ថ្មី ដោយចាក់ក្រាលបេតុងសរសៃដែក កម្រាស់២៥សង់ទីម៉ែត្រ។
អត្ថបទ និងរូបភាព ៖ លោក ងិន គឹមឡេង
កែសម្រួលដោយ៖ លោក សេង ផល្លី
