ឯកឧត្តម លីវ សុខុន ទីប្រឹក្សានៃក្រសួងព័ត៌មាន និងជាប្រធានមន្ទីរព័ត៌មានខេត្តសៀមរាប បានមានប្រសាសន៍ថា ដើមឆ្នាំ២០២០ នៃការកើតឡើងដំបូងនៃវិបត្តិកូវីដ-១៩នៅកម្ពុជា ព័ត៌មានមិនពិត បានបង្កឲ្យមានភាពតក់ស្លុតនៅក្នុងមជ្ឈដ្ឋានប្រជាពលរដ្ឋ ហើយអ្វីដែលអាចប្រសើរឡើងវិញ គឺការអំពាវនាវរបស់រាជរដ្ឋាភិបាល និងការទទួលស្គាល់ក្រសួងសុខាភិបាល ថាជាប្រភពច្បាស់ការ សម្រាប់ព័ត៌មានស្តីអំពីស្ថានភាពកូវីដ-១៩ ហេតុនេះ ក្នុងស្ថានភាពបច្ចុប្បន្ននេះ តួនាទី-ភារកិច្ចរបស់អ្នកសារព័ត៌មាន ពិតជាមានសារៈសំខាន់ ចំពោះការចូលរួមប្រឆាំងទប់ស្កាត់វិបត្តិកូវីដ-១៩។ ឯកឧត្តម លីវ សុខុន មានប្រសាសន៍យ៉ាងដូច្នេះ ក្នុងឱកាសបើកសិក្ខាសាលាស្តីពី តួនាទី ភារកិច្ច និងការពង្រឹងសមត្ថភាពផ្នែកទំនាក់ទំនងព័ត៌មាន ជូនដល់មន្ត្រីព័ត៌មាន និងអ្នកសារព័ត៌មានមកពីអង្គភាពស្ថាប័ននានាក្នុងខេត្ត ចំនួនជាង៣០រូប នៅមន្ទីរព័ត៌មានខេត្តសៀមរាប នាព្រឹកថ្ងៃទី០៩ ខែកុម្ភៈ ឆ្នាំ២០២១នេះ ។
ឯកឧត្តម លីវ សុខុន មានប្រសាសន៍បន្ថែមថា គោលបំណងសំខាន់នៃសិក្ខាសាលានេះ គឺពិភាក្សាជាមួយអ្នកពាក់ព័ន្ធទាំងអស់ ក្នុងការប្រមូលធាតុចូល និងការចែករំលែកនូវបទពិសោធន៍ ជុំវិញការប្រតិបត្តិការការងាររៀងៗខ្លួន នៃស្ថាប័នពាក់ព័ន្ធ ដោយពិនិត្យពិភាក្សាលើលទ្ធផលសម្រេចបាន រយៈពេលកន្លងមក រួមមាន ចំណុចវិជ្ជមាន អវិជ្ជមាន បញ្ហាប្រឈម ដំណោះស្រាយ និងសំណូមពរ ដើម្បីពង្រឹងសមត្ថភាពដល់អ្នកសារព័ត៌មាននៅក្នុងខេត្តសៀមរាប ។
ឯកឧត្តម លីវ សុខុន រំពឹងថា តាមរយៈនៃសិក្ខាសាលានេះ នឹងធ្វើឲ្យអ្នកព័ត៌មានយើង បានយល់ដឹងកាន់តែច្បាស់បន្ថែមទៀត អំពីតួនាទី និងភារកិច្ចរបស់អ្នកសារព័ត៌មាន , ការពង្រឹងសមត្ថភាពផ្នែកទំនាក់ទំនងព័ត៌មាន , ការស្វែងយល់អំពីអត្ថបទព័ត៌មានស្តង់ដារ និងស្របតាមវិជ្ជាជីវ: និង ការចូលរួមមតិយោបល់របស់អ្នកសារព័ត៌មាន ជាពិសេសការគោរពច្បាប់ក្រមសីលធម៌វិជ្ជាជីវៈអ្នកសារព័ត៌មាន និង ការបង្ខិតឲ្យជិតគ្នាស៊ីសង្វាក់ ធ្វើការជាមួយគ្នារវាងអាជ្ញាធរខេត្ត មន្ទីរព័ត៌មានខេត្ត និងអ្នកសារព័ត៌មាន គ្រប់និន្នាការទាំងអស់ក្នុងខេត្តសៀមរាប ។
ព័ត៌មានជាតិ ថ្មីៗ
ក្នុងឱកាសនោះដែរ ឯកឧត្តម មឿន ឈានណារិទ្ធ ទីប្រឹក្សានៃក្រសួងព័ត៌មាន ទទួលបន្ទុកការងារបណ្តុះបណ្តាល និងជាសាស្ត្រាចារ្យផ្នែកសារព័ត៌មាន និង ជាគ្រូឧទ្ទេស បានលើកឡើងថា សេចក្តីត្រូវការសម្រាប់ព័ត៌មានដ៏ល្អមួយ គឺភាពពេញលេញ និងមានប្រភពច្បាស់លាស់ គ្រប់ជ្រុងជ្រោយនៃភាគីពាក់ព័ន្ធ រីឯការបញ្ចេញព័ត៌មានលឿនរហ័សពេក មិនគ្រប់ជ្រុងជ្រោយ វានឹងក្លាយជាព័ត៌មានមិនពិត-ព័ត៌មានញុះញ៉ង់ បង្កគ្រោះថ្នាក់ឲ្យសង្គម ដែលនោះគឺជាការកសាងកំហុសរបស់អ្នកយកព័ត៌មាន ដូច្នេះដើម្បីចៀសវាងបាននូវកំហុសទាំងនោះ សម្រាប់អ្នកយកព័ត៌មាន គ្មានអ្វីក្រៅពីការអនុវត្ត និងគោរពតាមក្រមសីលធម៍ និងវិជ្ជាជីវៈនោះឡើយ ។ ឯកឧត្តម មឿន ឈានណារិទ្ធ មានប្រសាសន៍ទៀតថា សិក្ខាសាលាថ្ងៃនេះ យើងនឹងជជែកពិភាក្សាគ្នា អំពីតួនាទីសារព័ត៍មាននៅក្នុងសង្គមប្រជាធិបតេយ្យ , ការរសេរសេរព័ត៍មាន និងការកសាងទំនាក់ទំនងវិជ្ជមានជាមួយប្រព័ន្ឋផ្សព្វផ្សាយព័ត៍មាន និងជាមួយអ្នកសារព័ត៌គ្រប់ស្ថាប័ននិងសាធារណេជន ឲ្យកាន់តែមានប្រសិទ្ធភាពខ្ពស់ ។
គួរបញ្ជាក់ថា ខេត្តសៀមរាប មានស្ថានីយវិទ្យុកំពុងដំណើរការផ្សាយមាន ចំនួន ៣៩ស្ថានីយ ក្នុងនោះស្ថានីយវិទ្យុFMផ្សាយផ្ទាល់មានចំនួន ១៨ស្ថានីយ , ស្ថានីយទូរទស្សន៍ កំពុងដំណើរការផ្សាយមានចំនួន២៣ស្ថានីយ ក្នុងនោះស្ថានីយទូរទស្សន៍រលកធាតុអាកាសផ្សាយបន្តមានចំនួន ១៣ស្ថានីយ និង ស្ថានីយទូរទស្សន៍ខ្សែកាប មានចំនួន១០ស្ថានីយ , មានក្រុមអ្នកសារព័ត៌មានកំពុងធ្វើសកម្មភាព សរុបចំនួន ៨៨អង្គភាព ស្មើនឹង៣២២រូប ក្នុងនោះស្ត្រីចំនួន៣៤រូប រួមមាន ៖ អង្គភាពសារព័ត៌មានភាសាខ្មែរចំនួន៨៤ , ភាសាបរទេសចំនួន២ និងទស្សនាវដ្តីចំនួន ២ ដែលបណ្តាស្ថាប័នទាំងនោះ មានស្នាក់ការអចិន្ត្រៃយ៍របស់ខ្លួន នៅក្នុងខេត្តសៀមរាបចំនួន៣៩អង្គភាព៕
អត្ថបទ និង រូបថត ៖ លោក ងិន គឹមឡេង និង លោក យូ វង្ស
កែសម្រួលអត្ថបទ ៖ លោក លីវ សាន្ត
