ថ្លែងនៅក្នុងពិធីបំពាក់គ្រឿងឥស្សយយស បំពាក់ឋានន្តរស័ក្កិ និងប្រកាសមុខតំណែងជូនមន្រ្តីអង្គភាពពន្ធនាគាខេត្តសៀមរាប ចំនួន២៥៧នាក់ នៅថ្ងៃទី១០ខែកុម្ភះឆ្នាំ២០២១នេះ ឯកឧត្តមឧត្តមអគ្គានុរក្សថ្នាក់លេខ១ ឆែម សាវុធ អគ្គនាយនៃអគ្គនាយកដ្ឋានពន្ធនាគាក្រសួងមហាផ្ទៃ បានមានប្រសាសន៍ថា បច្ចុប្បន្ននេះ នៅទូទាំងប្រទេសកម្ពុជាមានជនជាប់ឃុំជិត៤ម៉ឺននាក់ ក្នុងនោះពន្ធនាគាខេត្តសៀមរាបស្ថិតនៅក្នុងលំដាប់ទី២ ដែលមានជនជាប់ឃុំរហូតដល់ជិត៣ពាន់នាក់បន្ទាប់ពីពន្ធនាគាព្រៃស។
ឯកឧត្តមបន្តថា កន្លងមកនេះអង្គភាពពន្ធនាគាខេត្តសៀមរាប ធ្វើការងារបានយ៉ាងល្អទាំងការងារគ្រប់គ្រងជនជាប់ឃុំ និងការសហការជាមួយស្ថាប័នពាក់ព័ន្ធ នៅក្នុងខេត្តសៀមរាបនេះ។ ប៉ុន្តែទោះជាយ៉ាងនេះក្តីឯកឧត្តមបានជំរុញឱ្យអង្គភាពពន្ធនាគាខេត្តសៀមរាប ពង្រឹងការគ្រប់គ្រងបន្ថែមទៀត លើការលួចប្រើទូរស័ព្ទរបស់ជនជាប់ឃុំ ព្រោះថា បើសិនជាជនជាប់ឃុំអាចលួចប្រើទូរស័ព្ទបាន ពួកគេអាចបញ្ជាដល់បក្សពួកគេឱ្យធ្វើសកម្មភាពបទល្មើសទៀតបាន ជាពិសេសកម្មភាពគ្រឿងញៀន។ ដូចនេះយើងចាំបាច់ត្រូវធ្វើការរឹតបន្តឹង និងគ្រប់គ្រងលើបញ្ហានេះឱ្យបានល្អ ដោយសារតែនៅពន្ធនាគាខេត្តសៀមរាបនេះ មានអ្នកជាប់ឃុំច្រើនដែលត្រូវមន្រ្តីទាំងអស់ បង្កើនការគ្រប់គ្រងឱ្យបានល្អ។
ជាមួយគ្នានេះឯកឧត្តម ឆែម សាវុធ ក៍បានណែនាំឱ្យប្រធានអង្គភាពពន្ធនាគាធ្វើកិច្ចសហការជាមួយស្នងការនគរបាលខេត្តសៀមរាប ឱ្យបានល្អបន្ថែមទៀត ដើម្បីធ្វើការការពារសន្តិសុខ នៅផ្នែកខាងក្រៅជុំវិញនៃអគារពន្ធនាគា ព្រោះវាជាយុទ្ធសាស្រ្តមួយ ដែលកំពុងធ្វើការងារគ្រប់គ្រងជនជាប់ឃុំកាន់តែមានប្រសិទ្ធភាព និងអាចទប់ស្កាត់បាននៃការចង់រត់ពីពន្ធនាគារបស់ជនជាប់ឃុំ។
ក្នុងឱកាសនោះដែរ លោក ពៅ ពិសិដ្ឋ អភិបាលរងខេត្តសៀមរាប បានមានប្រសាសន៍ថា បច្ចុប្បន្ននេះអង្គភាពពន្ធនាគា បានសហការជាមួយអាជ្ញាធរខេត្តយ៉ាងល្អ ហើយដើម្បីជួយដល់អង្គភាពពន្ធនាគាអាចគ្រប់គ្រងជនជាប់ឃុំបានកាន់តែមានប្រសិទ្ធភាព អាជ្ញាធរខេត្តបានជួយរៀបចំកន្លែង សម្រាប់ជនជាប់ឃុំដែលមានជំងឺហើយទៅសម្រាក់ព្យាបាលនៅមន្ទីរពេទ្យបង្អែកខេត្តសៀមរាប គឺមានកន្លែងនៅដាច់ដោយឡែកពីអ្នកជំងឺទូទៅ ដែលកត្តានេះ បានបង្កភាពងាយស្រួលដល់មន្រ្តីពន្ធនាគាក្នុងការគ្រប់គ្រងជនជាប់ឃុំ។ ជាមួយគ្នានេះរដ្ឋបាលខេត្តក៏និងស្នើទៅក្រសួងបរិស្ថាន ដើម្បីសុំម៉ាស៊ីនដុតកំន្ទេចសំរាមដាក់នៅក្នុងពន្ធនាគានេះ ដើម្បីឱ្យទីនោះមានផាសសុខភាព បរិស្ថានល្អ។លោក ពៅ ពិសិដ្ឋ ក៏បានលើទឹកចិត្តឱ្យមន្រ្តីពន្ធនាគាទាំងអស់ត្រូវអនុវត្តភារកិច្ចរបស់ខ្លួនឱ្យបានត្រឹមត្រូវ និងគោរពតាមគោលការណ៍វិន័យ ដើម្បីធ្វើឱ្យអង្គភាពរបស់ស្អាតស្អំ និងមានភាពជឿជាក់ពីប្រជាពលរដ្ឋ៕
អត្ថបទ និង រូបភាព៖ឃុត សៅ
