មន្ត្រីរដ្ឋបាលស្រុកស្រីស្នំ បានឲ្យដឹងថា ដោយមានការគាំទ្រពីលោក អ៊ាន សុខា ប្រធានយុវជនថ្នាក់ខេត្តចុះជួយស្រុកស្រីស្នំ និង អ្នកគ្រូ ឈន សុគន្ធា រដ្ឋបាលស្រុកស្រីស្នំ នឹងរៀបចំកម្មវិធីជិះកង់មួយ នៅថ្ងៃទី០៧ ខែមីនា ឆ្នាំ២០២១ខាងមុខនេះ ក្នុងគោលបំណងលើកកម្ពស់សិទ្ធិនារីផង និងជួយផ្សព្វផ្សាយពីៅតំបន់ទេសចរណ៍នៅក្នុងស្រុកស្រីស្នំទាំងមូលផង ដែលកម្មវិធីជិះកង់នេះ គឺចេញដំណើរពីទីតាំងភូមិវប្បធម៌ ក្នុងក្រុងសៀមរាប ឆ្ពោះទៅកាន់សាលាស្រុកស្រីស្នំ រួចបន្តដំណើរចេញពីសាលាស្រុកស្រីស្នំ ឆ្ពោះទៅភ្នំស្រីស្នំ ស្ថិតនៅក្នុងភូមិដំណាក់ដំរី ឃុំស្លែងស្ពាន ស្រុកស្រីស្នំ ដែលមានចម្ងាយប្រវែងប្រមាណ១០គីឡូម៉ែត្រ ។
គួររំលឹកថា នៅក្បែរភ្នំស្រីស្នំនេះ មានរមណីយដ្ឋានងូតទឹកមួយកន្លែង គឺជាទំនប់ស្ទាក់ទឹកស្ទឹង ដែលជាតំបន់មួយកំពុងពេញនិយមផងដែរ ចំពោះបងប្អូនប្រជាពលរដ្ឋទាំងនៅក្នុងស្រុកផង ក្នុងខេត្តសៀមរាបផង និង ប្រជាពលរដ្ឋនៅខេត្តផ្សេងៗទៀត មកងូតទឹកលេងកម្សាន្តនៅទីនេះ នារដូវវស្សា ។
មន្ត្រីរដ្ឋបាលស្រុកស្រីស្នំ បានឲ្យដឹងទៀតថា អ្នកដែលស្ម័គ្រចិត្តរួមរួមជិះកង់នេះ តម្រូវឲ្យបង់ថវិកាចំនួន៨ដុល្លារអាមេរិក ហើយថវិកាដែលប្រមូលបានពីកម្មវិធីនេះ នឹងជួយគាំទ្រទៅលើវិស័យកីឡាករបាល់ទាត់នៅវិទ្យាល័យ២៨មករា ក្នុងស្រុកស្រីស្នំនេះ ហើយតាមកម្មវិធីដែលបានគ្រោងទុកនោះ គឺ ម៉ោង៥ព្រឹកចេញដំណើរពីក្នុងស្រៀមរាប ដែលនឹងមកដល់សាលាស្រុកនៅក្នុងអំឡុងម៉ោង៧ព្រឹក ហើយនៅម៉ោង៧និង៣០នាទីព្រឹក ចេញដំណើរឆ្ពោះទៅភ្នំស្រីស្នំ និងវិលត្រឡប់មកសាលាស្រុកស្រីស្នំវិញ នៅក្នុងអំឡុងម៉ោងប្រមាណ៩ព្រឹក ។
ព័ត៌មានជាតិ ថ្មីៗ
មន្ត្រីរដ្ឋបាលស្រុកស្រីស្នំ បានឲ្យដឹងទៀតថា កម្មវិធីសូមអំពាវនាវដល់បងប្អូនប្រជាពលរដ្ឋទាំងអស៉ ដែលមានបំណងចង់ចូលរួមក្នុងកម្មវិធីជិះកង់នេះ សូមធ្វើការទំនាក់ទំនងសាកសួរព័ត៌មានបន្ថែមតាមរយៈទូរស័ព្ទលេខ ០១២ ៥៤៥ ៩៤៣ និង ០១២ ៧០៧ ៤៥៦ ៕
អត្ថបទ៖ លីវ សាន្ត
