ថ្ងៃទី១០ ខែកុម្ភៈ ឆ្នាំ២០២១ បណ្តាញអង្គការសង្គមស៊ីវិលខេត្តសៀមរាបចំនួន៥០ បានជួបជុំគ្នាដើម្បីធ្វើការឆ្លុះបញ្ចាំងពីលទ្ធផលការងារសម្រាប់ឆ្នាំ២០២០ និងទិសដៅការងាររយៈពេល៣ឆ្នាំ(២០២១-២០២៣)ដើម្បីចែករំលែកបទពិសោធន៍ និងផ្តល់ការយល់ដឹងអំពីគោលនយោបាយ និងក្របខ័ណ្ឌច្បាប់ទាក់ទងនឹងគំនិតនៃការអភិវឌ្ឍន៍ នៅក្នុងការតស៊ូមតិ និងកំណត់ទំនាក់ទំនងយុទ្ធសាស្ត្រប្រកបដោយប្រសិទ្ធភាព ក្នុងការសម្រេចជោគជ័យនៃផែនការយុទ្ធសាស្ត្ររយៈពេល៣ឆ្នាំ។
លោកស្រី ញាណ ភួងម៉ាលី នាយិកាអង្គការរចនាស្រ្តី និងជាប្រធានបណ្តាញសម្របសម្រួលអង្គការមិនមែនរដ្ឋាភិបាលខេត្តសៀមរាប មានប្រសាសន៍ថាកិច្ចប្រជុំពេលនេះ គឺជាការឆ្លុះបញ្ចាំងលើលទ្ធផលនៃការវាយតម្លៃតម្រូវការលើការកសាងសមត្ថភាពដោយ ធ្វើអោយប្រសើរឡើងនូវអភិបាលកិច្ចល្អ គណនេយ្យភាពសម្រាប់កិច្ចពិភាក្សា និងស្វែងយល់ពីគ្នាទៅវិញទៅមក ដើម្បីចូលរួមគាំការអនុវត្តនូវគោលនយោបាយជាតិ គឺគោលដៅអភិវឌ្ឍន៍ប្រកបដោយនិរន្តភាពនៅកម្ពុជា។
លោកស្រីបន្ថែមថា មតិយោលបល់របស់អ្នកចូលរួមត្រូវបានចងក្រងឯកសារតំរង់ទិសក្នុងការរៀបចំផែន ២០២១-២០២៣ ជាយុទ្ធសាស្រ្តអនុវត្តតាមបែបការចូលរួមនិងជាអាទិភាពនៃសកម្មភាពសមាជិកបណ្តាញ។ លោកស្រីរំពឹងទុកថា សមាជិក សមាជិកាទាំងអស់នឹងបានយល់ដឹងបន្ថែមទៀត ពីភាពបន្ស៊ាំនឹងការទទួលយកពីភាពប្រែប្រួលបញ្ហាប្រឈមរបស់អង្គការសង្គមស៊ីវិល យល់ដឹងបន្ថែមពីផលប៉ះពាល់ដោយជំងឹកូរឹដ-១៩ និងវិបត្តិមូលនិធិរបស់អង្គការសង្គមស៊ីវិល លើផ្នែកសេដ្ឋកិច្ចនិងការងារ ព្រមទាំងយល់ដឹងពីវិធីសាស្រ្តធ្វើការរួមគ្នាក្នុងការគៀរគធនធានមូលនិធិសំរាប់អង្គការសង្គមស៊ីវិល។
សូមជម្រាបថា បណ្ដាញអង្គការសង្គមស៊ីវិលបានបង្កើតឡើងនៅឆ្នាំ១៩៩៤ និងនៅឆ្នាំ២០០៥ ដោយបានបង្កើតគណៈកម្មការគ្រប់គ្រងបណ្តាញ ដែលមានសមាសភាពអង្គការចំនួន៥ចូលរួម រួមមាន អង្គការរចនាស្រ្តី អង្គការកុមារពិភពលោក សមាគមជីវិតនិងក្តីសង្ឃឹម អង្គការសម្លេងយុវជនកម្ពុជា និងអង្គការអង្គរទ្រីប្រូជេក មកដល់បច្ចុប្បន្នមានសមាជិកសរុបចំនួន១៥០អង្គការ។ គោលការណ៍រួមរបស់គណៈកម្មការគ្រប់គ្រងបណ្តាញ គឺជាក្រុមការងារធ្វើការដោយស្មគ្រ័ចិត្ត មិនពាក់ព័ន្ធនយោបាយ អព្យាក្រឹត ទំនាក់ទំនងមិនប្រកាន់បក្សពួក មិនរើសអើងភេទ និងពណ៌សំបុរឡើយ៕
អត្ថបទ និង រូបភាព៖យូ វង្ស
កែសម្រួល៖ អ៊ុន ណារាជ្យ
