មានប្រសាសន៍នៅក្នុងសិក្ខាសាលាបូកសរុបលទ្ធផលការងារសន្ដិសុខយោធាឆ្នាំ២០២០ និងលើកទិសដៅសកម្មភាពការងារបន្ដសម្រាប់ឆ្នាំ២០២១ ថ្ងៃទី០៩ ខែកុម្ភៈ ឆ្នាំ២០២១នេះ ឯកឧត្ដម ឧត្ដមសេនីយឯក ពៅ ហេង មេបញ្ជាការរងកងទ័ពជើងគោក និងជាមេបញ្ជាការយោធភូមិភាគទី៤ បានណែនាំឲ្យមេបញ្ជាការនៅតាមបណ្តាអង្គភាព ចំណុះយោធភូមិភាគទី៤ ទាំងបួនខេត្ដរួមមាន ខេត្ដសៀមរាប ព្រះវិហារ ឧត្ដរមានជ័យ ខេត្ដកំពង់ធំ ត្រូវរៀបចំឯកសារបញ្ជីឈ្មោះយោធាអោយបានត្រឹមត្រូវ ដើម្បីត្រៀមចាក់ថ្នាំវ៉ាក់សាំងការពារជំងឺកូវីដ១៩ ដែលបានផ្ដល់ដោយមហាមិត្ដចិន ដោយកុំជឿលើក្រុមជនអគតិដែលកំពុងបំផុសបំផុល និងញុះញង់បំពុលសង្គម និងចោទប្រកាន់ទៅលើរាជរដ្ឋាភិបាល។
ឯកឧត្ដមបន្ដថា មេបញ្ជាការជាន់ខ្ពស់នៃកងយោធពលខេមរភូមិន្ទបានចាក់វ៉ាក់សាំងការពារកូវីដ១៩នេះមុនគេ ដូចនេះរាល់កងកម្លាំងយោធាទំាងអស់ ត្រូវយកចិត្តទុកដាក់ចាំបាច់ចំពោះមុខមួយចំនួនរួមមាន ធ្វើការអប់រំដល់យោធិនត្រូវធ្វើការចាក់ថ្នាំវ៉ាកសាំងការពារជំងឺកូវីដ១៩ ឲ្យបានទាំងអស់គ្នានាពេលខាងមុខ។ ក្នុងនោះកងកម្លាំងទាហាន នៅយោធភូមិភាគទី៤ទាំងអស់ត្រូវចាក់ថ្នាំវ៉ាក់សាំងការពារជំងឺកូវីដ១៩មុនគេបង្អស់។ ជាមួយគ្នានោះមេបញ្ជាការទាំងអស់ នៅតាមបន្ទាត់ព្រំដែន ដែលអង្គភាពឈរជើងទទួលខុសត្រូវ ត្រូវទប់ស្កាត់ចំពោះពលករធ្វើការឆ្លងដែនតាមច្រករបៀងនីមួយៗ ឲ្យបានហ្មត់ចត់ និងតឹងរឹងបំផុត។
ឯកឧត្ដម បានបន្ថែមថា មេបញ្ជាការកងទ័ពនៅតាមបណ្ដាអង្គភាពត្រូវផ្សព្វផ្សាយ និងត្រួតពិនិត្យជាប្រចាំដល់យោធិនរបស់ខ្លួន អំពីផល់ប៉ះពាល់នៃការប្រើប្រាស់គ្រឿងញៀន និងអនុវត្តន៍ភូមិឃុំមានសុវត្ថិភាព។ នាយទាហាន នាយទាហានរង និងពលទាហានទាំងអស់ ត្រូវការពារអាយុជីវិតខ្លួនឯងនិងជីវិតអ្នកដ៏ទៃដោយត្រូវគោរពច្បាប់ចរាចរណ៍នៅលើដងផ្លូវ ដែលត្រូវធ្វើដំណើរផងដែរ ព្រោះថាការអនុវត្ដមិនសំដៅលើតែពលរដ្ឋនោះទេ កម្លាំងយោធាត្រូវតែគោរពច្បាប់ទាំងអស់គ្នា។ ឯកឧត្តម ក៏បានសំណូមពរដល់បញ្ជាការដ្ឋានយោធភូមិភាគទី៤ ក៏ដូចជាបណ្តាអង្គភាពចំណុះ. ត្រូវយកចិត្តទុដាក់ខិតខំសហការជាមួយស្ថាប័នសម្ព័ន្ធមេត្រីភាព ដើម្បីបង្វែរទិសជំនួយទាំងអស់យកទៅបម្រើទស្សនវិស័យយូរអង្វែង រៀបចំអភិវឌ្ឍន៍ក្នុងអង្គភាពឲ្យក្លាយជាសហគមមួយដែលកើតចេញពីគ្រួសារកងទ័ព និងស្នើសុំសម្ព័ន្ធមេត្រីភាព ជួយបណ្តុះបណ្តាលធនធានមនុស្ស ជាពិសេសផ្នែកកសិកម្ម ។
សូមជម្រាបថា សិក្ខាសាលាដែររៀបចំឡើងនាឱកាសនោះដែរ គឺដើម្បីពិនិត្យឡើងវិញនូវ លទ្ធផលដែលសម្រេចបាននាឆ្នាំកន្លងមក និងរួមគ្នាបន្តរៀបចំអនុវត្តផែនការសកម្មភាព ថ្មីស្របតាមទិសដៅសកម្មភាពរបស់យោធភូមិភាគទី៤ ដើម្បីធានាការចូលរួមចំណែកបង្កើតនូវផ្លែផ្កាក្នុងឆ្នាំ២០២១។ ពីធីនេះក៏មានការចូលរួមពីមេបញ្ជាការរងកងទ័ពជើងគោក មេបញ្ជាការរង កងពលធំអន្តរាគមន៍លេខ២ លេខ៣ កងពលតូចថ្មើរជើងលេខ៤១ លេខ៤២ តំបន់ប្រតិបត្តិការសឹករងសៀមរាប ព្រះវិហារ ឧត្តរមានជ័យ និងកងការពារព្រំដែនគោកលេខ៤០២ លេខ៤០៣ និងបណ្តាអង្គភាពចំណុះយោធភូមិភាគនេះចំនួន១៣០នាក់ផងដែរ៕
អត្ថបទ និង រូបភាព៖ ឈិត សាវី
