នៅព្រឹកថ្ងៃទី១០ ខែកុម្ភៈ ឆ្នាំ២០២១នេះ ការចាក់វ៉ាក់សាំងកូវីដ១៩ ឈ្មោះ សីណូហ្វាម (Sinopharm) ជូនថ្នាក់ដឹកនាំកម្ពុជា លើកដំបូងនេះ បានដំណើរការហើយ ជាព្រឹត្តិការណ៍ប្រវត្តិសាស្រ្ត ដោយធ្វើឡើងតាមគោលការណ៍ស្ម័គ្រចិត្ត នៅទីតាំងចំនួន៤ រួមមាន៖ ១. នៅមន្ទីរពេទ្យកាល់ម៉ែត សម្រាប់ឥស្សរជនជាទេសរដ្ឋមន្ត្រី រដ្ឋមន្ត្រី រដ្ឋលេខាធិការ ឬមានឋានៈស្មើ , ២. នៅមន្ទីរពេទ្យព្រះអង្គឌួង សម្រាប់ឥស្សរជន ជាអនុរដ្ឋលេខាធិការ ឬមានឋានៈស្មើ , ៣. នៅមន្ទីរពេទ្យមិត្តភាពខ្មែរ-សូវៀត សម្រាប់ឥស្សរជនជាអភិបាលនៃគណៈអភិបាលរាជធានី-ខេត្ត និង៤.នៅមន្ទីរពេទ្យកុមារជាតិ សម្រាប់អ្នកសារព័ត៌មាន ។ ដោយឡែកសម្រាប់ថ្នាក់ដឹកនាំស្ថាប័នចំណុះក្រសួងការពារជាតិ និងអគ្គបញ្ជាការដ្ឋាន នៃកងយោធពលខេមរភូមិន្ទ ដែលមានអាយុចាប់ពី១៨ឆ្នាំ រហូតដល់អាយុលើសពី៥៩ឆ្នាំ នឹងចាប់ផ្តើមចាក់វ៉ាក់សាំងបង្ការជំងឺកូវីដ១៩ នៅវេលាម៉ោង២រសៀល ថ្ងៃទី១០ ខែកុម្ភៈ ឆ្នាំ២០២១នេះ នៅមន្ទីរពេទ្យកេតុមាលា ។
បើតាមការបង្ហោះផ្សាយផ្ទាល់របស់ទូរទស្សន៍ជាតិកម្ពុជា និង BTV នាព្រឹកនេះ បានបង្ហាញថា ថ្ងៃនេះ គឺជាព្រឹត្តិការណ៍ប្រវត្តិសាស្រ្តនៃយុគ្គសម័យ ក្រោមការគំរាមកំហែងដោយជម្ងឺកូវីដ-១៩។ ជាមួយគ្នានោះកូនៗ និងកូនប្រសាររបស់សម្តេចតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា និងអ្នកមួយចំនួនទៀត បានទទួលការចាក់វាក់សាំង ការពារជម្ងឺកូវីដ១៩ នៅមន្ទីរពេទ្យកាល់ម៉ែត្រដែលក្នុងនោះ ម្ជុលទីមួយនៃចំនួនវាក់សាំង ៦០ម៉ឺនដូស ត្រូវបានការទទួលដោយបុត្រច្បងនៃសម្តេចតេជោ ហ៊ុន សែន គឺឧត្តមសេនីយ៍ ហ៊ុន ម៉ាណែត មេបញ្ជាការកងទ័ពជើងគោក នៃកងយោធពលខេមរភូមិន្ទ។
នៅលើគេហទំព័រហ្វេសប៊ុកផ្ទាល់ខ្លួនរបស់ឧត្តមសេនីយ៍ ហ៊ុន ម៉ាណែត និងឯកឧត្តម ហ៊ុន ម៉ានី បានសរសេរថា ខ្ញុំបានចាក់វ៉ាក់សាំងការពារកូវីដ-១៩ រួចហើយ , សូមបងប្អូនខ្មែររួមគ្នា និងត្រៀមលក្ខណៈចូលរួមជាមួយរដ្ឋាភិបាលអនុវត្តវិធានការសុខាភិបាល និងទទួលចាក់ថ្នាំបង្ការទៅតាមដំណាក់កាលនីមួយៗ តាមផែនការលទ្ធភាពរបស់រាជរដ្ឋាភិបាល ដើម្បីការពារខ្លួនយើង គ្រួសារយើង សង្គមជាតិយើង និងប្រជាជនយើងនៅក្នុងកាលៈទេសៈដ៏លំបាកនេះ ពីព្រោះការប្រយុទ្ធប្រឆាំងនឹងជំងឺកូវីដ-១៩ គឺផ្តើមចេញពីខ្លួនយើង ដើម្បីការពារខ្លួនយើង និងអ្នកដទៃ។ សូមអបអរសាទរព្រះរាជាណាចក្រកម្ពុជា ដែលទទួលបានវ៉ាក់សាំងប្រឆាំងនឹងជំងឺកូវីដ-១៩ SINOPHARM ដែលជាអំណោយរបស់សាធារណរដ្ឋប្រជាមានិតចិន ចំនួន៦០ម៉ឺនដូសលើកដំបូង។
វ៉ាក់សាំងដែលជាទំនិញយុទ្ធសាស្រ្តដ៏មានសារៈសំខាន់នេះ នឹងក្លាយជាផ្នែកមួយនៃដំណោះស្រាយជាច្រើនលើបញ្ហាកង្វល់ក្នុងយុទ្ធនាការប្រឆាំង នឹងការឆ្លងរាលដាលនៃជំងឺកូវីដ-១៩ ជាពិសេសការផ្តល់វ៉ាក់សាំងដល់ក្រុមគ្រូពេទ្យជួរមុខ និងកងកម្លាំងប្រដាប់អាវុធដែលកំពុងឈរជើងការពារ នៅខ្សែត្រៀម ទប់ស្កាត់មិនឱ្យជំងឺកូវីដ-១៩ ឆ្លងចូលក្នុងសហគមន៍បាន។ ដោយឡែក ការដែលទទួលបានវ៉ាក់សាំង ក្នុងដំណាក់កាលដំបូង ស្របពេលដែលប្រទេសជាច្រើននៅលើពិភពលោកទើបតែចាប់ផ្តើមយុទ្ធនាការចាក់វ៉ាក់សាំងនៅតាមបណ្តាប្រទេសរបស់ខ្លួន គឺសរបញ្ជាក់ពីជោគជ័យដ៏ធំមួយសម្រាប់កម្ពុជាលើសមរភូមិការទូត ដែលការទទួលបានទំនិញយុទ្ធសាស្រ្តក្នុងពេលឆាប់រហ័ស ពិតជាបានជួយដល់ការកាត់បន្ថយហានិភ័យ និងការត្រលប់មករកប្រក្រតីភាពនៃជីវភាពសង្គម សេដ្ឋកិច្ចវិញ។ ទំនាក់ទំនងល្អរវាង ព្រះរាជាណាចក្រកម្ពុជា និងសាធារណរដ្ឋប្រជាមានិតចិនដែលបានកសាង និងរិតចំណងដោយថ្នាក់ដឹកនាំនៃភាគីទាំង២ គឺជាកត្តាកំណត់មួយនៃការទទួលបានវ៉ាក់សាំងក្នុងគ្រានេះ។ យើងពិតជាមិនអាចប្រកែកបានទេថា ការប្រកួតប្រជែងដើម្បីទិញ និងចាក់វ៉ាក់សាំងប្រឆាំងកូវីដ-១៩ កាន់តែមានភាពស្រួចស្រាល់ឡើង ដែលប្រទេសកំពុងអភិវឌ្ឍ និងប្រទេសក្រីក្រអាចប្រឈមនឹងការទទួលបានវ៉ាក់សាំងក្នុងកម្រិតទាប និងត្រូវរង់ចាំយូរ។
អត្ថបទ និង រូបភាព៖ ងិន គីមឡេង ,ឈិត សាវី
