ក្នុងកិច្ចពិភាក្សាបឋមមួយ ជាមួយក្រុមហ៊ុនមិសុតា-ហ្វូត នៅក្រុងបាត់ដំបង នារសៀលថ្ងៃទី១២ ខែកុម្ភៈ ឆ្នាំ២០២១ លោក នាក់ ណេរ៉ុន អភិបាលរងខេត្តសៀមរាប បានលើកទឹកចិត្ត និងគាំទ្រដល់អ្នកវិនិយោគជាតិ និងអន្តរជាតិ សិក្សាលើការកែច្នៃផ្លែស្វាយកែរវមៀត ដែលដាំដុះដោយសមាគមកសិករ ក្នុងខេត្តសៀមរាប។
នៅក្នុងជំនួបពិភាក្សានេះ អាជ្ញាធរខេត្ត បានបង្ហាញពីការពង្រីកសក្តានុពលលើវិស័យកសិ-ឧស្សាហកម្ម ដែលឆ្លើយតបតាមយុទ្ធសាស្រ្ត បង្កើតឱកាសក្នុងស្ថានភាពនៃវិបត្តិកូវីដ-១៩។ ប្រធានបទដែលផ្តោតជាចម្បងនោះ គឺការសម្របសម្រួល ដើម្បីស្វែងរកទីផ្សារ សម្រាប់ស្វាយកែវរមៀត ដ៏ជាក់លាក់មួយ ក្នុងភាពជាដៃគូ និងផ្តល់ផលប្រយោជន៍ ទំនុកចិត្ត រវាងក្រុមហ៊ុន និងអ្នកផ្គត់ផ្គង់។
លោក ម៉ៃឃើល តាន់ នាយកក្រុមហ៊ុនមិសុតា-ហ៊្វូដ បញ្ជាក់ថា ក្រុមហ៊ុននេះ បានបង្កើតរោងចក្រកែផ្លៃឈើស្រស់ សម្ងួតជាផលិតផលដំណាប់ នៅអំឡុងឆ្នាំ២០១៧ ក្នុងនោះមានដូចជា ដំណាប់ក្រូច ម្នាស់ និងស្វាយកែវរមៀត។
លោក បន្ថែមថា សម្រាប់ផ្លែស្វាយកែវរមៀតស្រស់ ក្រុមហ៊ុនរបស់លោក មិនតម្រូវឲ្យមានស្ដង់ដារខ្ពស់ ដូចផលិតនាំចេញនោះឡើយ។ ប៉ុន្តែអ្នកផ្គត់ផ្គង់ ក៏ត្រូវមានភាពស្មោះត្រង់ និងធានាពីគុណភាពផលិតផលរបស់ខ្លួនផងដែរ។
លោក ថោង ប៊ុនថារី ប្រធានសមាគមសហគ្រិនវ័យក្មេងសាខាខេត្តសៀមរាប លើកឡើងថា ការវិនិយោគ របស់ក្រុមហ៊ុនមិសុតា-ហ៊្វូដ ដែលជាក្រុមហ៊ុនកែច្នៃផលិតផលដំណាប់ផ្លែឈើក្នុងស្រុក បានបង្កើតការងារ ជូនប្រជាពលរដ្ឋខ្មែរ និងចូលរួមគាំទ្រផលិតផលខ្មែរ ឆ្លើយតបទៅនឹងតម្រូវការទីផ្សារក្នុងតំបន់អាស៊ី អ៊ឺរ៉ុប និងអាមេរិកផងដែរ។
ជាលទ្ធផលនៃកិច្ចពិភាក្សា លោករំពឹងថា ឱកាសនៃការចុះហត្ថលេខា លើអនុស្សរណៈ នៃការយោគយល់គ្នា ស្តីអំពីការបញ្ជាទិញ និង ការផ្គត់ផ្គង់ រវាងក្រុមហ៊ុន និង សមាគមកសិករដាំស្វាយកែវរមៀត នឹងមកដល់ក្នុងពេលឆាប់ៗ។
((សម្ភាសន៍ លោក ថោង ប៊ុនថារី ))
អត្ថបទ និងរូបភាព: លោក ងិន គឹមឡេង និង លោក យូ វង្ស
កែសម្រួលអត្ថបទ: លោក សេង ផល្លី
