នាថ្ងៃទី១៣ ខែកុម្ភៈឆ្នាំ២០២១ លោក នាក់ ណេរ៉ុន អភិបាលរងខេត្តសៀមរាប និងជាប្រធានគណៈកម្មការទទួលប្រជាពលរដ្ឋចំណូលស្រុក បានចុះជួប ប្រជាពលរដ្ឋចំណូលស្រុកមកពីបរទេស នៅតាមមណ្ឌលចត្តាឡីស័ក នៃបណ្ដាខេត្តជាប់ព្រំដែនកម្ពុជា-ថៃ ដើម្បីស្វែងយល់ពីការរស់នៅរបស់ប្រជាពលរដ្ឋអំឡុងពេលធ្វើចត្តាឡីស័ក។
តាមរបាយការណ៍របស់ ក្រុមការងារគ្រប់គ្រងប្រជាពលរដ្ឋចំណូលស្រុកមកពីប្រទេសថៃ នៃខេត្តបាត់ដំបង និងខេត្តបន្ទាយមានជ័យ បានបង្ហាញប្រហែលគ្នាថា ក្នុងមួយថ្ងៃៗ ជាមធ្យម ក្រុមការងារបានទទួលជនចំណូលស្រុក តាមច្រកទ្វារអន្តរជាតិ ដូង និងអូរបីជាន់ មិនតិចជាង១០០នាក់ឡើយ។
លោកវរៈសេនីយ៍ទោ ម៉ាន់ ធី អធិការរងនៃអធិការដ្ឋាននគរបាលស្រុកអូរជ្រៅ ខេត្តបន្ទាយជ័យ បង្ហាញថា ចាប់ពីថ្ងៃទី២០ ខែធ្នូ ឆ្នាំ២០២០ រហូតមកដល់ពេលនេះ ពុំមានករណីពលករលួចឆ្លងដែននោះឡើយ ខណៈស្ថានភាពជំងឺកូវីដ-១៩ នៅប្រទេសថៃ ក៏នៅតែមានបង្កហានិភ័យនៅឡើយ។
លោក នាក់ ណេរ៉ុន បានបង្ហាញជារួមថា រយៈកន្លងមកនេះ បងប្អូនទើបមកពីបរទេស មានការយល់ដឹងច្រើនពី ការអនុវត្តន៍ការធ្វើចត្តាឡីស័ក១៤ថ្ងៃ រីឯការលួចឆ្លងដែនត្រឡប់ទៅប្រទេសថៃវិញ ក៏មានការកាត់បន្ថយផងដែរ។ ទាំងនេះអាស្រ័យដោយមានការផ្សព្វផ្សាយរបស់អាជ្ញាធរគ្រប់ជាន់ថ្នាក់ និងការរឹតបន្តឹងការយាមល្បាត នៅតាមខ្សែបន្ទាត់ព្រំដែនរបស់កម្លាំងសមត្ថកិច្ច។
លោក នាក់ ណេរ៉ុន កត់សម្គាល់ផងដែរថា ការដាក់ចេញនូវវិធានការដ៏ខ្ពង់ខ្ពស់នៃសម្តេចតេជោ ហ៊ុន សែន ប្រមុខរាជរដ្ឋាភិបាល ក្នុងការដាក់ឲ្យអនុវត្តន៍ការធ្វើចត្តាឡីស័ក នៅតាមបណ្តាខេត្តជាប់ព្រំដែននោះ ចំពោះប្រជាពលរដ្ឋមកពីបរទេសមុនត្រឡប់ទៅសហគមន៍របស់ខ្លួន បានទទួលនូវប្រសិទ្ធខ្ពស់ ក្នុងការទប់ស្កាត់ហានិភ័យ ការចម្លងជំងឺកូវីដ-១៩ ចូលក្នុងសហគមន៍ និងកាន់តែមានតម្លៃបន្ថែម ជាមួយនឹងការទទួលស្គាល់ពីសហគមន៍អន្តរជាតិ ក្នុងការគ្រប់គ្រងបានល្អប្រសើរ នៃការរីករាលដាលនៃជំងឺកូវីដ-១៩ របស់ប្រទេសកម្ពុជា៕
អត្ថបទ និង រូបភាព៖ លោក ងិន គឹមឡេង
កែសម្រួល៖ លោក សេង ផល្លី
