ក្នុងឱកាសប្រារព្ធពិធីសម្អាតឧទ្យានសហស្សវត្សរ៍កាកបាទក្រហមកម្ពុជាខេត្តសៀមរាប ដើម្បីអបអរសាទរខួបលើកទី៦៦ ថ្ងៃកំណើតកាកបាទក្រហមកម្ពុជា (១៨កុម្ភៈ ១៩៥៥-១៨កុម្ភៈ២០២១) នៅព្រឹកថ្ងៃទី១៨ ខែកុម្ភៈ ឆ្នាំ២០២១នេះ ឯកឧត្តម គុជ លីណា អនុប្រធានគណៈកម្មាធិការសាខាកាកបាទក្រហមកម្ពុជាខេត្តសៀមរាប បានធ្វើការអំពាវនាវដល់គណៈកម្មការគ្រប់គ្រងសាលារៀនទាំងអស់ក្នុងខេត្ត ត្រូវបំផុសចលនាដាំកូនឈើឡើងវិញនៅក្នុងសាលារៀន ដើម្បីបង្កើនធម្មជាតិគម្របបៃតងដល់ភពផែនដី ម៉្យាងការដាំកូនឈើឡើងវិញ គឺវាមានប្រយោជន៍ច្រើនដល់ផ្នែកបរិស្ថាន និង បានបន្សល់ទុកនូវអនុស្សាវរីយ៍ដល់កូនចៅជំនាន់ក្រោយរបស់យើងផងដែរ ដែលឧទ្យានសហស្សវត្សរ៍កាកបាទកស្រហមកម្ពុជានៅខេត្តសៀមរាប ជាភស្តុតាងស្រាប់ ។
ឯកឧត្តម គុជ លីណា មានប្រសាសន៍បន្ថែមថា ជាក់ស្តែងឧទ្យានសហស្សវត្សរ៍កាកបាទក្រហមកម្ពុជា ដែលជាស្នាព្រះហស្ថរបស់សម្តេចព្រះមហាក្សត្រី សម្តេចព្រះនរោត្តម មុនីនាថ សីហនុ ព្រះវររាជមាតាជាតិខ្មែរ និងថ្នាក់ដឹកនាំជាន់ខ្ពស់រាជរដ្ឋាភិបាល រួមទាំងកាកបាទក្រហមកម្ពុជា ដែលស្តេចយាងដាំ និងអញ្ជើញដាំកូនឈើនៅក្នុងឧទ្យាននេះ គឺជាការរួមចំណែកដ៏ធំធេងក្នុងការលើកកម្ពស់គម្របបៃតង នៃឧទ្យានអង្គរ ដែលជាសម្បត្តិបេតិកភណ្ឌពិភពលោក ក៏ដូចជាការលើកកម្ពស់បរិស្ថានរបស់ភពផែនដី ។
នៅព្រឹកថ្ងៃទី១៨ ខែកុម្ភៈ ឆ្នាំ២០២១នេះ សាខាកាកបាទក្រហមកម្ពុជាខេត្តសៀមរាប បានដឹកនាំកម្លាំងចូលរួមចំនួន២៨៦នាក់ មកពីបណ្តាមន្ទីរ អង្គភាពពាក់ព័ន្ធជុំវិញខេត្ត ធ្វើពិធីសម្អាតអនាម័យ និងបរិស្ថាននៅក្នុងឧទ្យានសហស្សវត្សរ៍កាកបាទក្រហមកម្ពុជា ដែលទីតាំងស្ថិតនៅតាមផ្លូវទៅប្រាសាទអង្គរវត្ត ក្នុងភូមិមណ្ឌល៣ សង្កាត់ស្លក្រាម ក្រុងសៀមរាប ក្នុងទំហំជាង៤ហិកតា ដើម្បីអបអរសាទរលើកទី៦៦ ថ្ងៃកំណើតកាកបាទក្រហមកម្ពុជា (១៨កុម្ភៈ ១៩៥៥-១៨កុម្ភៈ២០២១) ហើយពិធីនេះ តែងតែប្រារព្ធឡើងក្នុងថ្ងៃទី១៨ ខែកុម្ភៈ ជារៀងរាល់ឆ្នាំ ។
ឧទ្យានសហស្សវត្សរ៍កាកបាទកស្រហមកម្ពុជានេះ បានបង្កើតឡើងនៅឆ្នាំ ១៩៩៩ ក្រោមព្រះរាជាធិបតីភាពខ្ពងខ្ពង់ សម្តេចព្រះមហាក្សត្រី នរោត្តម មុនីនាថ សីហនុ ព្រះវររាជមាតាជាតិខ្មែរ ព្រះប្រធានកិត្តិយសកាកបាទក្រហមកម្ពុជា ដែលមកដល់ពេលនេះមានអាយុកាល ២២ឆ្នាំហើយ និងមានដើមឈើប្រមាណ ២.៤៦០ដើម ៕
អត្ថបទ និង រូបថត ៖ លោក ជា ស្រស់
កែសម្រួលអត្ថបទ ៖ លោក លីវ សាន្ត
