លោក នួន ពុទ្ធារ៉ា អភិបាលក្រុងសៀមរាប លោកបានថ្លែងឲ្យដឹងនៅថ្ងៃទី១៥ ខែមីនានេះថា បើទោះបីជាមានព្រឹត្ដិការណ៍សហគមន៍២០កុម្ភៈក៍ដោយ ក៍ប៉ុន្ដែការអនុវត្ដគម្រោងស្ថាបនាហេដ្ឋារចនាផ្លូវ៣៨ខ្សែនៅក្នុងក្រុងនេះ មិនមានការរាំងស្ទះ ឬរអាក់រអួលនោះឡើយ។ បច្ចុប្បន្ននេះក្រុមការងារសងសង់គ្រប់អង្គភាពបាននឹងកំពុងធ្វើសកម្មភាពយ៉ាងមមាញឹក ក្នុងការសាងសង់ផ្លូវ៣៨ខែ្សនោះ ដើម្បីអោយសម្រេចគោលដៅតាមការគ្រោងទុកអោយរួចរាល់នៅដើមឆ្នាំ២០២២។ ហើយមកដល់ពេលនេះក្រុមការងារសម្រេច បានប្រមាណជាង៣០ភាគរយហើយ ដែលក្នុងនោះរួមមានការចាក់បេតុង ការដាក់ប្រព័ន្ធលូទឹក ប្រព័ន្ធអគ្គិសនីក្រោមដី ព្រមទាំងប្រព័ន្ធខ្សែកាបផ្សេងៗទៀតផងដែរ។
លោក នួន ពុទ្ធារ៉ា បានឲ្យដឹងទៀតថា ទោះព្រឹត្ដិការណ៍សហគមន៍២០កុម្ភៈមិនមែនជាឧបសគ្គនៃការងារសាងសង់ផ្លូវ៣៨ខ្សែ នៅក្នុងក្រុងសៀមរាបពិតប្រាកដមែន ប៉ុន្ដែក្នុងនោះចំពោះការសាងសង់ក៏មានការជួបប្រទះនៅបញ្ហាមួយចំនួន ដោយសារប្រជាពលរដ្ឋមួយចំនួនតូចបានលួចចោះលូទឹកបន្ដចូលចួលផ្ទះរបស់គាត់ ខណៈដែលក្រុមការងារកំពុងស្ថាបនា ដែលធ្វើអោយខូចលូខ្លះៗ។ ជាមួយគ្នានោះលោកបានអំពាវដល់ប្រជាពលរដ្ឋ អោយដាក់ពាក្យស្នើសុំដាក់ប្រព័ន្ធចូលលំនៅឋានអោយបានត្រឹមត្រូវ ដើម្បីកុំអោយរាំងស្ទះដល់ក្រុមការងារដែលកំពុងពន្លឿនការស្ថាបនាអោយរួចរាល់ទៅតាមការគ្រោងទុក។
លោកអភិបាលក្រុង បានបញ្ជាក់បន្ថែមថា ក្រោយគម្រោងសាងសង់ផ្លូវទាំង៣៨ខ្សែបានបញ្ចប់ ទីក្រុងសៀមរាបនឹងប្រែក្លាយរូបរាងទៅជាទីក្រុងទំនើប និងទេសចរណ៍ដ៏មានសក្តានុពល ដែលត្រូវបានរាជរដ្ឋាភិបាលកម្ពុជា កំណត់ជាតំបន់ស្នូលនៃប៉ូលអភិវឌ្ឍជាតិ ជាគោលដៅទេសចរណ៍វប្បធម៌ប្រវត្តិសាស្រ្ត និងធម្មជាតិ។ ក្នុងនោះគម្រោងនេះនឹងដើរតួជាហេដ្ឋារចនាសម្ព័ន្ធប្រទាក់ក្រឡាគ្នា តភ្ជាប់ទីប្រជុំជន ទៅជាយក្រុង និងតភ្ជាប់ទៅកាន់តំបន់ទេសចរណ៍សំខាន់ៗ និងបណ្តាញខ្សែផ្លូវជាតិនានា សំដៅកាត់បន្ថយការកកស្ទះចរាចរណ៍ក្នុងទីក្រុង ជំរុញកំណើនដឹកជញ្ជូន ទាក់ទាញវិនិយោគិន ធុរជន និងភ្ញៀវទេសចរជាតិ-អន្តរជាតិ ដែលជាការរួមចំណែកក្នុងការជំរុញកំណើនសេដ្ឋកិច្ចជាតិឱ្យកាន់តែរីកចម្រើន នៅក្រោយវិបត្តិនៃជំងឺកូវីដ-១៩។
សូមជម្រាបថា ផ្លូវ៣៨ខ្សែនៅក្រុងសៀមរាបនេះ មានប្រវែងសរុប១០៨.៧៤គីឡូម៉ែត្រ ត្រូវបានប្រមុខរាជរដ្ឋាភិបាលកម្ពុជា បើកការដ្ឋានសាងសង់ កាលពីចុងឆ្នាំ២០២០កន្លងមកដែរគ្រោងប្រើប្រាស់ថវិកាជាតិសរុបប្រមាណ១៥០លានដុល្លារអាមេរិក និងថវិកាជាង៩លានដុល្លារអាមេរិកទៀត សម្រាប់ការងារចាំបាច់ក្នុងការរៀបចំស្ថាបនាប្រព័ន្ធបង្ហូរទឹកភ្លៀង និងទឹកកក្វក់ដែលនៅក្រៅគម្រោងសាងសង់ខ្សែផ្លូវទាំង៣៨។ ជាមួយគ្នានោះគម្រោងស្ថាបនាហេដ្ឋារចនាផ្លូវ៣៨ខ្សែនេះដែរ មានបួនប្រភេទគឺ ទី១ចាក់បេតុងកម្រាស់២៥សង់ទីម៉ែត្រ, ទី២ចាក់បេតុងកម្រាស់២០សង់ទីម៉ែត្រ និងកន្លែងខ្លះកម្រាស់ ៧សង់ទីម៉ែត្រយោងទៅតាមស្ថានភាពភូមិសាស្ត្រ ស្ថានភាពចរាចរាណ៍ និងការដឹកជញ្ជូន, ទី៣ជួសជុលគ្រឹះហើយអ៊ុតកៅស៊ូបេតុង និងប្រភេទទី៤ អ៊ុតកៅស៊ូបេតុងកម្រាស់ ១៥សង់ទីម៉ែត្រ៕
អត្ថបទ និង រូបភាព៖ ឈិត សាវី
កែសម្រួល៖ អ៊ុន ណារាជ្យ
