យុវជនម្នាក់បានស្លាប់ភ្លាមៗនៅនឹងកន្លែងខណៈបើកម៉ូតូបង្ហោះហើយបានរ៉េចង្កូតដួលចូលទៅក្រោមឡាចូលរថយន្តក្រុមហ៊ុនស្រាបៀរ GANZBERG ។ ហេតុការណ៍នេះបានកើតឡើងកាលពីវេលាម៉ោង១៦ និង៣០នាទី ថ្ងៃទី១៥ ខែមីនា ឆ្នាំ២០២១ នៅលើផ្លូវកៅស៊ូ ស្ថិតក្នុងភូមិគោកឬស្សីត្បូង ឃុំដានរុន ស្រុកសូទ្រនិគម ខេត្តសៀមរាប។
បើតាមលោក ទេព ចាន់ណា អធិការនគរបាលស្រុកសូទ្រនិគមបានឲ្យដឹងថា គ្រោះថ្នាក់ចរាចរណ៍នេះ បង្កដោយម៉ូតូម៉ាកហុងដាឌ្រីម ពណ៌ខ្មៅសេរី២០១៩ ពាក់ស្លាកលេខ សៀមរាប 1AE.6849 បើកបរដោយឈ្មោះ មុំ ធាវី ភេទប្រុស អាយុ១៩ឆ្នាំ រស់នៅភូមិកំពង់គ១ ឃុំកៀនសង្កែ ស្រុកសូទ្រនិគម ខេត្តសៀមរាប។ មុនពេលកើតហេតុយុវជនខាងលើបានបើកម៉ូតូក្នុងទិសដៅពីត្បូងទៅជើង លុះមកដល់ចំនុចកើតហេតុដោយរូបគេបានបង្ហោះម៉ូតូហើយក៏បានរ៉េចង្កូតដួលខ្ទាតចូលទៅក្រោមរថយន្តមួយគ្រឿង ម៉ាកកូរ៉េរបស់ក្រុមហ៊ុនស្រាបៀរGANZBERG ពាក់ស្លាកលេខភ្នំពេញ3E.3036 បញ្ច្រាសទិសគ្នាបណ្ដាលអោយស្លាប់ភ្លាមៗនៅនឹងកន្លែងតែម្ដង។
ក្រោយកើតហេតុកម្លាំងជំនាញបានចុះធ្វើការត្រួតពិនិត្យ និងវែងហើយបានប្រគល់សាកសពជូនទៅក្រុមគ្រួសារយកទៅធ្វើបុណ្យតាមប្រពៃណី ឯម្ចាស់រថយន្តបានរត់បាត់ស្រមោល។ បច្ចុប្បន្នម៉ូតូនិងរថយន្តបង្ករត្រូវបានសមត្ថកិច្ចយកទៅរក្សាទុកនៅអធិការស្រុកបណ្ដោះអាសន្ន រងចាំការដោះស្រាយនៅពេលក្រោយ៕
អត្ថបទ និង រូបភាព៖ អ៊ុន ណារាជ្យ
