មានប្រសាសន៍ប្រាប់អ្នកយកព័ត៌មានរបស់មន្ទីរព័ត៌មានខេត្តខេត្តសៀមរាប នាព្រឹកថ្ងៃទី១៦ ខែមីនា ឆ្នាំ២០២១នេះ លោក ទូន មិថុនា ប្រធានការិយាល័យអធិការកិច្ច នៃមន្ទីរអប់រំ យុវជននិងកីឡាខេត្តសៀមរាប បានបញ្ជាក់ថា សម្រាប់ខេត្តសៀមរាប មន្ទីរមិនមានគោលការណ៍ក្នុងការផ្អាក ឬបិទសាលានៅឡើយនោះទេ ទោះបីរដ្ឋបាលខេត្ត បានចេញប្រកាសពីការបិទពីធីបុណ្យ ឬរៀបអាពាហ៍ពិពាហ៍ក៏ដោយ ជាពិសេស កាលពីពេលថ្មីៗនេះមានករណីជំងឺកូវីដ-១៩ នៅឃុំសំរោងយា ស្រុកពួក ក៏មានការផ្អាកសាលានៅទីនោះមួយរយៈពេលក៏ពិតមែន តែមកដល់ថ្ងៃនេះក៏បានបើកដំណើរការវិញហើយដែរ ដូច្នេះ ការមិនទាន់ផ្អាកឬបិទសាលានោះ គឺដោយសារគិតថា យើងអាចគ្របគ្រងសភាពការណ៍បាន តែបើមានករណីផ្ទុះជំងឺកូវីដ-១៩ខ្លាំងក្នុងខេត្ត ដែលត្រូវបិទសាលា យើងនឹងមានសេចក្តីជូនដំណឹងឱ្យបានដឹងទាំងអស់គ្នា ។
គួររំលឹកថា ដោយអនុវត្តតាមការអំពាវនាវ និងអនុសាសន៍ណែនាំដ៏ខ្ពង់ខ្ពស់របស់ សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងសេចក្តីណែនាំរបស់ក្រសួងសុខាភិបាល កាលពីរសៀលថ្ងៃទី១៥ ខែមីនា ឆ្នាំ២០២១ម្សិលមិញនេះ រដ្ឋបាលខេត្តសៀមរាប បានចេញសេចក្ដីណែនាំមួយ ស្តីពីចូលរួមពង្រឹងការអនុវត្តវិធានការការពារ បង្ការ និងទប់ស្កាត់ការរីករាលដាល ជំងឺកូដ-១៩ នៃព្រឹត្តិការណ៍សហគមន៍ ២០ កុម្ភៈ នៅក្នុងខេត្តសៀមរាប ក្នុងនោះគឺកាត់បន្ថយការជួបជុំ ប្រមូលផ្តុំមនុស្សច្រើននៅតាមទីសាធារណៈ ទីប្រជុំជន និងផ្អាកការរៀបចំកម្មវិធីបុណ្យ អាពាហ៍ពិពាហ៍ និងពិធីជប់លៀងផ្សេងៗ ដោយអំពាវនាវដល់ពលរដ្ឋ ឬធារណៈជនទូទៅ ត្រូវចូលរួមសហការអនុវត្តតាមគោលការណ៍ណែនាំ របស់ក្រសួងសុខាភិបាល ព្រមទាំងត្រូវស្កេន QR Code ទប់ស្កាត់កូវីដ-១៩” ឬផ្តល់ទិន្នន័យ ព័ត៌មានផ្សេងៗតាមការណែនាំរបស់មន្ត្រីសុខាភិបាល ឬអាជ្ញាធរមានសមត្ថកិច្ច នៅតាម ទីតាំងដែលបានដាក់ត្រួតពិនិត្យទប់ស្កាត់ការរីករាលដាលជំងឺកូវីដ-១៩ ក្នុងខេត្តសៀមរាប ។
សូមបញ្ជាក់ថា ពាក់ព័ន្ធនឹងព្រឹត្តិការណ៍សហគមន៍ ២០ កុម្ភៈ គិតមកទល់ព្រឹកថ្ងៃទី១៦ ខែមីនា ឆ្នាំ២០២១នេះ សម្រាប់ខេត្តសៀមរាប គឺកើតមានតែមួយករណីប៉ុណ្ណោះ នៅថ្ងៃទី០៩ ខែមីនា ឆ្នាំ២០២១នេះ មានករណីធ្វើតេស្តវិជ្ជមានកូវីដ-១៩ ទៅលើស្ត្រីមួយរូបឈ្មោះ ហ៊ន់ ស៊ីនឿត ភេទស្រី អាយុ៣២ឆ្នាំ មានលំនៅឋាននៅភូមិព្រៃវែង ឃុំសំរោងយា ស្រុកពួក ហើយបច្ចុប្បន្នកំពុងសម្រាកព្យាបាលនៅអគារជំងឺឆ្លង នៃមន្ទីរពេទ្យបង្អែកខេត្តសៀមរាប ខណៈនៅថ្ងៃនេះដែរ ក្រសួងសុខាភិបាល បានរកឃើញអ្នកឆ្លងកូវីដ១៩ថ្មីរហូតដល់ចំនួន ១០៥នាក់ថែមទៀត បានធ្វើឲ្យអ្នកឆ្លងកូវីដ១៩ ក្នុងព្រឹត្តិការណ៍សហគមន៍២០កុម្ភៈ កើនដល់ចំនួន ៩១៥ នាក់ ក្នុងចំណោម អ្នកឆ្លងកូវីដ១៩ សរុបចំនួន ១.៤៣០នាក់ ដែលកម្ពុជាបានរកឃើញ ៕
អត្ថបទ ៖ លោក លីវ សាន្ត
