បើតាមលោកវរៈសេនីយ៍ឯក ឡុង សំណាង អធិការនគរបាលស្រុកបន្ទាយស្រី បានឲ្យដឹងថា យ៉ាងហោចណាស់មនុស្ស៣នាក់បានរងរបួសធ្ងន់ធ្ងរ ខណៈដែរកំពុងធ្វើដំណើរតាមដងផ្លូវដោយម៉ូតូ២គ្រឿង ត្រូវបានរថយន្តយីមួយគ្រឿងរេចង្កូតមកបុកពេញទំហឹង នៅចំនុចផ្លូវលេខគីឡូម៉ែត្រលេខ៦៧ ក្នុងភូមិតានី ឃុំរុនតាឯក ស្រុកបន្ទាយស្រី កាលពីវេលាម៉ោង១៤ និង៣៥នាទីថ្ងៃទី១៥ ខែមីនា ឆ្នាំ២០២១នេះ។
លោកវរៈសេនីយ៍ឯក បានឲ្យដឹងទៀតថា គ្រោះថ្នាក់ចរាចរណ៍នេះ បង្កឡើងដោយរថយន្តដឹកទំនិញប្រភេទយីឌុប ពណ៌ទឹកប៊ិច ពាក់ស្លាកលេខភ្នំពេញ 4A.3206 បើកបរពីទិសខាងត្បូង ឆ្ពោះទៅជើង។ លុះមកដល់ចំនុចកើតហេតុដោយអ្នកបើកបរងងុយដេកបានងួកមួយភ័ង ហើយបានជ្រុលចង្កូតបុកម៉ូតូ០១គ្រឿង រួចបន្តទៅបុកម៉ូតូរ៉ឺម៉ក០១គ្រឿងទៀត បណ្ដាលឲ្យមនុស្សចំនួន០៣នាក់រងរបួសធ្ងន់។
ក្រោយកើតហេតុកម្លាំងជំនាញបានចុះធ្វើការត្រួតពិនិត្យ និងវែងហើយបានជនរងគ្រោះត្រូវបានបញ្ជូនទៅសង្គ្រោះនៅមន្ទីរពេទ្យ។ ចំណែកវត្ថុតាងទាំងសងខាងត្រូវបានសមត្ថកិច្ចយកទៅរក្សាទុកនៅអធិការស្រុកបណ្ដោះអាសន្នរងចាំការដោះស្រាយនៅពេលក្រោយ៕
អត្ថបទ និង រូពភាព៖ អ៊ុន ណារាជ្យ
