លោក ង៉ា ចុង ចៅសង្កាត់នគរធំ បានបញ្ជាក់ថា នៅក្នុងឆ្នាំ២០១៩ សង្កាត់នគរធំ បានប្រើប្រាស់ថវិកាមូលនិធិសង្កាត់ ធ្វើការជួសជុលផ្លូវក្រាលគ្រួសក្រហម១ខ្សែ ប្រវែង២.០៧៥ម៉ែត្រ ស្ថិតនៅក្នុងភូមិស្រះស្រង់ខាងត្បូង និងភូមិអារក្សស្វាយ និងឆ្នាំ២០២០ សង្កាត់បានជួសជុលផ្លូវចំនួន២ខ្សែទៀត ស្ថិតនៅក្នុងភូមិស្រះស្រង់ខាងត្បូងមានប្រវែង៩២០ម៉ែត្រ និងភូមិអញ្ចាញ មានប្រវែង២.៣២៣ម៉ែត្រ ដើម្បីជួយសម្រួលដល់ការធ្វើដំណើររបស់ប្រជាពលរដ្ឋ ។ លោក ង៉ា ចុង មានប្រសាសន៍យ៉ាងដូច្នេះ នៅក្នុងកម្មវិធីសន្ទនាមតិរបស់វិទ្យុ និង ទូរទស្សន៍ជាតិខេត្តសៀមរាប នាព្រឹកថ្ងៃទី១៥ ខែមីនា ឆ្នាំ២០២១ម្សិលមិញនេះ ។
លោកចៅសង្កាត់ មានប្រសាសន៍ទៀតថា នៅក្នុងឆ្នាំ២០២១ នេះ សង្កាត់មានគម្រោងជួសជុលផ្លូវក្រាលគ្រួសក្រហមចំនួន២ខ្សែទៀត ដែលខ្សែទី១ ហៅថា ផ្លូវបឹងមាលា មានប្រវែង១.៤៩៤ម៉ែត្រ ស្ថិតនៅក្នុងភូមិស្រះស្រង់ខាងត្បូង តភ្ជាប់ពីផ្លូវគ្រួសក្រហមប្រាសាទបាតជុំ ទៅទល់នឹងឃុំអំពិល ក្នុងស្រុកប្រាសាទបាគង និងផ្លូវ១ខ្សែទៀត មានប្រវែង១.០០០ម៉ែត្រ ស្ថិតនៅក្នុងភូមិអារក្សស្វាយ ។
លោក ង៉ា ចុង មានប្រសាសន៍ទៀតថា ការប្រើប្រាស់ថវិកាមូលនិធិឃុំ សង្កាត់ គឺតែងតែយកមកអភិវឌ្ឍន៍ក្នុងមូលដ្ឋានជាចាំបាច់ ប្រកបដោយតម្លាភាព និងត្រឹមត្រូវ ដោយមានក្រុមការងារបានធ្វើការផ្សព្វផ្សាយ ដោយសហការជាមួយអង្គការរ៉ាឆា ដើម្បីបង្ហាញឲ្យបងប្អូនប្រជាពលរដ្ឋដឹងបានយល់ពីការប្រើប្រាស់ថវិកាមូលនិធិឃុំ យកទៅប្រើប្រាស់លើការងារអ្វីនោះ ។
បងស្រីម្នាក់ឈ្មោះ ជោ ជាប្រជាពលរដ្ឋរស់នៅក្នុងសង្កាត់នគរធំ បានសម្ដែងនូវភាពសប្បាយរីករាយចំពោះអាជ្ញាធរ ដែលបានជួសជុលផ្លូវនៅក្នុងមូលដ្ឋាននេះ ប៉ុន្តែមានប្រជាពលរដ្ឋភាគច្រើន សូមសំណូមពរឲ្យអាជ្ញាធរធ្វើជាផ្លូវ គួរចាក់កៅស៊ូ ឬជាផ្លូវបេតុងវិញ ។
ពាក់ព័ន្ធនឹងការធ្វើផ្លូវជាផ្លូវចាក់កៅស៊ូ ឬផ្លូវបេតុងនោះ លោក ង៉ា ចុង បានបញ្ជាក់ថា ចំពោះបញ្ហានេះ សង្កាត់កំពុងធ្វើការពិចារណាទៅកញ្ចប់ថវិកាដែលទទួលបានពីរាជរដ្ឋាភិបាល និង កំពុងសិក្សាទៅលើតំបន់ណាដែលមានអាទិភាព ដូច្នេះពេលសិក្សាចប់ សង្កាត់ពិនិត្យទៅលើលទ្ធភាពរបស់ខ្លួន ក្នុងការធ្វើផ្លូវ ជាផ្លូវចាក់កៅស៊ូ ឬផ្លូវបេតុងនោះ។
គួររំលឹកថា នៅក្នុងឱកាសអញ្ជើញចូលរួមជាអធិបតីក្នុងកិច្ចប្រជុំសាមញ្ញលើកទី២១ របស់ក្រុមប្រឹក្សាខេត្ត អណត្តិទី៣ កន្លងទៅថ្មីៗនេះ ឯកឧត្តម ទៀ សីហា អភិបាលខេត្តសៀមរាប បានផ្ដល់អនុសាសន៍ដល់លោក លោកស្រី ជាប្រធានក្រុមប្រឹក្សាឃុំសង្កាត់ គួរគប្បីបញ្ឈប់ការលើកគម្រោងស្ថាបនាផ្លូវក្រាលគ្រួសក្រហមនៅមូលដ្ឋាន ដោយការធ្វើកំណែទម្រង់ថ្មី ដោយការប្រើប្រាស់គម្រោងសាងសង់ផ្លូវបេតុងវិញ តាមលទ្ធភាពដែលអាចធ្វើបាន ដើម្បីអភិវឌ្ឍបណ្តាញផ្លូវជនបទ ដែលជាបទដ្ឋានថ្មីសម្រាប់អនាគត ៕
អត្ថបទ៖ លោក ទិត្យ សំបូរ
កែសម្រួល៖ លោក លីវ សាន្ត
