លោក សយ វណ្ណា អភិបាលរងស្រុកប្រាសាទបាគង មានប្រសាសន៍ថា ស្ថិតក្នុងបរិការណ៍ជំងឺកូវីដ១៩ឆ្លងជាសកល ជាពិសេសកម្ពុជាបានឆ្លងចូលសហគមន៍ ដែលជាការព្រួយបារម្ភរបស់ប្រមុខថ្នាក់ដឹកនាំប្រទេសនិងប្រជាពលរដ្ឋទូទាំងប្រទេស ហើយដំណាក់កាលនេះ ជាដំណាក់លំបាកដែលបុគ្គលគ្រប់រូប មានកាតព្វកិច្ចចាំបាច់ក្នុងការចូលរួមអនុវត្តន៍វិធានការសុខាភិបាល និងវិធានការផ្សេងៗទៀតដែលសម្តេចអគ្គតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងក្រសួងសុខាភិបាលបានដាក់ចេញ ដូច្នេះដើម្បីទប់ស្កាត់ការឆ្លងរីករាលដាលនៃជំងឺកូវីដ-១៩ចូលសហគមន៍ ក្នុងឱកាសនេះ សូមអំពាវនាវដល់បងប្អូនប្រជាពលរដ្ឋទាំងអស់ ត្រូវរួមសាមគ្គីគ្នាប្រយុទ្ធនឹងសត្រូវអត់ស្រមោលនិងមិនដឹងថានៅទីណានោះ ជាពិសេសសត្រូវកូវីដ-១៩ បម្លែងថ្មីនាពេលនេះ ហេតុនេះបរាជ័យ ឬជោគជ័យ គឺអាស្រ័យលើការចូលរួមរបស់បងប្អូនទាំងអស់គ្នា ។
លោក សយ វណ្ណា មានប្រសាសន៍យ៉ាងដូច្នេះ នៅក្នុងពិធីជួបសំណេះសំណាល និងចែកស្បៀងអាហារ ជូនដល់បងប្អូនប្រជាពលរដ្ឋ ចាស់ជរា និងជួបការលំបាកក្នុងជីវភាពចំនួន២១គ្រួសារ ចំណុះជើងវត្តប្រាសាទលលៃក្នុងស្រុកប្រាសាទបាគង កាលពីរសៀលថ្ងៃទី១៥ខែកុម្ភៈ ឆ្នាំ២០២១ម្សិលមិញនេះ ។
លោក សយ វណ្ណា មានប្រសាសន៍បន្ថែមថា ជាមួយគ្នានេះ ប្រសិនបើបានឃើញបងប្អូនប្រជាពលរដ្ឋយើងដែលមកពីខេត្តផ្សេង ជាពិសេស បណ្ដាខេត្ត និងរាជធានីភ្នំពេញ ដែលកំពុងមានការឆ្លងរីករាលដាលនៃជំងឺកូវីដ-១៩នោះ ចូលមកមូលដ្ឋានរបស់យើង ត្រូវប្រញ៉ាប់រាយការណ៍ទៅអាជ្ញាធរមូលដ្ឋានឬសមត្ថកិច្ចដែលនៅជិតបំផុត ដើម្បីសាកសួរព័ត៌មានពីគាត់ ដោយឡែកចំពោះលោកយាយលោកតាដែលមកសមាទានសីលនៅតាមទីអារាមនានា ក៍ត្រូវចូលរួមបង្ការនិងទប់ស្កាត់ទាំងអស់គ្នា តាមការណែនាំរបស់ក្រសួងសុខាភិបាល និងវិធានការ៣ការពារ និង៣កុំ របស់សម្តេចតេជោ សែន រួមមាន ៖ ៣ការពារ គឺ១. ដោយការពាក់ម៉ាស់ , ២. លាងសំអាតដៃឱ្យបានញឹកញាប់ និង ៣. រក្សាគម្លាតសុវត្ថិភាពសង្គម ពីបុគ្គលម្នាក់ទៅម្នាក់ឱ្យបានយ៉ាងតិចមួយម៉ែត្រកន្លះឡើងទៅឱ្យបានគ្រប់ៗគ្នា និង ៣កុំ គឺ១. កុំចូលទៅទីកន្លែងបិទជិតខ្យល់ចេញចូលនិងប្រើម៉ាស៊ីនត្រជាក់ច្រើន , ២. កុំទៅទីដែលមានមនុស្សច្រើនកុះករ និង៣. កុំប៉ះពាល់គ្នា ជួបជុំគ្នាច្រើនជាដើម ។
ព្រះតេជគុណ រតនឃោសកោ សោម សេរីឬទ្ឋី នាយកប្រតិបត្តិសមាគមមត៌កព្រះពុទ្ធសាសនានិងសង្គម មានសង្ឃដីកាថា៖ រាជរដ្ឋាភិបាលក អង្គការសង្គមស៊ីវិល និងផ្នែកឯកជន ជាតួអង្គទាំងបីយ៉ាងសំខាន់ដើម្បីឱ្យសង្គមជាតិ មានការរីកចម្រើនទាំងគ្រប់ផ្នែក គ្រប់វិស័យ ហេតុនេះព្រះសង្ឃក៏ជាចំណែកមួយក្នុងការអភិវឌ្ឍប្រទេសជាតិដែរ ដូច្នេះការនាំយកទេយ្យទានវត្ថុជាគ្រឿងឧបភោគបរិភោគបន្តិចបន្តួច ជូនដល់ជនចាស់ជរា និងអ្នកខ្វះខាតខ្លាំងក្នុងជីវភាព ក្នុងអំឡុងពេលប្រទេសកម្ពុជាកំពុងជួបនូវវិបត្តិកូវីដ-១៩នេះ គឺជាជាសទ្ឋាចូលរួមបំពេញបុណ្យកុសល រួមចំណែកជាមួយរាជរដ្ឋាភិបាល ក្នុងការលើកកំពស់វប្បធម៌ចែករំលែកសាមគ្គីគ្នាទៅវិញទៅមក ទៅតាមលទ្ឋភាពដែលមាន រវាងព្រះសង្ឃនិងពុទ្ធបរិស័ទ ។
គួររំលឹកថា ទេយ្យទានទាំងអស់នេះ បានមកពីការចូលរួមរបស់ព្រះចៅអធិការវត្ត និងព្រះសង្ឃមួយចំនួន និងមួយអន្លើបានមកពីការចូលរួមរបស់សប្បុរសជនជិតឆ្ងាយ ចែកជូនដល់ចាស់ជរា និងគ្រួសារជួបការលំបាកក្នុងជីវភាព ដែលក្នុងមួយគ្រួសារទទួលបាន អង្ករ ២០គីឡូក្រាម , មី១កែស , ត្រីខ១យួរ , ទឹកត្រី២ដប , ទឹកស៊ីអ៊ីវ២ដប , ស្កសរ១គីឡូក្រាម និងថវិកា៣០.០០០រៀល ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
