នៅព្រឹកថ្ងៃទី១៨ ខែមីនា ឆ្នាំ២០២១នេះ រដ្ឋបាលខេត្តសៀមរាប បានចេញសេចក្តីប្រកាសព័ត៌មានមួយ ស្ដីពីការដាក់ទីតាំងត្រួតពិនិត្យសុខភាពបឋម ស្រង់ព័ត៌មាន និង ស្តេន QR Code ទប់ស្កាត់កូវីដ-១៩ ចំពោះអ្នកធ្វើដំណើរចូលមកក្នុងខេត្តសៀមរាប ដែលគ្រោងនឹងបង្កើតដាក់ទីតាំងត្រួតពិនិត្យសុខភាពបឋមមួយកន្លែងបន្ថែមទៀត នៅលើកំណាត់ផ្លូវជាតិលេខ៦ ចំណុចព្រំប្រទល់ស្រុកក្រឡាញ់ ខេត្តសៀមរាប និង ស្រុកព្រះនេត្រព្រះ ខេត្តបន្ទាយមានជ័យ ដែលនឹងត្រូវអនុវត្តចាប់ពីថ្ងៃទី២០ ខែមីនា ឆ្នាំ២០២១ នេះតទៅ ខណៈដែលទីតាំងទីមួយនៅផ្លូវជាតិលេខ៦ ចំណុចព្រំ ប្រទល់ស្រុកជីក្រែង ខេត្តសៀមរាប-ខេត្តកំពង់ធំ បាននឹងកំពុងតែដំណើរការអនុវត្តត្រួតពិនិត្យនាពេលបច្ចុប្បន្ននេះ ។
សេចក្តីប្រកាសព័ត៌មានបានបញ្ជាក់ទៀតថា ការបង្កើតការដាក់ទីតាំងត្រួតពិនិត្យសុខភាពបឋមនេះ ធ្វើឡើងក្នុងគោលបំណងបង្ការទប់ស្កាត់ការរីករាលដាលនៃជំងឺកូវីដ-១៩ ឆ្លងចូលសហគមន៍ក្នុងភូមិសាស្ត្រខេត្តសៀមរាប និងបង្កលក្ខណៈងាយស្រួលដល់មន្ត្រីជំនាញ ក្នុងការស្រាវជ្រាវពាក់ព័ន្ធនឹងជំងឺកូវីដ-១៩ ព្រមទាំងបានអំពាវនាវដល់បងប្អូនប្រជាពលរដ្ឋ និងសាធារណជនទូទៅ ចូលរួមផ្តល់កិច្ចសហការ និងផ្តល់ព័ត៌មានជូនដល់ក្រុមការងារ ដែលប្រចាំការនៅទីតាំងនោះ ។
លោកវេជ្ជបណ្ឌិត ក្រុស សារ៉ាត់ ប្រធានមន្ទីរសុខាភិបាលខេត្ត នៃរដ្ឋបាលខេត្តសៀមរាប បានមានប្រសាសន៍ថា ដើម្បីចូលរួមជាមួយរាជរដ្ឋាភិបាលក្នុងការទប់ស្កាត់ការឆ្លងរាលដាលនៃជំងឺ១៩នេះ រដ្ឋបាលខេត្តសៀមរាប ក្រោមការដឹកនាំរបស់ឯកឧត្ដម ទៀ សីហា អភិបាលខេត្ត បានផ្ដួចផ្ដើមបង្កើតប៉ុស្តិ៍ត្រួតពិនិត្យសុខភាពបឋមដំបូង នៅចំណុចព្រំប្រទល់ស្រុកជីក្រែង ខេត្តសៀមរាប និងស្រុកស្ទោង ខេត្តកំពង់ធំ ដើម្បីត្រួតពិនិត្យសុខភាពពលរដ្ឋដែលមានបំណងចូលមកក្នុងខេត្តសៀមរាប គោលបំណងសំខាន់នៃការត្រួតពិនិត្យនេះ គឺការការពារ និង ទប់ស្កាត់ការឆ្លងរាលដាលជំងឺកូវីដ១៩ ទៅក្នុងក្រុមគ្រួសាររបស់យើង និង សហគមន៍របស់យើង បានទាន់ពេលវេលា ដូច្នេះសំណូមពរដល់បងប្អូនប្រជាពលរដ្ឋទាំងអស់ដែលបានចូលមកក្នុងខេត្តសៀមរាប មេត្តាអធ្យាស្រ័យ និង ចូលរួមសហការជាមួយរដ្ឋបាលខេត្តក្នុងការអនុវត្តការងារនេះប្រកបដោយភាពរលូន ។
សូមបញ្ជាក់ថា កាលពីថ្ងៃទី០៩ខែមីនា ឆ្នាំ២០២១នេះ ឯកត្តម ទៀ សីហា អភិបាលខេត្តសៀមរាប បានសម្រេចដាក់ចេញវិធានការត្រួតពិនិត្យសុខភាពបឋម នៅចំណុចព្រំប្រទល់ស្រុកជីក្រែង ខេត្តសៀមរាប និងស្រុកស្ទោង ខេត្តកំពង់ធំ ហើយការដឹកទំនិញ និងប្រជាពលរដ្ឋ អាចធ្វើដំណើរឆ្លងកាត់បានជាធម្មតា ដោយមិនមានការហាមឃាត់នោះឡើយ ដោយគ្រាន់តែមានការត្រួតពិនិត្យសុខភាពបឋម ប៉ុន្តែមិនមានតម្រូវឱ្យធ្វើចត្តាឡីស័ក លើកលែងតែករណីសង្ស័យ ហើយក្នុងនោះ ក្រុមការងារក៏បានណែនាំដល់ជាពលរដ្ឋ ឱ្យអនុវត្តការវាស់កំដៅខ្លួន និង ការស្កែន QR Code Stop COVID-19 “ទប់ស្កាត់ ជំងឺកូវីដ១៩”ផងដែរ ៕
អត្ថបទ ៖ លោក លីវ សាន្ត
