ថ្ងៃទី១៧ ខែមីនា ឆ្នាំ២០២១នេះ កម្លាំងការិយាល័យនគរបាលប្រឆាំងបទល្មើសសេដ្ឋកិច្ច ខេត្តសៀមរាប ដឹកនាំដោយលោកឧត្តមសេនីយ៍ត្រី ម៉ក់ ធារ៉ា ស្នងការរងទទួលការិយាល័យនគរបាលប្រឆាំងបទល្មើសសេដ្ឋកិច្ចខេត្ត សហការណ៍ជាមួយអធិការស្រុកជីក្រែង បានធ្វើការឃាត់រថយន្តក្រុង មួយគ្រឿង ដែលមានដឹកឈើប្រណិតមួយចំនួន ក្នុងនៅត្រង់ចំណុចភូមិថ្នល់ ឃុំល្វែងឬស្សី ស្រុកជីក្រែង ខេត្តសៀមរាប។
លោកឧត្តមសេនីយ៍ត្រី ម៉ក់ ធារ៉ា បានឲ្យដឹងថា រថយន្តខាងលើជាប្រភេទរថយន្ត៤៥កៅអី ពាក់ស្លាកលេខភ្នំពេញ3C.6161 ជារបស់ក្រុមហ៊ុនទេពសុខា បើកបរដោយឈ្មោះ យិន ស៊ីដែន រស់នៅស្រុកមុខកំពូល ខេត្តកណ្តាល ដែលមានបំណងធ្វើដំណើរចេញពីច្រកអូរស្មាច់ឆ្លងកាត់ខេត្តសៀមរាបឆ្ពោះទៅភ្នំពេញ ដែលក្នុងរថយន្តនោះ មានផ្ទុកឈើកែច្នៃដូចជា៖ គ្រឿងទ្វា ៣០គ្រឿងដែលជាឈើគគីរ ,កូនក្រឡឹង ៧០ដុំ ,សុក្រមស្នួរ ១០ដើម។ បន្ទាប់ពីត្រួតពិនិត្យរួចកម្លាំងលោកបានប្រគល់ទាំងវត្ថុតាង និងអ្នកបើកបរឲ្យកម្លាំងរដ្ឋបាលព្រៃឈើស្រុកជីក្រែងចាត់ការបន្ត។
បើតាមលោក ហុង ដា នាយរដ្ឋបាលព្រៃឈើជីក្រែង បានឲ្យដឹងដែរថា បច្ចុប្បន្នចំពោះវត្ថុតាង និងម្ចាស់រថយន្តកម្លាំងរដ្ឋបាលព្រៃឈើ បាននឹងកំពុងធ្វើកំណត់ហេតុ និងរបាយការណ៏ដាក់ជូនទៅនាយរដ្ឋបាលខ័ណ្ឌ។ ចំពោះវត្ថុតាងត្រូវបានរក្សាទុកនៅផ្នែករដ្ឋបាលព្រៃឈើស្រុកជីក្រែងបណ្ដោះអាសន្ន៕
អត្ថបទ និង រូបភាព៖ ស៊ាន សុផាត
កែសម្រួល៖ អ៊ុន ណារាជ្យ
