មានប្រសាសន៍នៅក្នុងពិធីបើកដំណើរការចាក់វ៉ាក់សាំងដូសទី២ ដល់កងកម្លាំងចម្រុះជាង២ម៉ឺននាក់នៃយោធភូមិភាគទី៤ កាលពីថ្ងៃទី១៨ ខែមីនា ឆ្នាំ២០២១នេះ លោកឧត្ដមសេនីយ៍ឯក ពៅ ហេង មេបញ្ជាការរងកងទ័ពជើងគោក និងជាមេបញ្ជាការយោធភូមិភាគទី៤ បានព្រមានចាត់វិធានការមិនទទួលខុសត្រូវអោយចូលអង្គភាព ចំពោះយោធិនណាមិនចូលរួមអនុវត្ដការពារជំងឺកូវីដ១៩ តាមបទបញ្ជនិងតាមការណែនាំរបស់រាជរដ្ឋាភិបាល ក៍ដូចជាក្រសួងសុខាភិបាល តាមពាក្យស្លោក៣កុំ៣ការពារ ដើម្បីទប់ស្កាត់ការឆ្លងជំងឺកូវីដ១៩។ ការព្រមានធ្វើឡើងក្រោយមានយោធិនពីររូបនៅក្រសួងការពារជាតិ បានឆ្លងកូវីដ១៩បើទោះបីចាក់វ៉ាក់សាំងរួចក៍ដោយ។
លោកឧត្ដមសេនីយ៍ឯក ពៅ ហេង ក៏បានណែនាំដល់មេបញ្ជាការនៅគ្រប់តាមបណ្ដាអង្គភាពទាំងអស់ ដែលចំណុះអោយយោធភូមិភាគទី៤ ត្រូវណែនាំដល់យោធិនរបស់ខ្លួនអោយអនុវត្ដ៣កុំ និង៣ការពារ តាមការណែនាំរបស់រាជរដ្ឋាភិបាលក៍ដូចជាក្រសួងសុខាភិបាលអោយបានជាប់ជាប្រចាំ។ ក្នុងនោះតាមអង្គភាពនីមួយៗ ត្រូវដាក់កន្លែងត្រួតពិនិត្យឆែកកំដៅ និងមានទឹកអាកុលសម្រាប់លាងដៃ និងត្រូវពាក់ម៉ាស់ជាប្រចាំនៅពេលចូលបំពេញកាងារ ហើយមិនត្រូវអនុញ្ញាតចំពោះអ្នកដែលមិនស្គាល់អត្ដសញ្ញាណចូលអង្គភាពនោះឡើយ ទោះបីគ្រួសារកងទ័ពក៍ដោយ។
លោកឧត្ដមសេនីយ៍ឯក បន្ថែមថា ចំពោះកងកម្លាំងប្រដាប់អាវុធទាំងអស់ពេលចេញពីអង្គភាពវិញហើយធ្វើដំណើរទៅផ្ទះវិញត្រូវពាក់ម៉ាស់អោយបានត្រឹមត្រូវជាប់ជាប្រចាំ ហើយបើសិនជាមានបញ្ហាណាមួយកើតឡើង ឬសមត្ថកិច្ចឃាត់ខ្លួន អង្គភាពមិនទទួលខុសត្រូវនោះទេ។ ដោយឡែកចំពោះយោធិនដែលមកពីតាមខេត្ដផ្សេងៗដែលជាប់ពាក់ព័ន្ធព្រឹត្ដិការណ៍សហគមន៍២០កុម្ភៈ មុនអោយចូលក្នុងភូមិសាស្ដ្រដែលគ្រប់គ្រងដោយយោធភូមិភាគទី៤ ត្រូវអោយធ្វើចត្ដាឡីស័ក១៤ថ្ងៃ ដើម្បីទប់ស្កាត់ការឆ្លងជំងឺចូលក្នុងអង្គភាព។
លោកបញ្ជាក់ទៀតថា បច្ចុប្បន្នមន្ទីរពេទ្យយោធភូមិភាគទី៤ បានត្រៀមកន្លែងធ្វើចត្ដាឡីស័ករួចរាល់ហើយសម្រាប់ដាក់កងកម្លាំងប្រដាប់អាវុធទាំងអស់ដែលមានការជាប់ពាក់ព័ន្ធនឹងព្រឹត្ដិការណ៍សហគមន៍២០កុម្ភៈ ព្រមទាំងចំពោះយោធិនណាដែលមកពីតាមបណ្ដាខេត្ដដែលឆ្លងកូវីដ១៩ផងដែរ។ ជាមួយគ្នានោះលោកក៍បានធ្វើការកោតសរសើរ ចំពោះមេបញ្ជាការកងឯកភាពទាំងអស់ ដែលបានទប់ស្កាត់ក្នុងការការពារជំងឺកូវីដ១៩ បានល្អក្នុងនៅក្នុងអង្គភាព៕
អត្ថបទ និងរូបភាព៖ ឈិត សាវី
កែសម្រួល៖ អ៊ុន ណារាជ្យ
