នៅព្រឹកថ្ងៃទី២០ ខែមីនា ឆ្នាំ២០២១នេះ ឯកឧត្តម លន់ សុធី ប្រធានក្រុមការងាររាជរដ្ឋាភិបាលចុះជួយស្រុកស្រីស្នំខេត្តសៀមរាប បានដឹកនាំក្រុមការងារអញ្ជើញចុះជួបសំណេះសំណាល សួរសុខទុក្ខ និងចែកអំណោយជូនបងប្អូនប្រជាពលរដ្ឋដែរកំពុងធ្វើចត្តាឡីស័កក្នុងស្រុកស្រីស្នំ ចំនួន១៧៧នាក់ នៅក្នុងទីតាំងទាំង ៤កន្លែង ដោយក្នុងម្នាក់ទទួលបាន៖ អង្ករ៥គីឡូក្រាម សាប៊ូ១ដុំ ត្រីខ៣កំប៉ុង មី៥កញ្ចប់ ទឹកស៊ីវ១ដប ទឹកត្រី១ដប អំបិល១គីឡូក្រាម ស្ករសកន្លះគីឡូក្រាម ម៉ាស់១០ម៉ាស់ ទឹកសុទ្ធ១យួរ និងថវិកាមួយចំនួន។
ឯកឧត្តម លន់ សុធី មានប្រសាសន៏ថា ចំពោះការធ្វើចត្តាឡីស័កក្នុងរយ:ពេល១៤ថ្ងៃនេះ គឺសូមឲ្យបងប្អូនទាំងអស់គ្នាត្រូវមានការអត់ធ្មត់ចំពោះការដាក់ឲ្យដាច់ដោយឡែកពីគ្នានេះ ដោយយើងចូលរួមទប់ស្កាត់នៃការរីករាលដាលជំងឺកូវីដ-១៩ គឺយើងត្រូវពាក់ម៉ាស់ជាប្រចាំ លាងសំអាតដៃឲ្យបានញឹកញាប់ និងរក្សាគម្លាតសុវត្ថិភាពបុគ្គលយ៉ាងតិច ១.៥០ម៉ែត្រឡើងទៅ។ ក្នុងនោះបន្ទប់ដេកត្រូវបើកទ្វារបង្អួចឲ្យមានខ្យល់ចេញចូល កុំទៅកន្លែងមនុស្សច្រើនកុះករ កុំចាប់ដៃគ្នា និងកៀកស្មាគ្នាជាដើម។
សូមជម្រាបថា នៅក្នុងស្រុកស្រីស្នំមានមណ្ឌលចត្តាឡីស័កចំនួន ៤កន្លែង ស្មើនឹង១២ខ្នង មាន៤៨បន្ទប់ ដែលទីតាំងទាំងនោះរួមមាន៖ ១.សាលាបឋមសិក្សាពង្រ ,២.សាលាអនុវិទ្យាល័យមោង ,៣.សាលាបឋមសិក្សាប្រិយ៍ និង ៤.សាលាបឋមសិក្សាភ្នំដី។ ដោយឡែកចំនួនប្រជាពលរដ្ឋដែលបានធ្វើចត្តាឡីស័កគិតចាប់ពីថ្ងៃទី០៨ ខែមីនា មកទល់ថ្ងៃនេះ មានចំនួនសរុប ២៥១នាក់ ស្រី១១១នាក់ ក្នុងនោះបានបញ្ចប់ចត្តាឡីស័កសរុបចំនួន៧៤នាក់ និងកំពុងធ្វើចត្តាឡីស័ក ១៧៧នាក់៕
អត្ថបទ និង រូបភាព៖ ស៊ាន សុផាត
កែសម្រួល៖ អ៊ុន ណារាជ្យ
