នៅរសៀលថ្ងៃទី២០ ខែមីនា ឆ្នាំ២០២១ ក្រុមការងារសាលគណខេត្តសៀមរាប ដឹកនាំដោយព្រះតេជគុណ ស៊ុម ពិសិដ្ឋ ព្រះធម្មានុរ័ក្ខញាណ ព្រះសមុហ៍គណខេត្ត និងព្រះវិជ័យរង្សី ឡាច លាង ព្រះធម្មធរគណខេត្ត រួមជាមួយព្រះថេរានុត្ថេរ ជាព្រះគ្រូចៅអធិការវត្តក្នុងខេត្តមួយចំនួនទៀត បានចុះទៅសួរសុខទុក្ខក្រុមការងារត្រួតពិនិត្យនៅព្រំដែន រវាងស្រុកជីក្រែងខេត្តសៀមរាប និងស្រុកស្ទោងខេត្តកំពងធំ ដោយបាននាំយកនូវសម្ភារៈមួយចំនួនរួមមាន៖ ទឹកសុទ្ធ១០យួរ និង៦កេស ភេសជ្ជៈ៧កេស ម៉ាស២២ប្រអប់ ទឹកអាកុលបាញ់សម្លាប់មេរោគ៣០លីត្រ និងថវិកាចំនួន២២ម៉ឺនរៀល ជូនដល់ក្រុមការងារប្រចាំការនៅប៉ុស្តិត្រួតពិនិត្យសុខភាពបឋមដើម្បីបង្ការទប់ស្កាត់ការរីករាលដាលនៃជំងឺកូវីដ-១៩។
លោក ម៉ូវ ជា អភិបាលរងស្រុកជីក្រែង មានប្រសាសន៍ថា៖ការរៀបចំប៉ុស្តិត្រួតពិនិត្យសុខភាពបឋមនៅទីនេះគឺ ចាប់អនុវត្តពីថ្ងៃទី០៩ ខែមីនា ឆ្នាំ២០២១ មកដល់ពេលនេះ ក្រោមការបញ្ជារដឹកនាំ ដោយឯកត្តម ទៀ សីហា អភិបាលខេត្ត និងជាប្រធានគណៈបញ្ជាការឯកភាពរដ្ឋបាលខេត្តសៀមរាប បានណែនាំដល់កងកម្លាំងប្រដាប់អាវុធទាំងបីប្រភេទក្នុងខេត្ត អាជ្ញាធរមូលដ្ឋាននៅព្រំប្រទល់ស្រុកជីក្រែងខេត្តសៀមរាប និងស្រុកស្ទោងខេត្តកំពង់ធំ តាមបណ្តោយផ្លូវជាតិលេខ៦ ឱ្យរួមសហការជាមួយក្រុមការងារនៃមន្ត្រីសុខាភិបាលខេត្តសៀមរាប រៀបចំប៉ុស្តិត្រួតពិនិត្យសុខភាពបឋម និងស្រង់ស្ថិតិប្រជាពលរដ្ឋ ដែលធ្វើដំណើរចេញពីរាជធានីភ្នំពេញ និងបណ្ដាខេត្តមួយចំនួន ដើម្បីបង្ការទប់ស្កាត់ ការរីករាលដាលនៃជំងឺកូវីដ-១៩ ក្នុងសហគមន៍។
លោកអភិបាលរងស្រុក បន្ថែមថាការរៀបចំប៉ុស្តិ៍ត្រួតពិនិត្យនេះមិនមែនជាការបិទផ្លូវធ្វើដំណើររបស់បងប្អូនប្រជាពលរដ្ឋនោះទេ គឺគ្រាន់តែធ្វើការត្រួតពិនិត្យសុខភាពបឋម និងស្រង់ស្ថិតិ នៅចំណុចព្រំប្រទល់នេះ ដើម្បីងាយស្រួលក្នុងការតាមដានព័ត៌មាន និងងាយស្រួលគ្រប់គ្រងស្ថានការដែលកើតឡើងជាយថាហេតុពីការរឆ្លងជំងឺកូវីដ-១៩ ព្រមទាំងណែនាំឱ្យអនុវត្តការស្កែន QR Code Stop COVID-19ទប់ស្កាត់ ជំងឺកូវីដ-១៩ផងដែរ ដោយមិនមានតម្រូវឱ្យធ្វើចត្តាឡីស័កទេ លើកលែងតែករណីសង្ស័យ។ រីឯការដឹកទំនិញ និងប្រជាពលរដ្ឋ អាចធ្វើដំណើរឆ្លងកាត់បានជាធម្មតា ដោយមិនមានការហាមឃាត់នោះឡើយ។
ក្នុងនាមរដ្ឋបាលស្រុក ក៏សូមថ្លែងអំណរព្រះគុណនូវព្រះទ័យយកចិត្តទុកដាក់របស់មន្ត្រីសាលាគណខេត្ត និងបានចាត់ទុកសកម្មភាពនេះថាជាការចូលរួម ជាមួយរាជរដ្ឋាភិបាល ក្នុងការទប់ស្កាត់ជម្ងឺឆ្លងកូវីដ-១៩ (COVID-19) ដែលកំពុងបង្កហានិភ័យដោយគម្រាមកំហែងមកលើសុខភាព និងអាយុជីវិតប្រជាជនកម្ពុជានាពេលបច្ចុប្បន្ន៕
អត្ថបទ និង រូបភាព៖ យូ វង្ស
