ទំនិញនិងម្ហូបអាហារដែលមានផ្ទុកសារធាតុគីមី ពុំមានសុវត្ថិភាពទម្ងន់ជាង៨០គីឡូក្រាមដែរបានដាក់លក់នៅក្នុងផ្សារស្រែណូយ ឃុំស្រែណូយ ស្រុកវ៉ារិន ខេត្តសៀមរាប នៅថ្ងៃទី១៩ ខែមីនា ឆ្នាំ២០២១ ត្រូវបានមន្ត្រីសាខាការពារអ្នកប្រើប្រាស់ កិច្ចការប្រកួតប្រជែង និងបង្រ្កាបការក្លែងបន្លំខេត្តសៀមរាប បានធ្វើការដកហូតយកទៅដុតកំទេចចោល ដោយប្រតិបត្តិការណ៍នេះមានការចូលរួមពីលោក ប៊ុត វិបុល អភិបាលរងស្រុកវ៉ារិន មន្ត្រីជំនាញនៃសាខាការពារអ្នកប្រើប្រាស់ កិច្ចការប្រកួតប្រជែង និងបង្រ្កាបការក្លែងបន្លំខេត្ត មន្ទីរពាណិជ្ជកម្មខេត្តសៀមរាប កម្លាំងនៃអធិការដ្ឋានស្រុកវ៉ារិន និងមន្ត្រីឃុំស្រែណូយផងដែរ។
លោក ខៀវ បញ្ញាវឌ្ឍន៍ ប្រធានសាខាការពារអ្នកប្រើប្រាស់ កិច្ចការប្រកួតប្រជែង និងបង្រ្កាបការក្លែងបន្លំខេត្តសៀមរាប បានអោយដឹងថា ម្ហូបអាហារខូចគុណភាពដែរក្រុមការងារលោកដកហូតបានរួមមាន ទឹកកន្ទុយក្រពើ ALOE VERA ១៦២ដប នំកូនក្មេងចំនួន ៧២០កញ្ចប់ នំដំឡូងចំនួន ១០០កញ្ចប់ និងទឹកកដោះគោខាប់ចំនួន ៩កំប៉ុង ត្រូវបានដកហូតពីដេប៉ូលក់ភេសជ្ជៈធំៗ ចំនួន៣ នៅក្នុងឃុំស្រែណូយ ដែលសុទ្ធតែទំនិញហួសកាលបរិច្ឆេទ ជាទំនិញមានសំបកវេចខ្ចប់ខូចទ្រង់ទ្រាយដើម ដូចជាកំពិត ច្រែស ប៉ោង។ល។ ទំនិញទាំងនោះត្រូវបានដកហូត ហើយម្ចាស់ដេប៉ូចែកចាយទាំងអស់បានទទួលនូវការពន្យល់អប់រំពីមន្ត្រីជំនាញ ពីការថែរក្សា របៀបនៃការដាក់តាំងលក់ របៀបនៃការមើលកាលបរិច្ឆេទ ការទទួលខុសត្រូវ ដូចជាទទួលទំនិញចូលត្រូវតែមានវិក័យប័ត្រ និងការទទួលខុសត្រូវផ្លូវច្បាប់ផ្សេងៗទៀត ក្នុងការទទួលនឹងការចែកចាយទំនិញមិនមានភាពប្រក្រតីទៅនិងបទបញ្ញត្តិនានា។
លោកបញ្ជាក់ទៀតថា បើទោះបីជាយ៉ាងនេះក្តី សំណាកគំរូម្ហូបអាហារចំនួន ១៤គំរូ ក្នុងចំណោមទំនិញហូបចុក ៩មុខ ក្រុមការងារបានធ្វើការវិភាគបឋមរកសារធាតុគីមីហាមឃាត់ដោយប្រើតេស្តឃីត នៅលើទីផ្សារក្នុងឃុំស្រែណូយចំនួន ២ គឺផ្សារស្រែណូយចាស់ និងផ្សារស្រែណូយថ្មី។ ជាលទ្ធផល គឺមន្ត្រីជំនាញ បានរកឃើញពពុះសណ្តែកទម្ងន់ ១គីឡូក្រាម នៅផ្សារឃុំស្រែណូយ បានផ្ទុកសារធាតុគីមីហាមឃាត់បូរ៉ាក់។
ព័ត៌មានជាតិ ថ្មីៗ
ក្នុងឱកាសនោះដែរលោកក៏បានថ្លែងអំណរគុណដល់អាជ្ញាធរដែនដី ដែលបានចូលរួមសហការស្អិតរមួតជាមួយស្ថាប័នជំនាញក្នុងការពង្រឹងសុវត្ថិភាពម្ហូបអាហារក្នុងមូលដ្ឋាន លើកកំពស់សុខភាពសារធារណៈ ពិសេសក្នុងសម័យកាលនៃការឆ្លងរីករាលដាលនៃជម្ងឺកូវីដ-១៩ ដែលទាមទារអោយប្រជាជនយើងរស់នៅល្អ ហូបចុកល្អ និងអនុវត្តតាមអនុសាសន៍របស់សម្តេចតេជោ ហ៊ុន សែន គឺ ៣ការពារ និង៣កុំ៕
អត្ថបទ និង រូបភាព៖ ស៊ាន សុផាត
កែសម្រួល៖ អ៊ុន ណារាជ្យ
