បន្ទាប់ពីរកឃើញករណីវិជ្ជមានកូវីដ-១៩ថ្មី ១ករណី ក្នុងក្រុងសៀមរាប កាលពីថ្ងៃទី២០ ខែមីនា ឆ្នាំ២០២១ រដ្ឋបាលខេត្តសៀមរាប បានសម្រេចបិទការចេញចូលភូមិសាស្ត្រសង្កាត់គោកចក និងផ្អាកដំណើរការបណ្ដោះអាសន្ន នូវទីតាំងឯកជនមួយចំនួន ដូចជាមន្ទីរពេទ្យសម្រាកព្យាបាល៧៧៧ សៀមរាប មន្ទីរពហុព្យាបាលសុខភាព បន្ទប់ពិគ្រោះជម្ងឺ ទូច កូ និងបន្ទប់ថែទាំវេជ្ជសាស្ត្រ ចាវ ចាន់ ក្នុងក្រុងសៀមរាប ខេត្តសៀមរាប។
តាមរយៈសេចក្ដីជូនដំណឹងរបស់រដ្ឋបាលខេត្តសៀមរាប បុរសមានវិជ្ជមានកូវីដ-១៩នេះ មានទីលំនៅក្នុង ភូមិគោកត្នោត សង្កាត់គោកចក ក្រុងសៀមរាប។ បុរសរូបនេះ បានធ្វើដំណើរពីខេត្តកណ្ដាល មកកាន់ខេត្តសៀមរាប កាលពីថ្ងៃទី៨ ខែមីនា ឆ្នាំ២០២១ តាមរយៈរថយន្នឈ្នួល ក្រុមហ៊ុនឡារីតា។
ជាមួយនឹងប្រវត្តិធ្វើដំណើររបស់បុរសមានវិជ្ជមានកូវីដ-១៩ ដែលរដ្ឋបាលខេត្តកំណត់បាននោះ ក្រុមការងារជំនាញសុខាភិបាល រួមនិងសមត្ថកិច្ច បាននិងកំពុងស្វែងរកអ្នកពាក់ព័ន្ធ ជាមួយនឹងបុរសខាងលើ និងបានដាក់ពួកគាត់ឲ្យធ្វើចត្តាឡីស័កជាបន្តបន្ទាប់ និងប្រកដោយការប្រុងប្រយ័ត្នខ្ពស់។ ទន្ទឹមនោះ ការត្រួតពិនិត្យសុខភាពបឋម និងស្រង់ស្ថិតិអ្នកដំណើរនៅតាមព្រំប្រទល់ជាប់ខេត្តសៀមរាប នឹងនៅតែបន្តអនុវត្តន៍យ៉ាងខ្ជាប់ខ្ជួន ព្រមទាំងទីតាំងធ្វើចត្តាឡីស័កជាច្រើនកន្លែង ទាំងក្នុងក្រុង និងបណ្ដាស្រុក ដើម្បីបង្ការការពារប្រជាពលរដ្ឋក្នុងខេត្ត ចៀសផុតពីការឆ្លងជំងឺកូវីដ-១៩។
ក្នុងករណី អ្នកបានពាក់ព័ន្ធដោយផ្ទាល់ ឬ ដោយប្រយោល ឬសង្ស័យថាមានជំងឺកូវីដ-១៩ រដ្ឋបាលខេត្ត បានអំពាវនាវដល់បងប្អូនប្រជាពលរដ្ឋ៖ – ដាក់ខ្លួនឲ្យនៅដាច់ដោយឡែកពីក្រុមគ្រួសាររយៈពេល១៤ថ្ងៃ – ទំនាក់ទំនងយកសំណាកនៅមណ្ឌលចត្តាឡីស័កនៅសាលាគរុកោសល្យ – ទំនាក់ទំនងផ្តល់អត្តសញ្ញាណ និងលេខទំនាក់ទំនង មកអាជ្ញាធរមានសមត្ថកិច្ច តាមរយៈលេខទូរស័ព្ទ ០95 773 223 / ០12 522 427 / ០66 364 646។
អត្ថបទ៖ លោក សេង ផល្លី
រូបភាព៖ លោក បូ សាវី
