នៅព្រឹកថ្ងៃទី៧ ខែមេសា ឆ្នាំ២០២១នេះ រដ្ឋបាលខេត្តសៀមរាប បានចាប់ផ្ដើមដាក់ឲ្យប្រើប្រាស់ នូវកម្មវិធីគ្រប់គ្រងទិន្នន័យអ្នកដំណើរតាមដាន និងទប់ស្កាត់ ការរីករាលដាល នៃជំងឺកូវីដ-១៩ តាមប្រព័ន្ធអ៊ិនធើណិត នៅតាមប៉ុស្តិត្រួតពិនិត្យសុខភាពបឋមទាំង២ទីតាំង ដើម្បីងាយស្រួលក្នុងការគ្រប់គ្រងអ្នកដំណើរ អ្នកឆ្លងកាត់ និងចូលមកក្នុងខេត្តសៀមរាប។
តាមការឲ្យដឹងពីលោក ស៊ុន ចំណាន នាយកទីចាត់ការរដ្ឋបាលសាលាខេត្ត បង្ហាញថា កម្មវិធីគ្រប់គ្រងទិន្នន័យអ្នកដំណើរនេះ អាចប្រើប្រាស់បាននៅលើកុំព្យូទ័រ ដែលមានភ្ជាប់ប្រព័ន្ធអ៊ិនធឺណិត។ ប្រព័ន្ធគ្រប់គ្រងនេះ បានរៀបចំនៅព្រំប្រទល់រវាងខេត្តសៀមរាប និងខេត្តកំពង់ធំ និងរវាងព្រំប្រទល់ខេត្តសៀមរាប និងខេត្តបន្ទាយមានជ័យ។ ប្រព័ន្ធនេះដែរ នឹងផ្ដល់ភាពងាយស្រួល ដល់អាជ្ញាធរនៅតាមបណ្ដាក្រុងស្រុកទាំង១២ របស់ខេត្ត ទាញយកទិន្នន័យទៅប្រើប្រាស់ ក្នុងការត្រួតពិនិត្យតាមដានប្រជាពលរដ្ឋទើបត្រឡប់មកពីព្រំដែន និងតាមបណ្តារាជធានី-ខេត្តនានា ចូលមកក្នុងមូលដ្ឋាន។
ដោយឡែក យោងតាមសេចក្ដីសម្រេចរបស់រាជរដ្ឋាភិបាល ស្ដីពី ការហាមឃាត់ការធ្វើដំណើរ និងការបិទរមណីដ្ឋានទេសចរណ៍នៅទូទាំងប្រទេសជាបណ្ដោះអាសន្ន ដើម្បីទប់ស្កាត់ការឆ្លងរាលដាលនៃជំងឺកូវីដ-១៩ ដែលមានសុពលភាពចាប់ពីម៉ោង១២:០០យប់ ថ្ងៃទី០៧ រហូតដល់ថ្ងៃទី២០ ខែមេសា ដែលមានរយៈពេល១៤ថ្ងៃនេះ លោកនាយកទីចាត់ការ បញ្ជាក់ថា ក្រុមការងាររដ្ឋបាលខេត្ត បាននិងកំពុងធ្វើការត្រួតពិនិត្យយ៉ាងតឹងរ៉ឹង និងពុំអនុញាតដល់រថយន្តដឹកអ្នកដំណើរ ឬរថយន្តលក្ខណៈគ្រួសារ ឆ្លងកាត់ ឬចូលមកកាន់ខេត្តសៀមរាបឡើយ លើកលែងតែករណីរថយន្ត ឬអ្នកដំណើរ ដែលបានអនុញ្ញាតដូចមានក្នុងសេចក្ដីសម្រេច។
សូមជម្រាបថា រដ្ឋបាលខេត្តសៀមរាបកាលពីល្ងាចម្សិលមិញនេះ បានចេញសេចក្ដីណែនាំស្ដីពី៖ វិធានការបង្ការ និងទប់ស្កាត់ការរាតត្បាតនៃជំងឺកូវីដ-១៩ នៅក្នុងឱកាសឈប់សម្រាក ក្នុងពិធីបុណ្យចូលឆ្នាំខ្មែរប្រពៃណីជាតិ ចាប់ពីថ្ងៃទី១៤ ដល់ថ្ងៃទី១៦ ខែមេសា ឆ្នាំ២០២១ ណែនាំដល់ប្រជាពលរដ្ឋចៀសវាងដូចជា ការចេញក្រៅផ្ទះបើពុំមានករណីចាំបាច់ ធ្វើដំណើរទៅកន្លែងមានហានិភ័យខ្ពស់ នៃការឆ្លងរាលដាលនៃជំងឺកូវីដ-១៩ ពិធីជួបជុំផ្សេងៗនានា ដែលមានមនុស្សអ៊ូរអរ ព្រមទាំងអនុវត្តន៍វិធានការ ៣ការពារ ៣កុំ ឲ្យបានខ្ជាប់ខ្ជួនគ្រប់ៗគ្នា។
អត្ថបទ និង រូបភាព៖ សេង ផល្លី និងសហការី
