នៅថ្ងៃទី៦ ខែមេសា ឆ្នាំ២០២១ ក្រុមការងារសកម្មពល របស់សាលាគណខេត្តសៀមរាប ដឹកនាំដោយព្រះបវរវិជ្ជា ទេព ភឿន ព្រះរាជាគណៈថ្នាក់កិត្តិយស ព្រះវិន័យធរគណខេត្ត ចូលរួមដោយសហការីគណ ព្រះរាជាគណៈ ព្រះគ្រូ ព្រះចៅអធិការវត្ត និង ព្រះថេរានុត្ថេរៈមួយចំនួនក្នុងក្រុងសៀមរាប និងស្រុកប្រាសាទបាគង បាននាំយកគ្រឿងឧបភោគបរិភោគទៅប្រគល់ជូនអាជ្ញាធរស្រុកបន្ទាយស្រី និង ស្រុកប្រាសាទបាគង ដើម្បីឧបត្ថម្ភដល់អ្នកដែលកំពុងធ្វើចត្តាឡីស័កតាមមណ្ឌលដែលរៀបចំដោយអាជ្ញាធរមូលដ្ឋាន ដើម្បីលើកទឹកចិត្តឱ្យពួកគាត់ខំអត់ធ្មត់តស៊ូ អនុវត្តទៅតាមការកំណត់១៤ថ្ងៃ ឱ្យបានពេញលេញចូលរួមបង្ការទប់ស្កាត់កាត់បន្ថយ ចៀសវាងការរីករាលដាលនៃជំងឺកូវីដ-១៩ ក្នុងសហគមន៍។ គ្រឿងឧបភោគដែលប្រគល់ជូនសម្រាបស្រុកបន្ទាយស្រីមាន៖អង្ករ២៥០គីឡូក្រាម មី១០កេស ទឹកផ្លែឈើ២កេស ទឹកត្រី៩យួរទឹកស៊ីអ៊ីវ២យួរម៉ាស់ ១០ប្រអប់កាហ្វេ១០ប្រអប់ ទឹកសុទ្ឋ៤០យូរ ថវិកា៥០ម៉ឹនរៀល និងស្រុកប្រាសាទបាគងទទួលបាន៖អង្ករ១៥០គីឡូក្រាម មី១៣កេស ទឹកផ្លែឈើ២កេស ទឹកត្រី៣យួរ ម៉ាស់២ប្រអប់ កាហ្វេ១០ប្រអប់ ទឹកសុទ្ឋ២០យួរ ថវិកា៣២ម៉ឹនរៀល។
ព្រះធម្មានុរ័ក្ខញាណ ស៊ុម ពិសិដ្ឋ ព្រះសមុហ៍គណខេត្ត ព្រះរាជាគណៈថ្នាក់កិត្តិយសនៃព្រះរាជាណាចក្រកម្ពុជា និងជាព្រះចៅអធិការវត្ត មានថេរដីកាថា៖ ការនាំយកគ្រឿងឧបភោគបរិភោគ និងភេសជ្ជៈមកប្រគល់ជូននៅពេលនេះ គឺធ្វើឡើងទៅតាមសំណូមពររបស់ក្រុមការងារនៅមណ្ឌលចត្តាឡីស័កទាំងពីរស្រុកនេះថា ឱ្យជួយបន្ថែមពីលើអ្វីដែលអាជ្ញាធរស្រុកមាន ហើយសម្ភារបន្តិចបន្តួចនេះបានមកពីការចូលរួមរបស់ព្រះសង្ឃក្នុងខេត្តនិងទាយក ទាយិកា ជិតឆ្ងាយយកមកប្រគេនហើយក្រុមការងារសាលាគណខេត្ត បានធ្វើការបែងចែកទៅតាមលទ្ឋភាពដែលព្រះសង្ឃមាន ដើម្បីចែករំលែកនិងចូលរួមជាមួយរាជរដ្ឋាភិបាលក្នុងការទប់ស្កាត់កាត់បន្ថយការឆ្លងជម្ងឺឆ្លងកូវីដ-១៩ ដែលកំពុងបង្កហានិភ័យដោយគម្រាមកំហែងមកលើសុខភាព និងអាយុជីវិតប្រជាជនកម្ពុជានាពេលបច្ចុប្បន្ន ។
ក្នុងនាមសាលាគណខេត្ត ព្រះបវរវិជ្ជា ទេព ភឿន បានសំដែងនូវការកោតសរសើរ និងថ្លែងអំណរព្រះគុណជាអនេក ចំពោះក្រុមកាងារនៃមន្ត្រីសង្ឃសាលាគណខេត្ត ដែលបានយកចិត្តទុកដាក់ខ្នះខ្នែងជួយដល់អាជ្ញាធរ និងប្រជាពលរដ្ឋដែលកំពុងជួបវិបត្តិដោយការរីករាលដាលនៃមេរោគកូវីដ-១៩ ព្រមទាំងបានចាត់ទុកក្រុមនេះថាជាក្រុមការងារសកម្មពល សម្រាប់សាលាគណខេត្តទៀតផង។ ដោយសារតែតាំងពីដើមរៀងមកមន្ត្រីសង្ឃខេត្តតែងតែសហការ ពុះពារ លៃលកសន្សំសំចៃនូវទេយ្យទាន ដែលទទួលបានពីទាយកទាយិកានិងសប្បុរសជនជិតឆ្ងាយបំរុងទុកចែករំលែកជូនបងប្អូនដែលខ្វះខាតនិងជួបការលំបាកក្នុងជីភាពជាក់ស្តែង។
ព្រះអង្គក៍បានជំរុញលើកទឹកចិត្តដល់អ្នកកំពុងធ្វើចត្តាឡីស័កទាំងអស់ត្រូវតស៊ូជំនះអត់ធ្មត់អនុវត្ត និងស្នាក់នៅដាច់ដោយឡែកឱ្យបាន១៤ថ្ងៃ ទៅតាមការកំណត់និងត្រូវអនុវត្តទៅតាមការណែនាំក្រុមការងារ និងសេចក្តីណែនាំ របស់ក្រសួងសុខាភិបាល ក៍ដូចជាវិធានការ៣ការពារ និង៣កុំរបស់សម្តេចតេជោ សែន នាយករដ្ឋមន្ត្រី ក៏ដូចជាក្រសួងសុខភីបាលផងដែរ។
គួរជម្រាបផងដែរថា នៅស្រុកបន្ទាយស្រីមានមណ្ឌលចត្តាឡីស័កចំនួន៦កន្លែងកំពុងប្រើប្រាស់៣កន្លែងគិតពីថ្ងៃទី៨ ខែមីនា ដល់ថ្ងៃទី៦ ខែមេសា មានអ្នកធ្វើចត្តាឡីស័កចំនួន២៨នាក់ ដែលជាចំណូលស្រុកមកពីប្រទេសថៃ និងមួយចំនួនមកពីបណ្តាខេត្តក្នុងព្រឹត្តិការណ៍សហគមន៍២០កុម្ភៈ។
ចំណែកស្រុកប្រាសាទបាគងមានទីតាំងចត្តាឡីស័កចំនួន៧កន្លែង គិតពីថ្ងៃទី៩ ខែមីនា ដល់ថ្ងៃទី៦ ខែមេសា ឆ្នាំ២០២១ មានអ្នកធ្វើចត្តាឡីស័កសរុបចំនួន៣៧៦នាក់ ក្នុងនោះចត្តាឡីស័កនៅតាមផ្ទះចំនួន១៩១នាក់ និងចត្តាឡីស័កនៅតាមមណ្ឌល១៨៥នាក់ និងអ្នកបញ្ចប់ចត្តាឡីស័ក១៥២នាក់៕
អត្ថបទ និង រូបភាព៖ យូ វង្ស
