កាលពីព្រឹកថ្ងៃទី០៧ ខែមេសា ឆ្នាំ ២០២១ មន្ទីរកសិកម្ម រុក្ខាប្រមាញ់ និងនេសាទខេត្ត បាននាំយកគ្រឿងឧបភោគបរិភោគ ទៅចែកជូនដល់ប្រជាពលរដ្ឋក្រ១, ក្រ ២ និងបងប្អូន ចំណូលស្រុកវិលពីប្រទេសថៃ ដែលរងផលប៉ះពាល់ដោយសារវិបត្តិជំងឺកូវី-១៩ មកពី ១៤ភូមិ ស្មើនឹង ៦៣៨គ្រួសារ នៅឃុំជីក្រែង ស្រុកជីក្រែង ខេត្តសៀមរាប។ ពិធីចែកអំណោយនោះ ក្រោមអធិបតីភាព លោក នាក់ ណេរ៉ុន អភិបាលរងខេត្តតំណាងដ៏ខ្ពង់ខ្ពស់ឯកឧត្តម ទៀ សីហា អភិបាល នៃគណ:អភិបាលខេត្តសៀមរាប ។
តាមសេចក្តីរាយការណ៍ របស់លោក ទា គឹមសុទ្ធ ប្រធានមន្ទីរកសិកម្មខេត្តថា៖សម្ភារ: អំណោយផ្តល់ជូននាពេលនេះសាច់មាន់ទទួលបានពីក្រុមហ៊ុនស៊ីភី ពងមាន់ទទួលបានពីក្រុមហ៊ុនបេតាក្រូ និងសម្ភារ: អំណោយមួយចំនួនទៀត បានមកពីការចូលរួមជួយឧបត្ថម្ភរបស់ក្រុមការងារ និងមន្ត្រីក្រោមឱវាទមន្ទីរកសិកម្ម ។ សម្ភារ: និងស្បៀងអាហារទាំងនេះ រួមមាន ម៉ាស់ចំនួន ៧០០ប្រអប់, អាល់កុល ១៤០លីត្រ, សាច់មាន់ចំនួន ៦៤០ក្បាល ស្មើនឹង១,៦០០គ.ក្រ, ពងមាន់ចំនួន៦,៣៨០គ្រាប់, មីខ្លាឃ្មុំ ចំនួន ៦,៣៨០កញ្ចប់, ទឹកសុទ្ធ ៦៥០យួរ សម្រាប់ប្រជាពលរដ្ឋ។ សម្ភារ:មួយចំនួនទៀត សម្រាប់ឧបត្ថម្ភអាជ្ញាធរឃុំ រួមមាន: ម៉ាស់៥០ប្រអប់, មីម៉ាម៉ា ១៥កេស, ត្រីខកំប៉ុង១០យួរ, អាល់កុល ២០លីត្រ, ជូនដល់គណ:កម្មាធិការឃុំជីក្រែង។
ក្នុង១គ្រួសារៗ ទទួលបាន÷ មី១០កញ្ចប់, សាច់មាន់ ១ក្បាល, ពងមាន់ ១០គ្រាប់, ម៉ាស ១ប្រអប់, ទឹកសុទ្ឋ១យួរ ។ ក្នុងនាពេលនោះ លោក នាក់ ណេរ៉ុន អភិបាលរងខេត្ត បានកោតសសើរដល់ក្រុមការងារ នៃមន្ទីរកសិកម្ម រុក្ខាប្រមាញ់ និងនេសាទខេត្ត ដែលបានខិតខំកៀងគរប្រមូលផ្នែកឯកជន និងសប្បុរសជនមួយចំនួនឱ្យមកចូលរួមចំណែកក្នុងការជួយឧបត្ថម្ភដល់បងប្អូនប្រជាពលរដ្ឋ ដែលកំពុងជួបនូវស្ថានភាពខ្វះខាតជីវភាពក្នុងគ្រួសារ ដោយសារតែវិបត្តិជំងឺកូវីដ-១៩។
នេះបង្ហាញពីការយកចិត្តទុកដាក់របស់ថ្នាក់ដឹកនាំ និងមន្ត្រីក្រោមឱវាទមន្ទីរកសិកម្មទាំងអស់ ជួយរំលែកការលំបាកជាមួយអាជ្ញាធរខេត្តក៏ដូចជារាជរដ្ឋាភិបាល ក្នុងស្ថានភាពលំបាកនេះ។ លោក នាក់ ណេរ៉ុន បានជំរាបបងប្អូនប្រជាពលរដ្ឋថា៖ ដោយសារការឆ្លងនៃជំងឺកូវី-១៩ ចូលក្នុងសហគមន៍នៃប្រទេសកម្ពុជាយើងនៅតែបន្តកើតមាន ហេតុនេះ ក្នុងឱកាសចូលឆ្នាំប្រពៃណីជាតិខ្មែរនាពេលខាងមុខរាជរដ្ឋាភិបាលកម្ពុជា បានសម្រេចបិទការធ្វើដំណើរឆ្លងកាត់ពីខេត្តមួយទៅខេត្តមួយជាបណ្តោះអាសន្ន រយ:ពេល១៤ថ្ងៃ ចាប់ពីថ្ងៃទី០៧ រហូតដល់ថ្ងៃទី២០ ខែមេសា ឆ្នាំ២០២១ ។
ដូច្នេះបើពុំមានការចាំបាច់ទេ សូមបងប្អូនកុំធ្វើដំណើររហេតរហូត ត្រូវមានការយោគយល់ឣធ្យាស្រ័យ ព្រោះវាមានរយ:ពេលខ្លីដែរទេ គឺ ១៤ថ្ងៃ ប៉ុណ្ណោះ ក្នុងគោលបំណងទប់ស្កាត់មេរោគ Covid-19 ។ សូមរក្សាភាពស្ងៀមស្ងាត់ដោយកុំចេញក្រៅផ្ទះបើគ្មានភាពចាំបាច់ និងរស់នៅប្រកបដោយឣនាម័យខ្ពស់ និយាយជារួមទាំងអស់គ្នាត្រូវតែ អនុវត្តតាមការណែនាំរបស់ក្រសួងសុខាភិបាល និងវិធានការបីការពារនិងបីកុំរបស់សម្តេចតេជោ សែន នាយករដ្ឋមន្ត្រី គឺ “៣ការពារ” ទី១ ដោយការពាក់ម៉ាស់, ទី២ លាងសំអាតដៃឱ្យបានញឹកញាប់, ទី៣ រក្សា គម្លាតសុវត្ថិភាពសង្គម រវាងបុគ្គលម្នាក់ទៅម្នាក់ឱ្យបានយ៉ាងតិចមួយម៉ែត្រកន្លះឡើងទៅ និង”៣កុំ” គឺកុំទី១ កុំចូលទៅទីកន្លែងបិទជិតខ្វះខ្យល់ចេញចូល និងប្រើម៉ាស៊ីនត្រជាក់ច្រើន, កុំទី២ កុំទៅទីដែលមានមនុស្សច្រើនកុះករ និងកុំទី៣ កុំប៉ះពាល់គ្នា ជួបជុំគ្នាច្រើនជាដើម ។
លោក អភិបាលរងខេត្តបាន សូមស្នើដល់បងប្អូនអ៊ុពូមីងចូលរួមទាំងអស់គ្នា បើមានបងប្អូនសាច់ញាតិធ្វើដំណើរមកពីក្នុងខេត្តគោលដៅកំពុងមានការឆ្លងមេរោគកូវីដ-១៩ ហើយចូលមកក្នុងមូលដ្ឋានរបស់យើង សូមកុំលាក់លៀម ផ្ទុយទៅវិញត្រូវប្រញ៉ាប់រាយការណ៍ទៅអាជ្ញាធរមូលដ្ឋានឬសមត្ថកិច្ច ដែលនៅជិតបំផុត ដើម្បីនាំគាត់ទៅពិនិត្យសុខភាព និងធ្វើចត្តាឡីស័ក ១៤ថ្ងៃ ដើម្បីធានាថា សហគមន៍យើង ភូមិឃុំស្រុកខេត្តរបស់យើងមិនមានការនាំជំងឺកូវីដ-១៩ ចូលក្នុងសហគមន៍ទៀតនោះទេ។
ជាមួយគ្នានោះដែរ លោកអភិបាលរងខេត្ត, លោកប្រធានមន្ទីរ និងលោកអភិបាលស្រុក ព្រមទាំងសហការីបាននាំយកចង្ហាន់ទៅប្រគេនព្រះសង្ឃដែលគង់នៅវត្តជីក្រែង ចំនួន ៣៣អង្គ ព្រមទាំងបច្ច័យ ចំនួន១០ពាន់រៀល ក្នុងមួយអង្គ និងប្រគេនថវិកាចំនួន៦លានរៀល សម្រាប់វត្តទិញដីពង្រីកស្រះក្នុងវត្តផងដែរ៕
អត្ថបទនិងរូបភាព: លោកយូ វង្ស កែសម្រួលដោយ លីវ សុខុន
